گەرمانيادا جاستار نارازىلىعى تارتىپسىزدىككە ۇلاستى
استانا. KAZINFORM - گەرمانيادا 31-قازان كۇنى كەشكە وتكەن جاستاردىڭ جاپپاي نارازىلىق اكسيالارى ءبىرقاتار قالادا تارتىپسىزدىككە ۇلاستى، دەپ حابارلايدى Deutsche Welle.
Gen-Z regelt («Z ۇرپاعى شەشەدى») قوزعالىسى ۇيىمداستىرعان شەرۋلەر ەلدىڭ 30 دان استام قالاسىندا ءوتتى. ۇيىمداستىرۋشىلاردىڭ مالىمەتىنشە، نارازىلىق اكسيالارىنا 100 مىڭنان استام ادام قاتىسقان.
فرانكفۋرت-نا-ماينە قالاسىندا شەرۋگە شىققانداردىڭ ءبىر بولىگى دۇكەندەردىڭ اينەكتەرىن سىندىرىپ، پوليتسيا قىزمەتكەرلەرىمەن قاقتىعىسقان. تارتىپسىزدىك كەزىندە تۇتاندىرعىش قۇرالدار دا قولدانىلعان.
بەرليندە وتكەن ەڭ ءىرى شەرۋلەردىڭ بىرىندە قۇقىق بۇزۋشىلىق جاساعانى ءۇشىن 56 ادام ۇستالدى. ال كەلن قالاسىندا بەتپەردە تاققان جانە پيروتەحنيكالىق قۇرالدار پايدالانعان نارازىلىق بىلدىرۋشىلەرگە قارسى پوليتسيا سۋ اتقىشتاردى قولداندى.
نارازىلىققا قاتىسۋشىلار ءبىلىم بەرۋ ساپاسىن جاقسارتۋدى، ءومىر ءسۇرۋ قۇنىنىڭ وسۋىنە قارسى شارالار قابىلداۋدى، كليماتتى قورعاۋ ساياساتىن كۇشەيتۋدى تالاپ ەتىپ وتىر.
سونىمەن قاتار ولار پسيحوتەراپيالىق كومەك پەن تاۋەلدىلىكتەن ەمدەلۋ قىزمەتتەرىنىڭ قولجەتىمدىلىگىن ارتتىرۋدى، مىندەتتى اسكەري قىزمەت ەنگىزۋدەن جانە الەۋمەتتىك شىعىنداردى قىسقارتۋدان باس تارتۋدى تالاپ ەتۋدە.
گەرمانياداعى شەرۋلەر سوڭعى اپتالاردا ەۋروپانىڭ باسقا ەلدەرىندە دە بايقالعان جاستار نارازىلىعىنىڭ جالعاسىنا اينالدى.
اتاپ ايتقاندا، فرانتسيانىڭ بىرنەشە قالاسىندا نارازىلىق اكتسيالارى تارتىپسىزدىكتەر مەن پوليتسيامەن قاقتىعىستارعا ۇلاسقان. ال يتاليادا 30-قازاندا وتكەن شەرۋلەرگە ۇيىمداستىرۋشىلاردىڭ مالىمەتىنشە، ءبىر ميلليوننان استام ادام قاتىسقان.
ايتا كەتەيىك، بۇعان دەيىن فرانسيادا ءبىلىم بەرۋ جۇيەسىندەگى ماسەلەلەرگە بايلانىستى باستالعان وقۋشىلار نارازىلىعى جاپپاي شەرۋلەرگە ۇلاسقان ەدى. اكسيالارعا ستۋدەنتتەر مەن مۇعالىمدەر قوسىلىپ، پوليتسيامەن قاقتىعىستار كەزىندە جۇزدەگەن ادام ۇستالعان.
