ەر-رياد اۋەجايىنا تاعى شابۋىل جاسالدى: ونداعان ادام جاراقات الدى

الدىن الا مالىمەت بويىنشا، شابۋىلعا يەمەندەگى حۋسيتتەر قوزعالىسىنىڭ قاتىسى بولۋى مۇمكىن.

Euronews باسىلىمىنىڭ ساۋد ارابياسى استاناسىنداعى اۋرۋحانالاردىڭ بىرىندەگى دەرەككوزى شابۋىل سالدارىنان ونداعان ادامنىڭ جاراقات العانىن حابارلادى.

- ونداعان ادام جاراقات الدى. ولاردىڭ باسىم بولىگى ساۋد ارابياسىنىڭ ازاماتتارى. كەمىندە بەس ادام جانساقتاۋ بولىمىندە جاتىر، - دەدى باسىلىمنىڭ دەرەككوزى.

بۇل وقيعا حۋسيتتەر جاۋاپكەرشىلىكتى ءوز موينىنا العان ەر-رياد اۋەجايىنا جاسالعان الدىڭعى شابۋىلداردان ەكى كۇن وتكەن سوڭ تىركەلدى. سول كەزدە ءۇش ادام قازا تاپقان بولاتىن.

ساۋد ارابياسىنىڭ بيلىگى ازىرگە جاڭا شابۋىل بولعانىن رەسمي تۇردە راستاعان جوق. الايدا بىرنەشە كۋاگەر سەنبى كۇنى كورول حاليد اتىنداعى حالىقارالىق اۋەجايدان ادامداردىڭ ەۆاكۋاتسيالانعانىن حابارلادى.

اۋەجاي اكىمشىلىگى جولاۋشىلارعا رەيستەرىنىڭ مارتەبەسىن الدىن الا تەكسەرۋگە كەڭەس بەرگەن.

كۋاگەرلەردىڭ ءبىرى ۇشاققا وتىرۋدى كۇتىپ تۇرعان كەزدە جارىلىس داۋىسىن ەستىگەنىن ايتسا، ەكىنشىسى جارىلىستى ءوز كوزىمەن كورگەنىن جانە ادامداردىڭ جاراقات العانىن جەتكىزدى.

- مەن ىشكى رەيستەر تەرمينالىنداعى 403-شىعۋ قاقپاسىنىڭ جانىندا تۇردىم. 401-شىعۋ قاقپاسىنا سوققى جاسالعانىن ءوز كوزىممەن كوردىم. ءدال الدىمدا جارالانعان ادامدار جاتتى. بارلىعى جان-جاققا قاشا باستادى، - دەدى كۋاگەرلەردىڭ ءبىرى.

وقيعادان كەيىن اقش، كانادا، گەرمانيا جانە يسپانيانىڭ ساۋد ارابياسىنداعى ەلشىلىكتەرى ءوز ازاماتتارىنا ۋاقىتشا اۋەجايعا بارماۋعا كەڭەس بەردى.

Flightradar24 اۋە رەيستەرىن باقىلاۋ سەرۆيسىنىڭ مالىمەتىنشە، ەر- ريادقا باعىت العان بارلىق رەيس باسقا اۋەجايلارعا جىبەرىلگەن نەمەسە توقتاتىلعان.

سونىمەن قاتار Kuwait Airways اۋە كومپانياسى قاۋىپسىزدىك جاعدايىنا بايلانىستى ساۋد ارابياسى استاناسىنا قاتىنايتىن ەكى رەيسىن توقتاتقانىن مالىمدەدى.

- 2026 جىلعى 10-قازان، سەنبى كۇنى كۋۆەيتتەن ەر-ريادقا ۇشاتىن KU775 جانە ەر-ريادتان كۋۆەيتكە باعىتتالعان KU776 رەيستەرىنىڭ توقتاتىلعانىن حابارلايدى. بۇعان قاۋىپسىزدىك جاعدايىنا بايلانىستى اۋەجايدىڭ جابىلۋى سەبەپ بولدى، - دەلىنگەن كومپانيانىڭ رەسمي مالىمدەمەسىندە.

بۇعان دەيىن بەيسەنبى كۇنگى شابۋىلدان كەيىن Air India ،FlyDubai ،Lufthansa Group جانە Pakistan International Airlines سياقتى ءبىرقاتار اۋە كومپانياسى ساۋد ارابياسىنىڭ اۋەجايلارىنا ۇشۋدى ۋاقىتشا توقتاتقان.

حۋسيتتەر حالىقارالىق اۋە كومپانيالارىنا ساۋد ارابياسىنىڭ اۋە كەڭىستىگىندە رەيستەردى جالعاستىرعان جاعدايدا ىقتيمال سالدار بولاتىنىن ەسكەرتكەن.

باسىلىم مالىمەتىنشە، يەمەندەگى كوتەرىلىسشىلەر مەن ەر-رياد قولدايتىن ۇكىمەت كۇشتەرى اراسىنداعى قاقتىعىستاردىڭ شيەلەنىسۋى اياسىندا ساۋد ارابياسىنىڭ اۋەجايلارى، مۇناي نىساندارى مەن تانكەرلەرى حۋسيتتەردىڭ شابۋىلىنا ءجيى ۇشىراپ وتىر.

ايتا كەتەيىك، بۇعان دەيىن 8-قازاندا ەر-ريادتاعى كورول حاليد اتىنداعى حالىقارالىق اۋەجايعا جاسالعان ەكى شابۋىل سالدارىنان ساۋد ارابياسىنىڭ ءۇش ازاماتى قازا تاۋىپ، بىرنەشە ادام جاراقات العان بولاتىن.