فرانسيادا جانارماي باعاسى رەكورد جاڭارتتى

سوڭعى اپتالاردا بالىقشىلار مۇناي بازالارى مەن پورتتارعا كىرەبەرىستەردى جاۋىپ، فەرمەرلەر قىمباتشىلىققا قارسى نارازىلىق اكتسيالارىن وتكىزدى، دەپ حابارلايدى Euronews.

فرانسيادا ديزەل وتىنىنىڭ ءليترى 2,41 ەۋروعا دەيىن قىمباتتاپ، جاڭا رەكورد ورناتتى. ەلدە ەڭ كوپ ساتىلاتىن SP95-E10 بەنزينىنىڭ باعاسى ليترىنە 2,17 ەۋرودان اسىپ، 2022 -جىلعى ەڭ جوعارى كورسەتكىشتەن جوعارىلادى. ال SP98 بەنزينىنىڭ ورتاشا باعاسى 2,28 ەۋرودان استى.

باعانىڭ وسۋىنە بايلانىستى فرانسيا ۇكىمەتى جانارماي قىمباتشىلىعىنان ەڭ كوپ زارداپ شەككەن وتباسىلارعا ارنالعان اتاۋلى وتەماقى شارالارىن كەڭەيتىپ، ونىڭ مەرزىمىن ۇزارتاتىنىن جاريالادى. جاڭا قولداۋ پاكەتىنە 450 ميلليون ەۋرو بولىنەدى. وسىلايشا جانارماي باعاسىنىڭ ءوسۋىن جۇمسارتۋعا باعىتتالعان شارالاردىڭ جالپى كولەمى 1,4 ميلليارد ەۋروعا جەتپەك.

- جانارمايعا سالىناتىن سالىق مەملەكەتكە ايتارلىقتاي كىرىس اكەلەدى، ءبىراق سونىمەن بىرگە ونىڭ تۇپكىلىكتى باعاسىن ەداۋىر ارتتىرادى، - دەدى پاريج دوفين ۋنيۆەرسيتەتىنىڭ ەكونوميكا پروفەسسورى اننا كريتي.

فرانسيادا جانارمايعا سالىناتىن نەگىزگى ەكى سالىق بار. ونىڭ ءبىرى - ەنەرگەتيكالىق ونىمدەردى تۇتىنۋعا سالىناتىن TICPE اكسيزى، ەكىنشىسى – شامامەن %20 مولشەرىندەگى قوسىلعان قۇن سالىعى. ق ق س جانارماي قۇنىنا TICPE قوسىلعاننان كەيىن ەسەپتەلەدى.

ساراپشىلاردىڭ پىكىرىنشە، فرانسيانىڭ ديزەل وتىنى يمپورتىنا تاۋەلدىلىگى دە باعانىڭ سىرتقى فاكتورلارعا سەزىمتالدىعىن ارتتىرادى. ەلدە ديزەلمەن جۇرەتىن كولىكتەر كوپ، بۇل وتىن ءتۇرىن شاعىن جانە ورتا بيزنەس، كوممەرتسيالىق تاسىمال مەن ونەركاسىپ تە كەڭىنەن پايدالانادى.

قازىرگى جانارماي باعاسى ينفلياتسيانى ەسەپكە العاندا، 2018 -جىلى «سارى جيلەتتەر» قوزعالىسىنىڭ جاپپاي نارازىلىعىنا تۇرتكى بولعان دەڭگەيدەن دە اسىپ كەتكەن.