گەرمانيانىڭ ارنايى قىزمەتتەرىنە كيبەرشابۋىل جاساۋعا جانە تۇرعىن ۇيلەرگە جاسىرىن كىرۋگە رۇقسات بەرىلدى

قۇجاتقا سايكەس، فەدەرالدىق بارلاۋ قىزمەتىنە (BND) كيبەرشابۋىل جاساۋعا، ال كونستيتۋتسيانى قورعاۋ جونىندەگى فەدەرالدىق ۆەدومستۆوعا (BfV) بەلگىلى ءبىر جاعدايلاردا تۇرعىن ۇيلەرگە جاسىرىن كىرۋگە رۇقسات بەرىلەدى. بۇل تۋرالى Kazinform اگەنتتىگى DW باسىلىمىنا سىلتەمە جاساپ حابارلايدى.

زاڭدى 308 دەپۋتات قولداسا، 190 دەپۋتات قارسى داۋىس بەرگەن. تاعى 71 دەپۋتات قالىس قالدى.

Die Welt باسىلىمىنىڭ جازۋىنشا، رەفورما تىڭشىلىققا، تەرروريزمگە جانە ديۆەرسيالارعا قارسى كۇرەسكە باعىتتالعان. بۇعان دەيىن گەرمانيانىڭ ارنايى قىزمەتتەرى نەگىزىنەن اقپارات جيناۋمەن اينالىسسا، ەندى ولارعا بەلسەندى وپەراتسيالار جۇرگىزۋگە مۇمكىندىك بەرىلەدى.

اتاپ ايتقاندا، BND شەتەلدەگى اقپاراتتىق جۇيەلەرگە شابۋىل جاساپ، دەرەكتەردى جويۋعا نەمەسە اۋىستىرۋعا، سونداي-اق ينتەرنەت-ترافيكتى باسقا باعىتقا بۇرۋعا قۇقىلى بولادى. سونىمەن قاتار ارنايى قىزمەتتەرگە بيومەتريالىق دەرەكتەردى تالداۋ ءۇشىن جاساندى ينتەللەكتىنى پايدالانۋعا رۇقسات ەتىلەدى. ەرەكشە جاعدايلاردا ولار 16 جاستان اسقان جاسوسپىرىمدەردى دە قۇپيا اقپارات بەرۋشى رەتىندە ىنتىماقتاستىققا تارتا الادى.

ارنايى قىزمەتتەردىڭ جوسپارلانعان ارەكەتتەرىنىڭ زاڭدىلىعىن الدىن الا بۇرىنعى سۋديالار كىرەتىن ارنايى قاداعالاۋ ورگانى باعالايدى.

گەرمانيانىڭ ىشكى ىستەر ءمينيسترى الەكساندەر دوبريندت بارلاۋ قۇرىلىمدارى تولىققاندى ارنايى وپەراتسيالار جۇرگىزۋ مۇمكىندىگىنە يە بولاتىنىن مالىمدەدى.

- بارلاۋ قىزمەتتەرى تولىققاندى ارنايى قىزمەتتەرگە اينالىپ جاتىر. بۇل شارالار ەلگە سىرتتان دا، ىشتەن دە ءقاۋىپ توندىرەتىن دەموكراتيا جاۋلارىمەن كۇرەسۋ ءۇشىن قاجەت،- دەدى ول.

گەرمانيا بيلىگى رەفورمانىڭ قاجەتتىلىگىن رەسەي، قىتاي جانە يران تاراپىنان تۋىنداپ وتىرعان گيبريدتى قاۋىپتەردىڭ كۇشەيۋىمەن تۇسىندىرەدى. ال زاڭعا قارسى تاراپتار ارنايى قىزمەتتەرگە بەرىلەتىن جاڭا وكىلەتتىكتەر ازاماتتاردىڭ قۇقىقتارى مەن بوستاندىقتارىنا ءقاۋىپ ءتوندىرۋى مۇمكىن ەكەنىن ەسكەرتەدى.

وسىعان دەيىن گەرمانيا مەن ۇلى بريتانيانىڭ 2 مىڭ شاقىرىمنان استام قاشىقتىققا ۇشاتىن گيپەردىبىستىق قارۋ ازىرلەگەلى جاتقانى تۋرالى جازدىق.