گەرمانيادا XIII عاسىرداعى قامال 1 ەۋروعا ساتىلىمعا شىعارىلدى
استانا. KAZINFORM - گەرمانيانىڭ ساكسونيا جەرىندەگى باد-ديۋبەن قالاسىنىڭ بيلىگى شامامەن 800 جىل بۇرىن سالىنعان شناديتتس قامالىنا ساتىپ الۋشى ىزدەپ جاتىر، دەپ حابارلايدى BILD.
نىسان نەبارى 1 ەۋروعا ساتىلماق. جاڭا يەسى جالپى اۋماعى 1012 شارشى مەتر بولاتىن تاريحي عيماراتقا يە بولادى. قامال ىشىندە باتىرلار زالى ساقتالعان، ال عيماراتتىڭ اينالاسى ورمەن قورشالعان جانە ەكى مۇناراسى بار.
- قامالدىڭ ساقتالىپ قالعانىن قالايمىن. بۇل عيمارات ءوڭىر مەن بۇكىل ساكسونيا ءۇشىن ماڭىزدى. ارينە، قازىرگى سىرتقى كەلبەتى كوڭىل كونشىتپەيدى، ءالى ىستەلەتىن جۇمىس كوپ. ءبىراق شاتىرى ءبۇتىن، - دەدى قالا مەرى ماتياس ميت BILD باسىلىمىنا بەرگەن سۇحباتىندا.
جەرگىلىكتى بيلىكتىڭ باعالاۋىنشا، قامالدى تولىق قالپىنا كەلتىرۋگە شامامەن 20 ميلليون ەۋرو قاجەت. تاريحي عيمارات مەملەكەت قورعاۋىندا بولعاندىقتان، جوندەۋ جۇمىستارىنىڭ بارلىعى ەسكەرتكىشتەردى قورعاۋ ورگاندارىمەن كەلىسىلۋى ءتيىس. بۇل قالپىنا كەلتىرۋ مەرزىمىن ەداۋىر ۇزارتۋى مۇمكىن.
بۇعان دەيىن دە ينۆەستورلار قامالدى ساقتاپ قالۋعا ارەكەت جاساعان. 2014-جىلى امەريكالىق ايەل مەن ونىڭ ۇلى مۇندا قوناقۇي، باربەكيۋ مەيرامحاناسى جانە شاراپ بارىن اشۋدى جوسپارلاعان. الايدا جوباعا ۋادە ەتىلگەن ميلليونداردىڭ ورنىنا شامامەن 400 مىڭ ەۋرو عانا ينۆەستيتسيالانعان.
2018-جىلى ساتىپ الۋ-ساتۋ شارتى بۇزىلىپ، عيمارات قايتادان قالا مەنشىگىنە وتكەن.
