فرانسيادا نە بولىپ جاتىر: جاپپاي نارازىلىقتىڭ استارىندا نە بار

الەۋمەتتىك تالاپتار قالاي جاپپاي تارتىپسىزدىككە ۇلاستى

قىركۇيەك ايىنىڭ سوڭىندا فرانسيادا مەكتەپ وقۋشىلارىنىڭ نارازىلىق شەرۋلەرى باستالعاندا، جۇرت مۇنى ۇيرەنشىكتى قۇبىلىس رەتىندە قابىلدادى. وقيعا وسىنشالىقتى ۋشىعىپ، ەلدىڭ ءتۇرلى قالالارىندا جاپپاي تارتىپسىزدىككە ۇلاسادى دەپ ەشكىم كۇتپەگەن ەدى. اسىرەسە 17-قازاندا جاعداي كۇردەلەنە ءتۇستى. بۇل كەزدە شەرۋلەردىڭ نەگىزگى ماقساتى ەرەۋىلگە شىققان جوعارى سىنىپ وقۋشىلارىنىڭ مۇددەسىن قورعاۋدان الدەقايدا كەڭەيىپ، تۇرمىس قۇنىنىڭ قىمباتتاۋىنا جانە ءبىلىم بەرۋدى قوسا العاندا، مەملەكەتتىك قىزمەتتەردىڭ قولجەتىمدىلىگىنىڭ تومەندەۋىنە قارسى نارازىلىققا اينالدى.

17-قازاندا كوشەگە جارتى ميلليونعا جۋىق ادام شىقتى. بەيبىت شەرۋشىلەردىڭ اراسىندا ۇيىمداسقان، راديكالدى كوزقاراستاعى ءتۇرلى توپتار دا بولدى. سونىڭ سالدارىنان كوپتەگەن مەملەكەتتىك مەكەمەگە شابۋىل جاسالىپ، ليموج قالاسىنىڭ اكىمدىگى ورتەلدى، جۇزدەگەن دۇكەن تونالدى. فرانسيانىڭ ساۋدا ءمينيسترى سەرج ءپاپيننىڭ مالىمەتىنشە، تارتىپسىزدىكتەردەن كەمىندە 3 مىڭ دۇكەن زارداپ شەككەن.

بيلىك قوعامدىق ءتارتىپتى قالپىنا كەلتىرۋگە كۇش سالىپ جاتىر. ءبىراق قابىلدانعان شارالار ازىرگە ايتارلىقتاي ناتيجە بەرمەي وتىر. بۇل تۇرعىندار مەن كاسىپكەرلەردىڭ نارازىلىعىن تۋعىزدى. 19-قازاندا فرانسيانىڭ ءبىرقاتار قالاسىندا كومەندانتتىق ساعاتقا بايلانىستى شەكتەۋلەر ەنگىزىلدى. قاجەت بولعان جاعدايدا شەكتەۋلەردى كەڭەيتۋ مۇمكىندىگى دە قاراستىرىلعان. تارتىپسىزدىكتەر فرانسيا اۋماعىمەن شەكتەلمەي، يتاليا مەن بەلگيادا دا كورىنىس تاپتى. دەمەك، بۇل وقيعالاردى تەك فرانسياعا ءتان ىشكى ماسەلە رەتىندە قاراستىرۋ قيىن.

فرانسيا ءۇشىن 17-قازانداعى تارتىپسىزدىكتەر بۇرىن-سوڭدى بولماعان جاعدايعا جەتتى. كوپشىلىك ولاردى 1968 -جىلعى ستۋدەنتتەر تولقۋىمەن سالىستىرىپ جاتىر. ول كەزدەگى وقيعالار ناعىز ريەۆوليۋتسيا رەتىندە باعالانعان بولاتىن. وسى تۇستا زاڭدى سۇراق تۋىندايدى: قازىرگى تارتىپسىزدىكتەردى وبەكتيۆتى سەبەپتەرى بار اۋقىمدى الەۋمەتتىك نارازىلىقتىڭ ءبىر بولىگى دەپ قاراستىرۋعا بولا ما؟ الدە قوعامداعى نارازىلىقتى پايدالانىپ، كۇش كورسەتۋ مەن قيراتۋعا بەيىم جاستار ءوز ارەكەتتەرىنە جول اشتى ما؟

«باعىنبايتىن فرانسيا» جانە سولشىل سايلاۋشىلار ءۇشىن كۇرەس

وقيعالاردىڭ اۋقىمى مەن ۇيىمداسۋ سيپاتى بيلىككە ولاردىڭ ساياسي استارى بار ەكەنىن ايتۋعا نەگىز بەردى. فرانسيا پرەمەر-ءمينيسترى سەباستيان لەكورنيۋدىڭ مالىمدەۋىنشە، پرەزيدەنت سايلاۋى قارساڭىندا ەلدە بۇلىك شىعارۋدى كوزدەيتىن اسىرە سولشىل قوزعالىستىڭ ارەكەت ەتىپ جاتقانىنا دالەلدەر بار. ۇكىمەت باسشىسى بولعان وقيعالارعا راديكالدى كۇشتەردىڭ بىرلەستىگىن كىنالاپ، ولاردىڭ اراسىندا «باعىنبايتىن فرانسيا» قوزعالىسىنىڭ ىقپالى زور ەكەنىن اتاپ ءوتتى.

ايتا كەتەيىك، «باعىنبايتىن فرانسيا» قوزعالىسى مەن ونىڭ جەتەكشىسى جان- ليۋك مەلانشون ەلدىڭ ساياسي ومىرىندە بۇرىننان بەرى وتكىر پىكىرتالاس تۋعىزىپ كەلەدى. فرانسۋز ساياساتىنداعى اسىرە سولشىل باعىتتىڭ وكىلى سانالاتىن مەلانشون باتىل، كەيدە ساياسي ادەپ شەڭبەرىنەن شىعاتىن مالىمدەمەلەرىمەن تانىمال. ءبىراق ماسەلە ونىڭ جەكە ۇستانىمىمەن عانا شەكتەلمەيدى.

مەلانشوننىڭ سولشىل سايلاۋشىلار اراسىنداعى تانىمالدىعى وسى باعىتتاعى ءبىرشاما قالىپتى كوزقاراستاعى ساياسي كۇشتەردىڭ جاعدايىن قيىنداتىپ وتىر. ولار كەي جاعدايدا ونىڭ ىقپالىمەن ساناسىپ، ىمىراعا كەلۋگە ءماجبۇر. اسىرەسە پرەزيدەنت نەمەسە پارلامەنت سايلاۋى قارساڭىندا كۇش بىرىكتىرۋ قاجەتتىگى تۋىنداعاندا بۇل ماسەلە ايقىن سەزىلەدى. ويتكەنى سولشىل پارتيالار مارين لە پەن جەتەكشىلىك ەتەتىن اسىرە وڭشىل «ۇلتتىق بىرلەستىك» قوزعالىسىنا قارسى تۇرۋ ءۇشىن ءوزارا كەلىسىمگە كەلۋى كەرەك.

كەلەسى جىلى وتەتىن پرەزيدەنت سايلاۋىنا مەلانشون دا قاتىسپاق. بولجام بويىنشا، ول سايلاۋشىلاردىڭ 17- 18 پايىزىنىڭ قولداۋىنا يە بولۋى مۇمكىن. ءبىراق مۇنداي ناتيجە ونىڭ ەكىنشى كەزەڭگە وتۋىنە جەتكىلىكسىز. سونىڭ سالدارىنان سولشىل سايلاۋشىلار تاعى دا اسىرە وڭشىلداردىڭ جەڭىسكە جەتۋىنە جول بەرمەۋ ءۇشىن وڭشىل سەنتريستەر ۇسىنعان كانديداتقا داۋىس بەرۋگە ءماجبۇر بولۋى ىقتيمال.

پرەزيدەنت سايلاۋىنىڭ تاعدىرىن كىم شەشەدى

شىن مانىندە، سولشىل كۇشتەر ءۇشىن ءوز قاتارىنان مەلانشونعا قاراعاندا بايىپتىراق، ءبىراق سايلاۋدىڭ ەكىنشى كەزەڭىنە وتە الاتىن ورتاق كانديدات ۇسىنۋ الدەقايدا ءتيىمدى بولار ەدى. مۇنداي جاعدايدا مارين لە پەننىڭ جەڭىسىنە جول بەرمەۋ ءۇشىن وڭشىل سەنتريستەردىڭ ءوزى سولشىل كانديداتقا داۋىس بەرۋگە ءماجبۇر بولار ەدى. سوندىقتان قازىر فرانسياداعى ۇستامدى سولشىل كۇشتەر ورتاق كانديداتتى الدىن الا داۋىس بەرۋ، ياعني پرايمەريز ارقىلى انىقتاۋدى ۇسىنىپ وتىر.

ءبىراق مەلانشون بۇل ۇسىنىسپەن كەلىسپەيدى جانە پرەزيدەنت سايلاۋىنا جەكە قاتىسۋعا نيەتتى. «ۇلتتىق بىرلەستىكتىڭ» تانىمالدىعى ارتىپ كەلە جاتقانىن ەسكەرسەك، مۇنداي شەشىم سايلاۋدىڭ ەكىنشى كەزەڭىنە تاعى دا وسى قوزعالىستىڭ وكىلى مەن وڭشىل سەنتريستەردىڭ كانديداتى شىعاتىن جاعدايعا اكەلۋى مۇمكىن.

دەمەك، شەشۋشى كەزەڭدە مارين لە پەن مەن وڭشىل سەنتريستەردىڭ وكىلى كەزدەسۋى ىقتيمال. سوڭعىسىنىڭ قاتارىندا گاۆر قالاسىنىڭ قازىرگى مەرى، فرانسيانىڭ بۇرىنعى پرەمەر ءمينيسترى ەدۋارد فيليپتىڭ مۇمكىندىگى جوعارى. ويتكەنى ونىڭ سايلاۋشىلار اراسىنداعى كورسەتكىشى وزگە كانديداتتارعا قاراعاندا جوعارى.

مۇنداي جاعدايدا سايلاۋ «ۇلتتىق بىرلەستىك» پەن وعان قارسى بىرىككەن ساياسي كۇشتەردىڭ تارتىسىنا اينالادى. وڭشىل جانە سولشىل سەنتريستەر، اسىرە سولشىلدار، مۇسىلمان قاۋىمداستىعىنىڭ ءبىر بولىگى جانە باسقا دا سايلاۋشىلار لە پەنگە قارسى بىرىگۋى مۇمكىن. باستى ماسەلە - مارين لە پەن وسىنداي كەڭ اۋقىمدى ساياسي وداقتىڭ قارسىلىعىن ەڭسەرە الا ما؟

يمميگرانتتار قاۋىمداستىعى جانە قوعامداعى جاڭا قايشىلىقتار

بۇل جەردە مۇسىلمان قاۋىمداستىعىنىڭ اتالۋىنا ەرەكشە ءمان بەرگەن ءجون. ويتكەنى ولار فرانسياداعى سايلاۋشىلار اراسىندا بارعان سايىن ىقپالدى توپقا اينالىپ كەلەدى. ەلدە شامامەن 6 ميلليون مۇسىلمان تۇرادى. ولاردىڭ اراسىندا فرانسيانىڭ بۇرىنعى سولتۇستىك افريكا وتارلارىنان، سونداي-اق باتىس افريكا ەلدەرىنەن شىققاندار كوپ. بۇعان افريكادان قونىس اۋدارعان حريستيانداردى دا قوسۋعا بولادى. جالپى العاندا، بۇل توپتار ەل حالقىنىڭ شامامەن 8-10 پايىزىن قۇرايدى جانە سايلاۋ ناتيجەسىنە ىقپال ەتە الاتىن ەلەۋلى كۇش سانالادى.

ولاردىڭ باسىم بولىگى «ۇلتتىق بىرلەستىك» پەن مارين لە پەننىڭ ساياسي باعىتىن قولدامايدى. سونىمەن قاتار مۇسىلمان سايلاۋشىلاردىڭ اراسىندا جان- ليۋك مەلانشون جەتەكشىلىك ەتەتىن «باعىنبايتىن فرانسيا» قوزعالىسىن جاقتايتىندار دا از ەمەس. مۇنىڭ وزىندىك سەبەپتەرى بار. مەلانشون كوشى-قوندى، سونىڭ ىشىندە وتباسىلاردى بىرىكتىرۋ ساياساتىن قولدايدى. بۇعان قوسا، ءيزرايلدىڭ، اسىرەسە گازا سەكتورىنداعى ارەكەتتەرىن وتكىر سىناپ كەلەدى.

مۇنداي ۇستانىمى ونىڭ فرانسياداعى مۇسىلمان قاۋىمىنىڭ بەلگىلى ءبىر بولىگىنەن قولداۋ تابۋىنا ىقپال ەتەدى. ونىڭ ۇستىنە ەۋروپاداعى ليبەرالدى كوزقاراستاعى ازاماتتار اراسىندا پالەستينانى قولدايتىن كوڭىل كۇيدىڭ كۇشەيۋى مەلانشونعا جاڭا ساياسي مۇمكىندىك اشىپ وتىر. ول بۇل جاعدايدى الداعى پرەزيدەنت سايلاۋىندا ءوز پايداسىنا جاراتۋعا ۇمتىلاتىنى بايقالادى.

دەگەنمەن ماسەلەنىڭ كۇردەلى تۇسى بار. فرانسيادا بۇرىنعى سولتۇستىك جانە باتىس افريكا وتارلارىنان قونىس اۋدارعان وتباسىلاردىڭ ەكىنشى جانە ءۇشىنشى بۋىنى اراسىندا راديكالدى كوزقاراستاردىڭ، سونىڭ ىشىندە ءدىني سيپاتتاعى ۇستانىمداردىڭ كۇشەيگەنى بايقالادى. سونىمەن بىرگە يمميگرانتتاردىڭ ءبىر بولىگى ءوز قاۋىمداستىعى شوعىرلانعان اۋدانداردا تۇرادى.

نەلىكتەن بيلىككە كوشەدەگى نارازىلىقتى باقىلاۋ قيىن

بۇل ماسەلەنىڭ تاعى ءبىر قىرى مۇسىلمان جانە جالپى يمميگرانتتار قاۋىمداستىقتارىنىڭ ىشكى ۇيىمداسۋ ەرەكشەلىكتەرىمەن بايلانىستى. مۇسىلمان جانە شىعىس قوعامدارىنان شىققان قاۋىمداردىڭ ءبىر بولىگى ەۋروپادا قالىپتاسقان جەكە ادامنىڭ دەربەستىگىنە نەگىزدەلگەن ءومىر سالتىنا تولىق بەيىمدەلە الماي وتىر. سونىڭ سالدارىنان ولار كوبىنە ءوز ورتاسىندا تۇيىقتالىپ، بىرتىندەپ قوعامنان وقشاۋلانعان اۋدانداردا شوعىرلانادى.

اعا بۋىن فرانسياعا قانداي جاعدايدا كەلگەنىن، ونىڭ ىشىندە بۇرىنعى فرانسۋز وتارلارىنداعى ءومىردى جاقسى بىلەدى. ال كەيىنگى ۇرپاقتىڭ بۇرىنعى مەتروپولياعا دەگەن كوزقاراسى مۇلدە باسقا. ولار مەملەكەتتەن ءوز قۇقىقتارى مەن الەۋمەتتىك تالاپتارىنىڭ ورىندالۋىن كۇتەدى. بۇل بەلگىلى ءبىر دارەجەدە فرانسيانىڭ وزىنە ءتان نارازىلىق ءبىلدىرۋ داستۇرىمەن دە ۇندەسەدى.

ءبىراق مۇندا ۇيىمداسۋ دەڭگەيى جاعىنان ەلەۋلى ايىرماشىلىق بار. شىعىس قوعامىنان شىققان قاۋىمداستىقتاردا ءوزارا بايلانىس پەن قاۋىم ىشىندەگى ىنتىماق كۇشتى. سوندىقتان بەلگىلى ءبىر جاعداي تۋىنداعاندا ولار قىسقا ۋاقىت ىشىندە كوپتەگەن جاستى كوشەگە شىعارا الادى. فرانسيادا جاپپاي نارازىلىق باستالسا، مۇنداي توپتاردىڭ وعان قوسىلۋى دا ىقتيمال.

اۆتوردىڭ پايىمداۋىنشا، يمميگرانت جاستاردىڭ ۇيىمداسقان توپتارى مەن فرانسۋزدىڭ راديكالدى سولشىل قوزعالىستارى بىرىككەن جاعدايدا تارتىپسىزدىكتەردىڭ اۋقىمى ۇلعايا تۇسەدى. بۇل جولعى وقيعالاردىڭ بۇرىن-سوڭدى بولماعان دەڭگەيگە جەتۋىنە ءتۇرلى فاكتورلار، سونىڭ ىشىندە ساياسي مۇددەلەر دە اسەر ەتۋى مۇمكىن.

فرانسۋز مەملەكەتىنە مۇنداي تولقۋلاردى توقتاتۋ وڭاي ەمەس. جالپى، ەۋروپانىڭ مەملەكەتتىك ينستيتۋتتارىنا قاۋىمداستىق نەگىزىندە ۇيىمداسقان شىعىس قوعامىمەن جۇمىس ىستەۋ كۇردەلى مىندەت بولىپ وتىر. ءبىر قىزىعى، سولتۇستىك افريكا ەلدەرىنىڭ وزىندە جاستار سانى الدەقايدا كوپ بولعانىمەن، مۇنداي اۋقىمداعى جاپپاي تولقۋلار سيرەك كەزدەسەدى. ەرەكشە مىسال رەتىندە 2011 -جىلعى «اراب كوكتەمىن» اتاۋعا بولادى.

مۇنىڭ سەبەبى اراب ەلدەرىندەگى بيلىكتىڭ قاتاڭدىعىندا عانا ەمەس. ەۋروپا مەملەكەتتەرى شەشىم قابىلداعاندا قوعامدىق پىكىرمەن، اسىرەسە ونىڭ ليبەرالدى بولىگىمەن، سونداي-اق سوت جۇيەسى سياقتى تاۋەلسىز ينستيتۋتتارمەن ساناسۋعا ءتيىس. ال شىعىس قوعامىندا قاۋىمداستىق الەۋمەتتىك ءومىردىڭ نەگىزگى تىرەكتەرىنىڭ ءبىرى سانالادى. سوندىقتان جاستاردىڭ قوعامعا قايشى ارەكەتتەرى ءۇشىن قاۋىم جەتەكشىلەرىنىڭ دە جاۋاپكەرشىلىگى بار.

قاۋىم باسشىلارى مەملەكەتپەن قاتىناس ناشارلاسا، ونىڭ سالدارى وزدەرىنىڭ ەكونوميكالىق مۇددەلەرىنە دە اسەر ەتۋى مۇمكىن ەكەنىن جاقسى تۇسىنەدى. سول سەبەپتى ولار جاستاردىڭ ارەكەتىن بەلگىلى ءبىر دەڭگەيدە باقىلاۋعا مۇددەلى.

ەۋروپادا جاعداي باسقاشا قالىپتاسقان. مۇندا شىعىس قوعامىنان شىققان قاۋىمداستىقتار بولعانىمەن، ولاردىڭ ءبىر بولىگى قوعامنان وقشاۋلانعان اۋدانداردا ءومىر سۇرەدى. شىعىس ەلدەرىندە قاۋىم جەتەكشىلەرى ەكونوميكا مەن ساياساتقا تىكەلەي ارالاسسا، ەۋروپادا مۇنداي بايلانىس الدەقايدا ءالسىز.

ونىڭ ۇستىنە مۇسىلمان قاۋىمداستىقتارىنىڭ تابىسقا جەتكەن وكىلدەرى كوبىنە ءوز ورتاسىنان الىستاپ، ەۋروپالىق قوعامعا ءسىڭىسىپ كەتەدى. ءبىراق قاۋىمداستىق رەتىندە بىرىگۋگە دەگەن ۇمتىلىس ساقتالادى. سونىڭ ناتيجەسىندە پايدا بولعان بوس كەڭىستىكتى ءتۇرلى ءدىني ۇيىمدار نەمەسە جاستار توپتارى تولتىرا باستايدى.

سوندىقتان فرانسياداعى قازىرگى نارازىلىقتاردى 1968 -جىلعى ستۋدەنتتەر تولقۋىمەن تولىق سالىستىرۋعا بولمايدى. ول كەزدە نارازىلىقتىڭ نەگىزىندە سولشىل ليبەرالدى يدەولوگيا جاتتى. بۇگىندە دە فرانسيادا بۇل ساياسي ءداستۇردىڭ ىقپالى كۇشتى. قوعامنىڭ الەۋمەتتىك ساياساتتى كەڭەيتۋدى تالاپ ەتىپ، كوشەگە شىعۋعا دايىندىعى دا ساقتالعان.

ءبىراق قازىرگى نارازىلىقتارعا جاڭا سيپات بەرەتىن تاعى ءبىر فاكتور بار. ول - يمميگرانتتار قاۋىمداستىعىنان شىققان جاستاردىڭ ءبىر بولىگى كىرەتىن ۇيىمداسقان راديكالدى توپتاردىڭ بەلسەندىلىگى.

بيۋدجەت تاپشىلىعى جانە الەۋمەتتىك ۋادەلەردىڭ قۇنى

مەلانشوننىڭ وسى توپتاردىڭ قولداۋىنا سۇيەنۋگە تىرىساتىنىن ەسكەرسەك، ولاردىڭ ءبىر بولىگىنىڭ ءوزىن «باعىنبايتىن فرانسيا» قوزعالىسىمەن بايلانىستىرۋى تۇسىنىكتى. پرەمەر- مينيستر لەكورنيۋدىڭ تارتىپسىزدىكتەرگە وسى پارتيامەن بايلانىسى بولۋى مۇمكىن راديكالدى سولشىل كۇشتەردىڭ قاتىسى بار ەكەنىن ايتۋىنا دا وسى جاعداي نەگىز بولعان.

ءبىراق بۇل مەلانشوننىڭ نارازىلىقتاردى ۇيىمداستىرۋعا مۇددەلى بولعانىن بىلدىرمەيدى. ول شەرۋشىلەردى قولدادى، دەگەنمەن تارتىپسىزدىكتەردى تىكەلەي ۇيىمداستىردى دەۋگە نەگىز از. ونىڭ ۇستىنە مۇنداي ارەكەت الداعى سايلاۋدا وزىنە ءتيىمسىز بولۋى مۇمكىن. ويتكەنى 17-قازانداعى وقيعالار «ۇلتتىق بىرلەستىكتىڭ» تانىمالدىعىن ارتتىرۋى ابدەن ىقتيمال.

سونىمەن بىرگە مەلانشون مەن راديكالدى توپتاردىڭ اراسىنداعى بايلانىستى العا تارتۋدىڭ استارىندا ساياسي ەسەپ تە جاتۋى مۇمكىن. ويتكەنى مەلانشوننىڭ بەدەلى تومەندەسە، ونىڭ پرەزيدەنت سايلاۋىنىڭ ەكىنشى كەزەڭىنە شىعۋ مۇمكىندىگى دە ازايادى.

قازىرگى بيلىكتەگى وڭشىل سەنتريستەر ءۇشىن ەكىنشى كەزەڭگە گاۆر قالاسىنىڭ مەرى ەدۋارد فيليپتىڭ وتكەنى ءتيىمدى. مۇنداي جاعدايدا سولشىل جانە اسىرە سولشىل كۇشتەردىڭ جاقتاستارى مارين لە پەننىڭ جەڭىسىنە جول بەرمەۋ ءۇشىن فيليپكە داۋىس بەرۋگە ءماجبۇر بولادى.

جالپى، فرانسيا ساياساتى كۇردەلى كەزەڭگە اياق باستى. ساياسي ورتالىقتىڭ ارەكەت ەتۋ مۇمكىندىگى بارعان سايىن تارىلىپ كەلەدى. ءبىر جاعىنان اسىرە سولشىلدار، ەكىنشى جاعىنان اسىرە وڭشىلدار سەنتريستىك كۇشتەرگە قىسىمدى كۇشەيتىپ وتىر. مۇنداي جاعدايدا ەل الدىنداعى كۇردەلى ماسەلەلەردى شەشۋ قيىنداي تۇسەدى.

سونىڭ ءبىرى - بيۋدجەت تاپشىلىعىن قىسقارتۋ. قازىر فرانسيانىڭ بيۋدجەت تاپشىلىعى جالپى ىشكى ءونىمنىڭ 5,1 پايىزىنا جەتكەن. بۇل ەۋروپالىق وداق بەلگىلەگەن 3 پايىزدىق شەكتەن ەداۋىر جوعارى.

نارازىلىقتار قارساڭىندا، 16-قازاندا فرانسيا بانكىنىڭ باسشىسى ەممانيۋەل مۋلەن 2029 -جىلعا قاراي بيۋدجەت تاپشىلىعىن ج ءى ءو-نىڭ 3 پايىزىنا دەيىن تومەندەتۋگە بولاتىنىن مالىمدەدى. ءبىراق بۇل ماقساتقا جەتۋ ءۇشىن مەملەكەتتىك شىعىنداردى قىسقارتۋ قاجەت. ال مۇنداي قادام فرانسۋز قوعامىنىڭ كوڭىلىنەن شىقپايتىنى انىق.

سەباستيان لەكورنيۋ ۇكىمەتى 2027 -جىلعى بيۋدجەتتە شىعىنداردى 54 ميلليارد ەۋروعا قىسقارتۋدى جوسپارلاعان. مۇنداي شارالاردىڭ قوعام تاراپىنان قولداۋ تابۋى قيىن.

وسى جاعدايدا 17-قازانداعى تولقۋلار مەن بۇرىن-سوڭدى بولماعان قيراتۋلاردىڭ سالدارى ءارتۇرلى بولۋى مۇمكىن. ءبىر جاعىنان، بيلىك قوعام تالابىنا كونىپ، مەملەكەتتىك شىعىنداردى قىسقارتۋدان باس تارتۋى ىقتيمال. ءبىراق ەلدىڭ قارىزعا قاتىستى جاعدايى وتە كۇردەلى. سوندىقتان مۇنداي ساياساتتى قانشا ۋاقىت جالعاستىرۋعا بولاتىنى بەلگىسىز.

قازىر فرانسيانىڭ مەملەكەتتىك قارىزى 3,595 تريلليون ەۋروعا جەتكەن. بۇل ەۋروپالىق وداق ەلدەرىنىڭ جالپى 15,7 تريلليون ەۋرولىق قارىزىنىڭ شامامەن 23 پايىزىنا تەڭ.

ەكىنشى جاعىنان، جاپپاي تارتىپسىزدىكتەر قوعامعا ۇلكەن اسەر ەتىپ، ەلدە قوعامدىق ءتارتىپتى كۇشەيتۋدى جانە مەملەكەتتىك قارجىنى قاتاڭ باقىلاۋعا الۋدى تالاپ ەتەتىن ساياسي كۇشتەردىڭ بەدەلىن ارتتىرۋى مۇمكىن.

قالاي بولعاندا دا، فرانسيانى الدا كۇردەلى كەزەڭ كۇتىپ تۇر. ەندى فرانسيا بيلىگىنە ەلدەگى تۇراقتىلىقتى ساقتاي وتىرىپ، حالىقتىڭ الەۋمەتتىك تالاپتارىن ورىنداۋ مەن بيۋدجەت شىعىندارىن قىسقارتۋدىڭ جولىن تابۋ وڭايعا سوقپايدى

اۆتور

نازەركە سۇيىندىك