راحمان قاينارىنا اپاراتىن جول ەكى ساعاتقا قىسقاردى

ۇزىندىعى 13 شاقىرىم جاڭارتىلعان ۋچاسكەدە كولىك قوزعالىسى اشىلدى.

بۇل جوبا شىعىس قازاقستانداعى باستى تۋريستىك باعىتتاردىڭ ءبىرىن كەزەڭ-كەزەڭىمەن جاڭعىرتۋ جۇمىسىنىڭ ءبىر بولىگى. وسكەمەننەن راحمان قاينارىنا دەيىنگى اۆتوجولدىڭ جالپى ۇزىندىعى شامامەن 450 شاقىرىم. جۇرگىزىلگەن جوندەۋدىڭ ناتيجەسىندە ساپار ءقاۋىپسىز ءارى قولايلى بولا ءتۇستى، ال جول ءجۇرۋ ۋاقىتى شامامەن ەكى ساعاتقا قىسقاردى.

بۇل باعىت كاتونقاراعاي اۋدانى مەن ءوڭىر ءتۋريزمىنىڭ وركەندەۋى ءۇشىن ايرىقشا ماڭىزعا يە. اۆتوجول راحمان قاينارىنا، كاتونقاراعاي ۇلتتىق پاركىنە جانە التايدىڭ وزگە دە تابيعي كورىكتى جەرلەرىنە اپارادى. جول جاعدايىنىڭ جاقسارۋى تۋريستەر سانىن ارتتىرۋعا، شاعىن جانە ورتا بيزنەستىڭ، جول بويىنداعى سەرۆيستىڭ جانە تۋريستىك ينفراقۇرىلىمنىڭ وركەندەۋىنە جاڭا مۇمكىندىك بەرەدى.

جولدىڭ رەسمي اشىلۋىنا «قازاۆتوجول» ۇ ك» ا ق باسقارما ءتوراعاسى دارحان يماناشيەۆ، شىعىس قازاقستان وبلىسىنىڭ اكىمى نۇرىمبەت ساقتاعانوۆ، جول سالاسىنىڭ وكىلدەرى جانە جەرگىلىكتى تۇرعىندار قاتىستى.

- كاتونقاراعاي ءۇشىن ساپالى جول - ءتۋريزمنىڭ، ءوڭىر ەكونوميكاسىنىڭ جانە جەرگىلىكتى حالىقتىڭ تۇرمىس ساپاسىنىڭ ماڭىزدى نەگىزى. بۇگىنگى ماسەلە جەكەلەگەن شاقىرىمداردى جوندەۋمەن عانا شەكتەلمەيدى. ءبىز وسكەمەننەن راحمان قاينارلارىنا دەيىن قاۋىپسىز ءارى قولايلى جول قالىپتاستىرىپ كەلەمىز. اتقارىلعان جۇمىستار ساپار ۋاقىتىن شامامەن ەكى ساعاتقا قىسقارتۋعا مۇمكىندىك بەردى. كەلەسى ماڭىزدى كەزەڭ - وسينوۆ اسۋىنداعى نىساندى اياقتاۋ. ونى بيىل قازان ايىنىڭ سوڭىندا اشۋدى جوسپارلاپ وتىرمىز. بۇل جوبالار كاتونقاراعايعا قاتىناستى ەداۋىر جاقسارتىپ، ءوڭىردىڭ دامۋىنا جاڭا مۇمكىندىك بەرەدى، - دەدى «قازاۆتوجول» ۇ ك» ا ق باسقارما ءتوراعاسى دارحان يماناشيەۆ.

437-450 شاقىرىم ارالىعىنداعى ورتاشا جوندەۋ 2025-جىلى باستالىپ، 2026-جىلى اياقتالدى. 13 شاقىرىم بويىندا جولدىڭ بويلىق جانە كولدەنەڭ ءپىشىنى تۇزەتىلىپ، قارا قيىرشىقتاس قاباتى مەن جول جامىلعىسىنىڭ ۇستىڭگى قاباتى توسەلدى.

جوبا اياسىندا 17 سۋ وتكىزۋ قۇبىرى مەن ءۇش سۋ وتكىزۋ ناۋاسى سالىندى. سونداي-اق سۋ بۇرۋ ارنالارى جاسالىپ، جولدى جابدىقتاۋ جۇمىستارى اتقارىلدى.

نىسانعا 65 مامان مەن 36 عا جۋىق جول-قۇرىلىس تەحنيكاسى جۇمىلدىرىلدى.

بيىل «وسكەمەن - التاي - ۇلكەن نارىن - كاتونقاراعاي - راحمان قاينارى» اۆتوجولىنىڭ بىرنەشە بولىگىندە جوندەۋ جۇرگىزىلۋدە. جولدى كەزەڭ-كەزەڭىمەن جاڭارتۋ قوزعالىس قاۋىپسىزدىگىن ارتتىرىپ، شىعىس قازاقستانداعى ماڭىزدى تۋريستىك ايماققا قاتىناستى جاقسارتۋعا باعىتتالعان.

بۇل باعىتتىڭ دامۋىنا وسينوۆ اسۋىن اينالىپ وتەتىن جاڭا جولدىڭ اياقتالۋى دا سەرپىن بەرەدى. قازىر نىسانداعى كوپىر قۇرىلىسىنىڭ سوڭعى جۇمىستارى جۇرگىزىلۋدە. كولىك قوزعالىسىن 2026-جىلعى قازان ايىنىڭ سوڭىندا اشۋ جوسپارلانعان.

جاڭا جول كۇردەلى تاۋلى بولىكتى اينالىپ وتۋگە مۇمكىندىك بەرىپ، كولىك قاتىناسىنىڭ سەنىمدىلىگىن ارتتىرادى. مۇنىڭ اسىرەسە قىس مەزگىلىندە ماڭىزى زور. ويتكەنى وسينوۆ اسۋىندا قالىڭ قار، كوكتايعاق جانە قولايسىز اۋا رايى قوزعالىستى ءجيى قيىنداتادى. جاڭا نىسان ىسكە قوسىلعاننان كەيىن جۇرگىزۋشىلەر ءۇشىن قاۋىپسىز ءارى تۇراقتى قوزعالىس قامتاماسىز ەتىلەدى.

وسىلايشا، وبلىس ورتالىعىنان شىعىس قازاقستاننىڭ باستى تۋريستىك ايماقتارىنىڭ بىرىنە دەيىنگى ساپالى ءارى قاۋىپسىز اۆتوجول كەزەڭ-كەزەڭىمەن قالىپتاسىپ كەلەدى.

راحمان قاينارىنا اپاراتىن جولدىڭ جاڭارۋى جانە وسينوۆ اسۋىنداعى جاڭا نىساننىڭ اياقتالۋى كاتونقاراعاي ءتۋريزمىنىڭ دامۋىنا، تۋريستەر اعىنىنىڭ ارتۋىنا جانە شىعىس قازاقستانداعى كولىك قاتىناسىنىڭ جاقسارۋىنا بەرىك ينفراقۇرىلىمدىق نەگىز قالايدى.

ايتا كەتەيىك، بۇعان دەيىن وسينوۆ اسۋىن اينالىپ وتەتىن ۇزىندىعى 12 شاقىرىمعا جۋىق جاڭا جولدىڭ قۇرىلىسى اياقتالۋعا تاياعانى حابارلانعان. جاڭا باعىت قازىرگى جولدى قىسقارتىپ، اسىرەسە قىس مەزگىلىندە كاتونقاراعايعا قاتىناستى قاۋىپسىز ەتۋگە مۇمكىندىك بەرەدى.