فرانسيادا جوعارى سىنىپ وقۋشىلارىنىڭ نارازىلىعى كۇشەيە ءتۇستى
استانا. KAZINFORM - فرانسيادا جوعارى سىنىپ وقۋشىلارىنىڭ نارازىلىعى جالعاسىپ جاتىر. ولار مەكتەپتەردىڭ كىرەبەرىسىن جاۋىپ، مۇعالىم جەتىسپەۋشىلىگىن جويۋدى، ءبىلىم سالاسىنا بولىنەتىن قارجىنى كوبەيتۋدى جانە وقۋ جاعدايىن جاقسارتۋدى تالاپ ەتىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
بەيسەنبى كۇنى جوعارى سىنىپ وقۋشىلارى مەن ستۋدەنتتەردىڭ كاسىپوداقتارى نارازىلىقتىڭ «ەكىنشى كەزەڭىن» جاريالادى. باستاماشىلار مەكتەپ كىرەبەرىستەرىن بوگەگەن جەكەلەگەن اكتسيالاردى ستۋدەنتتەرمەن بىرلەسىپ، بۇكىل ەل كولەمىندەگى ۇيىمداسقان ناۋقانعا اينالدىرماق.
اكسيانى وتكىزۋگە ليتسەي وقۋشىلارى وداعىنىڭ (USL) ءتوراعاسى رياد راني مەن ستۋدەنتتەر وداعىنىڭ (Union étudiante) باس حاتشىسى ەلويز لەفيەۆر-ميلون ۇيىتقى بولدى.
پاريجدە وتكەن بىرلەسكەن باسپا ءسوز ءماسليحاتىندا ولار 1 جانە 6-قازاندا وتەتىن اكسيالارعا بارلىق كاسىپوداق، قاۋىمداستىق پەن ساياسي ۇيىمدى قاتىسۋعا شاقىردى.
باستى تالاپ وزگەرگەن جوق: «ليتسەيلەر مەن ۋنيۆەرسيتەتتەردى جاپپاي قارجىلاندىرۋ». ال ءۇشىنشى ءبىر ستۋدەنتتىك ۇيىم - UNEF جوعارى وقۋ ورىندارىنداعى ورىنداردىڭ قىسقارۋىنا جانە APL تۇرعىن ءۇي جاردەماقىسىنىڭ توقتاتىلۋىنا قارسىلىق ءبىلدىرىپ، ستۋدەنتتەردى كوشەگە شىعۋعا شاقىردى.
وتكەن اپتادان بەرى نارازىلىققا شىققاندار مۇعالىم جەتىسپەۋشىلىگىنە، سىنىپتاردىڭ شامادان تىس تولۋىنا، توزىعى جەتكەن عيماراتتارعا جانە Parcoursup جۇيەسىنە شاعىمداندى. سارسەنبىگە قاراي بۇل قوزعالىس 356 وقۋ ورنىن قامتىدى.
ۇيىمداستىرۋشىلار ەكىنشى كەزەڭدە اكسيا اۋقىمىن كەڭەيتىپ، ۋنيۆەرسيتەت ستۋدەنتتەرىن دە تارتۋدى كوزدەپ وتىر. ۇكىمەت ليتسەي وقۋشىلارىمەن كەڭەسۋ پلاتفورماسىن جاريالاعانىمەن، نارازىلىق بىلدىرۋشىلەر قىسىمدى جالعاستىرماق.
ال وتكەن تاۋلىكتە قوزعالىسقا قاتىسقان 625 ادام ۇستالىپ، قاۋىپسىزدىك كۇشتەرىنىڭ 83 قىزمەتكەرى جاراقات الدى. فرانسيا پرەمەر-ءمينيسترى لەكورنيۋ ليتسەي وقۋشىلارىنىڭ نارازىلىعىن ودان ءارى ۋشىقتىرۋ «جاۋاپسىزدىق» ەكەنىن ەسكەرتكەن ەدى.
