فرانسياداعى جاپپاي تارتىپسىزدىك شىعىنى 1,2 ميلليارد ەۋروعا جەتۋى مۇمكىن
استانا. KAZINFORM - وتكەن دەمالىس كۇندەرى فرانسيادا بولعان جاپپاي تارتىپسىزدىكتەر ساقتاندىرۋ تولەمدەرىنىڭ مولشەرى جاعىنان ەلدەگى ەڭ ءىرى وقيعالاردىڭ ءبىرى بولماق، دەپ حابارلايدى Kazinform اگەنتتىگىنىڭ مەنشىكتى ءتىلشىسى Financial Times باسىلىمىنا سىلتەمە جاساپ.
قارجى ساراپشىلارىنىڭ باعالاۋىنشا، ساقتاندىرىلعان شىعىن كولەمى 1,2 ميلليارد ەۋروعا جەتۋى مۇمكىن. Financial Times ساۋالناما جۇرگىزگەن بروكەرلەر دە شىعىن 1 ميلليارد ەۋرودان اساتىنىن بولجايدى. بۇل كورسەتكىش 2023-جىلدىڭ جازىندا بولعان تارتىپسىزدىكتەردەن كەلگەن 700-800 ميلليون ەۋرو شىعىننان اسىپ ءتۇستى.
- جاپپاي تارتىپسىزدىكتىڭ بەلەڭ الۋى تابيعي اپاتتارعا ۇقساپ بارادى، - دەدى Morningstar ساراپشىسى ماركوس الۆارەس.
ونىڭ ايتۋىنشا، جۇزدەگەن ميلليون ەۋرو شىعىن اكەلەتىن مۇنداي وقيعالار ەندى جىل سايىن قايتالانۋى مۇمكىن. زورلىق-زومبىلىقتىڭ قىسقا مەرزىمدە كەڭ تارالۋى مەن ينفلياتسيا شىعىنى كولەمىنىڭ 2023-جىلمەن سالىستىرعاندا جىلدام وسۋىنە اسەر ەتكەن.
فرانسيانىڭ ساۋدا ءمينيسترى سەرج پاپەننىڭ الدىن الا باعالاۋىنشا، ەل بويىنشا كەمىندە 3 مىڭ كاسىپورىنعا شىعىن كەلگەن. باستاپقىدا بەيبىت وتكەن نارازىلىقتار پاريج، مارسەل، ليموج جانە باسقا قالالاردا جاپپاي تارتىپسىزدىككە، توناۋ مەن عيمارات ورتەۋگە ۇلاسقان. سەنبى كۇنى شامامەن 2400 ادام ۇستالدى.
فرانسيا بيلىگى تارتىپسىزدىكتەردەن كەلگەن شىعىندى وتەۋ ءۇشىن مەملەكەت كەپىلدىگىمەن 4 ميلليارد ەۋروعا دەيىنگى مىندەتتى ساقتاندىرۋ جۇيەسىن ازىرلەپ جاتىر. الايدا ەۋروكوميسسيانىڭ ماقۇلداۋى قاجەت بولعاندىقتان، جۇيە ءالى كۇشىنە ەنگەن جوق. سوندىقتان قازىرگى شىعىندى جەكە ساقتاندىرۋ جانە قايتا ساقتاندىرۋ كومپانيالارى وتەيدى.
سونىمەن قاتار فرانسيادا جاپپاي تارتىپسىزدىكتەردەن كەيىن كەي قالالاردا كومەندانتتىق ساعات ەنگىزىلەتىنىن حابارلاعان ەدىك.
