گەرمانيانىڭ Wilo كومپانياسى قازاقستاندى ورتالىق ازيا نارىعىنا شىعاتىن الاڭ رەتىندە پايدالانباق

كونسەرن سورعىلار شىعارادى، سونداي-اق تۇرعىن ۇيلەرگە، قوعامدىق جانە ءوندىرىس عيماراتتارىنا ارنالعان ەنەرگيا ۇنەمدەۋشى شەشىمدەر ۇسىنادى.

پرەزيدەنت Wilo كومپانياسىن قازاقستاندا جەرگىلىكتى ءوندىرىستى دامىتقان نەمىس بيزنەسىنىڭ جارقىن ۇلگىسى دەپ اتادى. قاسىم-جومارت توقايەۆ كومپانيانىڭ الماتى وبلىسىنداعى ءوندىرىس كەشەنىنە ينۆەستيتسيا سالۋ، سونداي-اق ەلىمىزدى ورتالىق ازيا نارىعىنا شىعاتىن الاڭ رەتىندە پايدالانۋ تۋرالى شەشىمىن جوعارى باعالادى.

مەملەكەت باسشىسىنىڭ پىكىرىنشە، ەندىگى قادام لوكاليزاتسيانى تەرەڭدەتۋ بولۋعا ءتيىس. ياعني، قازاقستاندا شىعارىلاتىن بولشەكتەر ۇلەسىن ارتتىرۋعا، ينجەنەرلىك جانە سەرۆيستىك الەۋەتتى دامىتۋعا، وتاندىق جەتكىزۋشىلەر قاتارىن كوبەيتۋگە ءمان بەرگەن ءجون.

بۇل رەتتە پرەزيدەنت كونسەرننىڭ الاتاۋ قالاسىندا سورعى قۇرىلعىسىنا ماماندانعان وڭىرلىك سەرۆيس جانە ينجەنەرلىك ورتالىعىن اشۋ جوسپارىن قۇپتادى.

قاسىم-جومارت توقايەۆتىڭ ايتۋىنشا، ەلىمىز Wilo كومپانياسىنىڭ وتاندىق ينجينيرينگ كاسىپورىندارىمەن، ۋنيۆەرسيتەتتەرمەن جانە تەحنيكالىق ماماندارمەن ىنتىماقتاستىعىنا مۇددەلى. ونىڭ اياسىندا كادر دايارلاۋ، سەرۆيستىك قىزمەت كورسەتۋ جانە سيفرلىق ءوندىرىستىڭ وزىق تاجىريبەسىن ەنگىزۋ باعىتتارىن ىلگەرىلەتۋگە بولادى.

وليۆەر گەرمەس كونسەرن جوبالارىنا قولداۋ كورسەتكەنى ءۇشىن قازاقستان پرەزيدەنتىنە العىس ايتتى، سونداي-اق ەلىمىزبەن سەرىكتەستىك اياسىن كەڭەيتۋ جوسپارىن تانىستىردى.

نەمىس كاسىپكەرى قازاقستاننىڭ Wilo ءۇشىن ورتالىق ازياداعى وڭىرلىك حابقا اينالعانىن اتاپ ءوتتى.