پراگادا وتكەن ديماشتىڭ كونسەرتىندە 9 جاسار قىز تىڭدارمانداردى ءتانتى قىلدى
پراگا. KAZINFORM - پراگادا ديماش قۇدايبەرگەننىڭ جەكە كونسەرتى ءوتتى. قازاقستاندىق ونەرپاز چەحيا استاناسىندا ەكىنشى رەت شوۋ جاسادى.
العاشقى رەت «ارناۋ» گاسترولى اياسىنداعى كونسەرتى 2022-جىلى وتسە، ەكى جىلدان كەيىن «Stranger» اتتى جاڭا باعدارلاماسى Sportovnي hala FORTUNA ارەناسىندا ونەرپازدىڭ جانكۇيەرلەرىن قايتادان جينادى. بۇل تۋرالى DimashNews سايتى جازدى.
كونسەرتتى Perfect Production ۇيىمداستىردى. DimashNews رەداكتورلارى كومپانيا ماماندارىنان 2022 جانە وسى جىلعى بولعان كونسەرتتەر اراسىنداعى كوزگە انىق بايقالعان ايىرماشىلىقتار تۋرالى سۇرادى.
كونسەرت ۇيىمداستىرۋشىلارى ەكى جىل بۇرىن دا دايىندىققا قاتىسقاندارىن ايتتى. بيىلعى جىلى كومپانيا ءارتىستىڭ ەۋروپاداعى ەكى كونسەرتىنىڭ رەسمي ۇيىمداستىرۋشىسى رەتىندە ءارتىستىڭ وزىمەن جانە «DimashAli» شىعارماشىلىق ورتالىعىنىڭ جەتەكشىسى قانات ايتبايەۆپەن تىعىز جۇمىس جاساپ جاتىر.
«ديماشتىڭ كونسەرتتەرى قاراپايىم كونتسەرتتەردىڭ قاتارىنان ەمەس. كونسەرت قىزىقتى دا كۇردەلى شوۋلاردان تۇرادى. تەحنيكالىق قولداۋعا ناعىز شوۋ جاساۋ ءۇشىن كوپتەگەن جارىق جانە دىبىستىق جابدىقتار، led-ەكراندار، جاندى مۋزىكانتتار مەن بالەت تە بار. مۇمكىن بۇل مەنىڭ تاجىريبەمدەگى ەڭ كۇردەلى جوبا شىعار»، - دەپ Perfect Production ديرەكتورى يان لاريونوۆ ءوز پىكىرىمەن ءبولىستى.
يان، سونىمەن قاتار، Dears قاۋىمداستىعىمەن تانىستىعى تۋرالى:
«ءبىر ەرەكشەلىگى، كونسەرتكە ءانشىنىڭ ۇيىمشىل جانكۇيەرلەرى الەمنىڭ تۇكپىر-تۇكپىرىنەن جينالادى. كونسەرت قارساڭىندا قولداۋ كورسەتۋگە كەلگەن ءانشىنىڭ جانكۇيەرلەرىنە ەرەكشە توقتالعىم كەلىپ وتىر. ولاردىڭ قاتارىندا، ءتىپتى، اۆستراليا مەن لاتىن امەريكاسىنان دا كەلگەن وكىلدەر بار سياقتى كورىندى. كونسەرت الدىندا كوشەدە جينالعان جانكۇيەرلەرگە قاراپ، مەن، ءتىپتى، وليمپيادا ويىندارىنىڭ اشىلۋىنا تاپ بولعانداي بولدىم. ءار فان-كلۋبتىڭ ءوز كەرەك-جاراقتارى، ءوز كوستيۋمدەرى مەن ءتۇرلى-ءتۇستى جارىق گاممالارى بار. ءبارى جان-جاقتى ۇيىمداستىرىلىپ، دايىندالعان»، - دەپ ءوز ويىمەن ءبولىستى.
2024-جىلدىڭ قىركۇيەگىندە استانادا وتكەن كونسەرتتىك-شوۋ باعدارلاماسى ديماشتىڭ ورىنداۋىنداعى قازاقستان رەسپۋبليكاسىنىڭ انۇرانىمەن اشىلعان بولاتىن. سول ۇردىسپەن بۇل كەشتە دە ول ءانۇران شىرقادى، ءبىراق قابىلداۋشى ەلدىڭ چەحيانىڭ ءانۇرانىنان باستادى.
كونسەرت بارلىق جاعىنان جاقىنداستىردى. ءان اراسىنداعى ۇزىلىستەردە ديماش كورەرمەندەرمەن اعىلشىن، فرانسۋز، قازاق، ورىس تىلدەرىندە وي ءبولىسىپ، قىتاي تىلىندەگى اندەرىنىڭ سول تىلدە دۇرىس ايتىلۋ ناقىشىن تەكسەرە وتىرىپ، جانكۇيەرلەرىن بىرگە قوسىلىپ ءان ايتۋعا شاقىردى.
كونسەرت بارىسىندا ديماش 9 جاسار سوفيا ەسىمدى مۋزىكامەن اينالىسىپ جۇرگەن قىزدى ساحناعا شاقىردى. جاس ۆوكاليست ەش قينالماستان ۇلكەن ساحنادان ۋيتني حيۋستون ءانىنىڭ ءۇزىندىسىن ورىنداپ، كورەرمەننىڭ قوشەمەتىنە بولەنىپ، ديماشتىڭ وزىنەن گۇل شوعىن الدى.
ەسكە سالا كەتەيىك، بۇعان دەيىن ماجارستاننىڭ پرەمەر-ءمينيسترى ديماش تۋرالى پوست جازعان بولاتىن.
