فرانسيادا سۋپەرماركەتتەرگە كيبەرشابۋىل جاسالىپ، ميلليونداعان ەۋرونىڭ ازىق- تۇلىگى ءبۇلىندى

سالدارىنان ميلليونداعان ەۋرو تۇراتىن ازىق-تۇلىك جارامسىز بولىپ قالدى، دەپ حابارلايدى BBC.

حاكەرلەر ساۋدا ورىندارىنداعى توڭازىتقىش جابدىقتارىنىڭ تەمپەراتۋراسىن رەتتەيتىن باعدارلامالىق جاساقتامانى باقىلاۋعا العان. زارداپ شەككەن ساۋدا جەلىلەرىنىڭ ءبىرىنىڭ مالىمەتىنشە، كەيبىر توڭازىتقىشتاردىڭ تەمپەراتۋراسى ءتۇن ىشىندە سەلسي بويىنشا 50 گرادۋسقا دەيىن كوتەرىلگەن.

Coopérative U كومپانياسىنىڭ باس ديرەكتورى دومينيك شەلشە بىرنەشە سۋپەرماركەتكە جاسالعان شابۋىلدى بۇرىن-سوڭدى بولماعان اسا اۋىر وقيعا دەپ باعالادى.

كيبەرشابۋىل Coopérative U جەلىسىنىڭ 100 دەن استام سۋپەرماركەتىنە، سونداي- اق Intermarché جانە وعان تيەسىلى Netto برەندىنىڭ 180 دۇكەنىنە اسەر ەتكەن. Intermarché وكىلىنىڭ ايتۋىنشا، وسىنداي شابۋىلداردىڭ الدىن الۋ ءۇشىن تاعى 100 دۇكەن شۇعىل تۇردە ينتەرنەتتەن اجىراتىلعان.

Carrefour كومپانياسى وزىنە تيەسىلى 6 مىڭ دۇكەننىڭ 80 ىندە توڭازىتقىشتاردى باسقارۋ جۇيەسى بۇزىلعانىن حابارلادى. ال Monoprix جەلىسىندە 400 دەن استام دۇكەننىڭ 5 پايىزى كيبەرشابۋىلدان زارداپ شەككەن.

قاۋىپسىزدىگىنە كەپىلدىك بەرۋ مۇمكىن بولماعان ازىق-تۇلىك ونىمدەرى ساۋدادان الىندى.

Intermarché جانە Netto جەلىلەرىنە يەلىك ەتەتىن Mousquetaires توبى BBC گە بەرگەن مالىمدەمەسىندە دۇيسەنبى كۇنى تۇستەن كەيىن دە كەيبىر توڭازىتقىشتار مەن مۇزداتقىش ۆيترينالارى جۇمىس ىستەمەي تۇرعانىن جەتكىزدى.

كومپانيا وكىلدەرى دۇكەندەردىڭ بارلىق قاجەتتى ساقتىق شارالارىن قابىلداپ، اتالعان توڭازىتقىشتارداعى ونىمدەردى الىپ تاستاعانىن اتاپ ءوتتى. قىزمەتكەرلەر سورەلەردى مۇمكىندىگىنشە تەزىرەك قايتا تولتىرۋ ءۇشىن جۇمىس ىستەپ جاتىر.

تەرگەۋ مالىمەتىنشە، كيبەرشابۋىلدىڭ نەگىزگى نىساناسى دانيانىڭ Danfoss ينجەنەرلىك كومپانياسى ازىرلەگەن باعدارلامالىق جاساقتاما بولعان.

بۇل جۇيە ساۋدا جەلىلەرىنە توڭازىتقىش جابدىقتارىن قاشىقتان باسقارۋعا مۇمكىندىك بەرەدى.

ادەتتە سۋپەرماركەتتەردەگى مۇزداتقىش كامەرالار تۇندە قىسقا مەرزىمدى ءجىبىتۋ كەزەڭىنەن وتەدى. وسى ۋاقىتتا ولاردىڭ تەمپەراتۋراسى ازداپ كوتەرىلەدى.

الايدا حاكەرلەر جابدىقتاردىڭ قىزۋىن كۇشەيتىپ، جوعارى تەمپەراتۋرانىڭ ۇزاق ۋاقىت ساقتالۋىنا ىقپال ەتكەن.

كيبەرشابۋىلدىڭ تولىق اۋقىمى ازىرگە انىقتالعان جوق. دەگەنمەن جەكەلەگەن ساۋدا جەلىلەرىنىڭ مالىمەتتەرى فرانسياداعى شامامەن 15 مىڭ سۋپەرماركەتتىڭ 400 گە جۋىعى زارداپ شەككەنىن كورسەتەدى.

فرانسيا پروكۋراتۋراسى كيبەرقىلمىسقا قاتىستى جەكە تەرگەۋ باستادى.

پاريج پروكۋراتۋراسى بۇل وقيعانى ەل اۋماعىنداعى بىرنەشە ءىرى ازىق-تۇلىك ساۋدا جەلىسىنىڭ توڭازىتقىش جابدىقتارىنا جاسالعان اۋقىمدى كيبەرشابۋىل دەپ سيپاتتادى.

ەۋروپالىق كوميسسيانىڭ اۋىل شارۋاشىلىعى جانە ازىق-تۇلىك ماسەلەلەرى جونىندەگى كوميسسارى كريستوف حانسەن X الەۋمەتتىك جەلىسىندە شابۋىلدى ايىپتادى.

- ازىق-تۇلىك قاۋىپسىزدىگى بارلىق دەڭگەيدە ەرەكشە نازار اۋدارۋدى تالاپ ەتەدى. ويتكەنى ازىق-تۇلىكتى قارۋعا اينالدىرۋ شىندىققا اينالدى،-دەپ جازدى ول.

Coopérative U كومپانياسىنىڭ باس ديرەكتورى دومينيك شەلشە دە X جەلىسىندە قىزمەتكەرلەردىڭ جاعدايدى قالپىنا كەلتىرۋگە تولىق جۇمىلدىرىلعانىن مالىمدەدى.

ونىڭ ايتۋىنشا، كومپانيا ماماندارى توڭازىتقىش جابدىقتارىنا قىزمەت كورسەتەتىن ساراپشىلارمەن بىرلەسىپ، جۇيەلەردىڭ قالىپتى جۇمىسىن مۇمكىندىگىنشە تەزىرەك قالپىنا كەلتىرۋگە كۇش سالىپ جاتىر.

سونداي-اق ول كيبەرشابۋىلعا قاتىستى جان-جاقتى تەرگەۋ جۇرگىزۋگە شاقىردى.

ايتا كەتەيىك، بۇعان دەيىن فرانسيادا سالىق قىزمەتىنىڭ اقپاراتتىق جۇيەسىنە جاسالعان كيبەرشابۋىل سالدارىنان شامامەن 678 مىڭ جەكە تۇلعا مەن كومپانيانىڭ دەرەكتەرى زارداپ شەككەنى حابارلانعان بولاتىن.