مۇرا ءبولىسۋ تارتىبىنە وزگەرىس ەنگىزۋ كەرەك - ساراپشى

استانا. KAZINFORM - قازاقستاندا جاڭا ازاماتتىق كودەكستى ازىرلەۋ بارىسىندا مۇراگەرلىك قۇقىققا قاتىستى نورمالاردى جەتىلدىرۋ ۇسىنىلدى.

а
Коллаж: Kazinform/ Nano Banana

بۇل تۋرالى ق ر زاڭناما جانە قۇقىقتىق اقپارات ينستيتۋتى كونستيتۋتسيالىق زاڭناما جانە مەملەكەتتىك باسقارۋ ءبولىمىنىڭ باس عىلىمي قىزمەتكەرى، زاڭ عىلىمدارىنىڭ دوكتورى ەرمەك ابدراسۋلوۆ مالىمدەدى.

زاڭگەر مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىندا جاريالانعان جاڭا ازاماتتىق كودەكستى ازىرلەۋ باستاماسىن قولدايتىنىن ءبىلدىردى.

ونىڭ پىكىرىنشە، ازاماتتىق زاڭنامانى جاڭارتۋ مۇراگەرلىك قۇقىقتىق قاتىناستار سالاسىن دا قامتۋى كەرەك. بۇل رەتتە مۇرا قالدىرۋشىنىڭ ەركى مەن مۇراگەرلەردىڭ زاڭدى مۇددەلەرى اراسىنداعى ءادىل تەڭگەرىمدى قامتاماسىز ەتۋ ماڭىزدى.

ەرمەك ابدراسۋلوۆ مۇراگەرلىك قۇقىقتىڭ نەگىزگى قاعيداتتارىنىڭ ءبىرى وسيەت قالدىرۋ بوستاندىعى ەكەنىن اتاپ ءوتتى. ياعني مەنشىك يەسى وزىنە تيەسىلى مۇلىكتىڭ قايتىس بولعاننان كەيىنگى تاعدىرىن دەربەس ايقىنداۋعا قۇقىلى. الايدا بۇل قۇقىقتى جۇزەگە اسىرۋ كەزىندە مۇراگەرلەردىڭ جەكەلەگەن ساناتتارىن قورعاۋدىڭ زاڭنامالىق كەپىلدىكتەرى، سونىڭ ىشىندە مۇراداعى مىندەتتى ۇلەسكە قۇقىق ەسكەرىلۋگە ءتيىس.

- مۇرا قالدىرۋشىنىڭ جەكە مۇلكى مەن ەرلى-زايىپتىلاردىڭ ورتاق مۇلكىن اجىراتۋ ماسەلەسى دە ەرەكشە نازار اۋدارۋدى قاجەت ەتەدى. مۇرانىڭ قۇرامىن ايقىنداۋ كەزىندە وسى تالاپتىڭ ساقتالماۋى ءتىرى قالعان جۇبايدىڭ جانە وزگە دە مۇراگەرلەردىڭ مۇلىكتىك قۇقىقتارىنىڭ بۇزىلۋىنا اكەلۋى مۇمكىن، - دەدى زاڭگەر.

ونىڭ ايتۋىنشا، جاڭا ازاماتتىق كودەكستى ازىرلەۋ كەزىندە ءبىرقاتار ماسەلەنى ناقتى ءارى جۇيەلى رەتتەۋ قاجەت. اتاپ ايتقاندا، مۇرانىڭ قۇرامىن ايقىنداۋ، مۇراداعى مىندەتتى ۇلەسكە قۇقىقتى ىسكە اسىرۋ، ەرلى- زايىپتىلاردىڭ مۇلىكتىك قۇقىقتارىن قورعاۋ، مۇرانى ءىس جۇزىندە قابىلداۋ جانە مۇراگەرلىك داۋلار كەزىندە ازاماتتاردىڭ قۇقىقتارى مەن زاڭدى مۇددەلەرىن قورعاۋ تەتىكتەرىن جەتىلدىرۋ ۇسىنىلىپ وتىر.

- بۇل سالاداعى زاڭنامانىڭ مىندەتى - مەنشىك يەسىنىڭ ءوز مۇلكىنە بيلىك ەتۋ ەركىندىگىن شەكتەۋ ەمەس، ونىڭ شىنايى ەركىن ەسكەرە وتىرىپ، وزگە دە مۇددەلى تۇلعالاردىڭ قۇقىقتارىنىڭ ساقتالۋىن قامتاماسىز ەتەتىن ءتيىمدى قۇقىقتىق تەتىكتەردى قالىپتاستىرۋ. مۇراگەرلىك قۇقىقتى جەتىلدىرۋ — ازاماتتاردىڭ مۇلىكتىك قۇقىقتارىن قورعاۋدىڭ، وتباسىلىق داۋلاردىڭ الدىن الۋدىڭ جانە قۇقىقتىق ايقىندىقتى قامتاماسىز ەتۋدىڭ ماڭىزدى شارتى، - دەپ تۇيىندەدى ەرمەك ابدراسۋلوۆ.

ايتا كەتەيىك، بۇعان دەيىن زاڭگەر اقتورە ورازايەۆا جاڭا ازاماتتىق كودەكستە مۇراگەرلىككە قاتىستى داۋلى ماسەلەلەردى ناقتى رەتتەۋ قاجەتتىگىن ايتقان ەدى. ونىڭ پىكىرىنشە، مۇرانى قابىلداۋ كەزىندە مارقۇمنىڭ قارىزى مەن مۇراگەرلەردىڭ جاۋاپكەرشىلىگى دە ەسكەرىلۋى ءتيىس.