گرانت، شاكىرتاقى، قوس ديپلوم: ەلىمىزدە شەتەل ۋنيۆەرسيتەتتەرى نە ءۇشىن اشىلىپ جاتىر
استانا. KAZINFORM - عىلىم جانە جوعارى ءبىلىم مينيسترلىگىنىڭ حابارلاۋىنشا، قازاقستاندا الەمنىڭ ۇزدىك ۋنيۆەرسيتەتتەرىنىڭ فيليالىن اشۋ ءبىرىنشى كەزەكتە وتاندىق جوعارى وقۋ ورىندارىن ترانسفورماتسيالاۋعا، جوعارى ءبىلىمنىڭ ساپاسىن كوتەرۋگە باعىتتالعان. سايكەسىنشە قازاقستاندىق ج و و- لاردىڭ باسەكەگە قابىلەتتىلىگىن ارتتىراتىن ناتيجە كۇتىلەدى.
«ەلىمىزدە شەتەلدىك ج و و- لاردىڭ فيليالدارىن اشۋداعى ماقسات -قازاقستاندىق جوعارى ءبىلىم نارىعىن جانداندىرىپ، ۋنيۆەرسيتەتتەر اراسىنداعى باسەكەلەستىكتى كۇشەيتۋ جانە جوعارى ءبىلىم ساپاسىن ارتتىرۋ. قازاقستاندا جوعارى ءبىلىم سالاسىن الەمدىك دەڭگەيگە شىعارۋ جولىندا 2018 -جىلى جوعارى وقۋ ورىندارىنا كەڭەيتىلگەن دەربەستىك بەرىلدى. جوعارى ءبىلىم سالاسىن ۇزدىك الەمدىك تاجىريبەلەرگە سۇيەنە وتىرىپ دامىتۋ جولىنداعى كەلەسى ماڭىزدى قادام 2022 -جىلى عىلىم جانە جوعارى ءبىلىم مينيسترلىگىن قۇرۋ بولدى. وسى رەتتە جاڭا مينيسترلىكتە جوعارى وقۋ ورىندارىن ينتەرناتسيونالداندىرۋ مىندەتى جۇكتەلگەن ارنايى باسقارما قۇرىلدى»، - دەپ جاۋاپ بەردى جاننا ەسىنبايەۆا اگەنتتىك جولداعان ساۋالعا جاۋاپ بەرە وتىرىپ.
ونىڭ ايتۋىنشا، سول مىندەتتىڭ ءبىرى ەلىمىزدە ۇزدىك شەتەلدىك ۋنيۆەرسيتەتتەردىڭ فيليالدارىن اشۋ.
«فيليالداردا ءبىرىنشى كەزەكتە ەلىمىزدىڭ ەڭبەك نارىعىنداعى تاپشى ماماندىقتار وقىتىلادى. ماسەلەن، بيزنەس دەرەكتەرىنىڭ ساراپتاماسى، IT، AI، data science، كوسموفيزيكا، مۇناي جانە گاز تەحنولوگيالارى، بيوتەحنولوگيا، ەلەكتروتەحنيكا جانە ەنەرگەتيكا، مەحاترونيكا، قوناق ءۇي-مەيرامحانا بيزنەسى، لوگيستيكا، حيميالىق تەحنولوگيالار، سۋ شارۋاشىلىعى جانە مەليوراتسيا، وندىرىستىك اۆتوماتتاندىرۋ جانە روبوتوتەحنيكا، اۋدارما ءىسى تاعى سول سياقتى. باسقاشا ايتقاندا، فيليال اشىلاردا وڭىرلەردىڭ كادر ماسەلەسىندەگى ناقتى سۇرانىستارىنا باسىمدىق بەرىلەدى»، - دەيدى ول.
فيليالدارداعى وقۋ باعدارلامالارى كوپ جاعدايدا شەتەلدىك ۋنيۆەرسيتەتتەردىڭ وقۋ باعدارلامالارى نەگىزىندە دايىندالاتىندىقتان، ستۋدەنتتەردى قابىلداۋ تالاپتارىن وزدەرى بەلگىلەيدى.
فيليالداردا وقيتىن ستۋدەنتتەرگە بەرىلەتىن مەملەكەتتىك وقۋ گرانتتارىنىڭ سانى مەن ءتارتىبى رەسپۋبليكالىق بيۋدجەتتەن قارجىلاندىرىلاتىن جوعارى نەمەسە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا 2024 – 2025، 2025 – 2026، 2026 - 2027 وقۋ جىلدارىنا ارنالعان مەملەكەتتىك ءبىلىم بەرۋ تاپسىرىسىن بەكىتۋ تۋرالى قازاقستان رەسپۋبليكاسى عىلىم جانە جوعارى ءبىلىم ءمينيسترىنىڭ 2024 -جىلعى 18-ناۋرىزداعى №118 بۇيرىعى نەگىزىندە بەلگىلەنەدى.
وسى جاز بويى مينيسترلىكتىڭ جانە شەتەلدىك ۋنيۆەرسيتەت وكىلدەرىنەن قۇرالعان توپ وڭىرلەردى ارالاپ، مەكتەپ تۇلەكتەرىنە ەگجەي-تەگجەي اقپارات تاراتقان.
«ەلىمىزدەگى شەتەلدىك ۋنيۆەرسيتەتتەردىڭ فيليالدارىن ءتامامداعان تۇلەكتەرگە قوس ديپلوم (ءبىرى قازاقستاندىق ج و و- نىڭ ۇلگىسىندە، ەكىنشىسى فيليال اشقان شەتەلدىك ۋنيۆەرسيتەتتىڭ ۇلگىسىندە) بەرىلەدى. دەگەنمەن وقۋ باعدارلاماسىنىڭ ەرەكشەلىكتەرىنە قاراي كەي جاعدايلاردا ەكى ۋنيۆەرسيتەتتىڭ رەكتورلارىنىڭ قولدارى مەن مورلەرى باسىلعان ورتاق ديپلوم بەرىلەدى. ديپلوم حالىقارالىق دەڭگەيدەگى قۇجات بولىپ سانالادى»، - دەيدى ج. ەسىنبايەۆا.
مينيسترلىكتىڭ مالىمەتىنشە، شەتەلدىك ج و و فيليالىنا تۇسكەن گرانت يەلەرىنە ستيپەنديا تولەنەدى جانە شەتەلدىك ج و و فيليالدارىنىڭ دەنى قازاقستاندىق ج و و بازاسىندا اشىلادى.
«جاتاقحانا ماسەلەسى قازاقستاندىق ج و و جاتاقحانالارى ەسەبىنەن شەشىلەدى. كەي جاعدايلاردا لابوراتوريالار شەتەلدىك سەرىكتەس ەسەبىنەن قۇرىلۋدا، ماسەلەن، سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى نەگىزىندە اشىلعان لۋ بان شەبەرحاناسى قىتايلىق سەرىكتەس تاراپىنان 8 ميلليون يۋان قۇرايتىن سوماعا قاجەتتى قۇرال-جابدىقپەن جابدىقتالىپ، كادرلارى دايارلاندى. جوعارىدا اتالعانداي، فيليالداردىڭ باسىم بولىگى قازاقستاندىق ج و و- نىڭ نەگىزىندە قۇرىلۋدا. قاراپايىم تىلمەن ايتقاندا، فيليالدار ەكى ۋنيۆەرسيتەتتىڭ بىرلەسىپ قۇرۋىمەن اشىلادى. سوندىقتان، قازاقستاندىق سەرىكتەستەر فيليالعا قاجەتتى عيمارات، ءوز ۋنيۆەرسيتەتىنىڭ كەيبىر تەحنيكالىق مۇمكىندىكتەرىن ۇسىنادى. ال شەتەلدىك ۋنيۆەرسيتەت، ءوز كەزەگىندە، وقۋ باعدارلاماسىن ەنگىزىپ، ءوز وقىتۋشىلارىن الىپ كەلەدى»، - دەيدى عىلىم جانە جوعارى ءبىلىم مينيسترلىگىنىڭ وكىلى.
ايتا كەتەيىك، ەلىمىزدەگى شەتەل ۋنيۆەرسيتەتىن ءتامامداعان تۇلەكتەر قازاقستاندا جۇمىس ىستەۋگە مىندەتتەلەدى.
بۇعان دەيىن ەلىمىزدە اشىلىپ جاتقان شەتەل ۋنيۆەرسيتەتى فيليالدارىندا «قازاق ءتىلى» جانە «قازاقستان تاريحى» ءپانىن وقىتۋ مىندەتتەلەتىنى تۋرالى حابارلاعان ەدىك.
