گەرمانيالىق كومپانيا قازاقستاندا قۇنى 500 ميلليون دوللار بولاتىن جوبالاردى ىسكە اسىرادى
استانا. KAZINFORM - مەملەكەت باسشىسى Linde GmbH كومپانياسىنىڭ اعا ۆيتسە-پرەزيدەنتى وليۆەر پفانندى قابىلدادى، دەپ حابارلايدى اقوردا.
قاسىم-جومارت توقايەۆ Linde كومپانياسىنىڭ وتاندىق ونەركاسىپتى دامىتۋعا قوسقان ۇلەسىن جوعارى باعالادى.
Linde - وندىرىسكە قاجەتتى گازدار مەن ينجينيرينگ سالاسىنداعى الەمدىك جەتەكشى كومپانيالاردىڭ ءبىرى. كومپانيانىڭ تەحنولوگياسى مەتاللۋرگيا، تاۋ-كەن، حيميا، ەنەرگەتيكا، دەنساۋلىق ساقتاۋ، ەلەكترونيكا سالالارىندا جانە جوعارى تەحنولوگيالىق وندىرىستەردە كەڭىنەن قولدانىلادى.
پرەزيدەنت كومپانيانىڭ قازاقستاندا ينۆەستيتسيالىق قۇنى 500 ميلليون دوللارعا دەيىن باعالاناتىن ءبىرقاتار جوبانى ىسكە اسىرۋ جوسپارىن، سونىڭ ىشىندە Linde مەن Qarmet اراسىنداعى تەمىرتاۋ قالاسىندا جاڭا اۋا ءبولۋ قوندىرعىسىنىڭ قۇرىلىسى بويىنشا كەلىسىمگە قول قويىلۋىن قۇپتادى.
كەزدەسۋ بارىسىندا مۇناي حيمياسى ونەركاسىبىندەگى بىرلەسكەن جوبالاردىڭ پەرسپەكتيۆاسى قاراستىرىلدى.
مەملەكەت باسشىسى كومىرتەگىن تۇتۋعا جانە ساقتاۋعا ارنالعان Linde تەحنولوگيالارىنا ايرىقشا توقتالىپ، كومپانيانىڭ سۋتەگى ينفراقۇرىلىمىن دامىتۋعا ۇمتىلىسى ەلىمىزدىڭ «جاسىل» ەكونوميكا ستاندارتتارىنا كوشۋ مىندەتىمەن ۇندەسەتىنىنە نازار اۋداردى.
بۇل رەتتە قاسىم-جومارت توقايەۆ اتىراۋ جانە ماڭعىستاۋ وبلىستارىندا مۇناي حيمياسى مەن حيميا كلاستەرىن دامىتۋ قولعا الىنعانىن اتاپ ءوتتى. Linde كومپانياسىن كەلەشەگى زور وسى جوبالارعا اتسالىسۋعا شاقىردى.
وليۆەر پفانن كومپانيا جوبالارىنا قولداۋ بىلدىرگەنى ءۇشىن قازاقستان پرەزيدەنتىنە العىس ايتتى. سونداي-اق سەرىكتەستىك اياسىن ودان ءارى كەڭەيتۋگە جانە ەلىمىزدە جاڭا ءوندىرىس وشاقتارىن اشۋعا دايىن ەكەنىن جەتكىزدى.
