«نۇر جولى» مەن «قورعاستا» كولىكتەردى كەدەندىك راسىمدەۋ ءبىر تاۋلىككە دەيىن قىسقارادى - قىتايلىق ينۆەستور
استانا. قازاقپارات - Beijing Polyking New Horizons Technology Industry Co باس ديرەكتورى لي كانچاو «نۇر جولى» مەن «قورعاس» وتكىزۋ بەكەتتەرىندە كولىكتەردى كەدەندىك راسىمدەۋ مەرزىمىن قازىرگى 20-30 كۇننەن ءبىر تاۋلىككە دەيىن قىسقارتاتىن جاڭا جۇيە ەنگىزىلەتىنىن ايتتى.
بۇل تۋرالى ول «قازاقستان - قىتاي» ينۆەستيتسيالىق فورۋمى اياسىندا Jibek Joly تەلەارناسىنا بەرگەن سۇحباتىندا مالىمدەدى.
- «نۇر جولى» مەن «قورعاس» وتكىزۋ بەكەتتەرىنە ارنالعان جاڭا جۇيە جوباسى تۋرالى تولىعىراق ايتىپ بەرسەڭىز. ول قالاي جۇمىس ىستەيدى جانە جوباعا قانشا ينۆەستيتسيا سالۋ جوسپارلانعان؟
- بۇل جوبا «نۇر جولى» مەن «قورعاس» بەكەتتەرىندەگى كولىك كەپتەلىسىن ازايتۋعا باعىتتالعان. قازىر بۇل ەكى بەكەتتەن وتۋگە 20-30 كۇن ۋاقىت كەتەدى. جاڭا جۇيە مەن ازىرلەنگەن مارشرۋتتىڭ ارقاسىندا كولىكتەردى كەدەندىك راسىمدەۋ ۋاقىتىن ءبىر تاۋلىككە دەيىن قىسقارتامىز. 30 كۇننەن ءبىر تاۋلىككە دەيىن قىسقارتۋ - ءبىزدىڭ باستى جەتىستىگىمىز.
جوبا قازاقستان مەن قىتاي ۇكىمەتتەرىنىڭ قولداۋىمەن ازىرلەندى. قىتاي كەدەن قىزمەتىنىڭ دەرەكتەردى وڭدەۋ ورتالىعى اقپاراتتىق قاۋىپسىزدىكتى قامتاماسىز ەتۋگە كومەكتەستى. بۇل - ەكى ەلدىڭ كەدەن جۇيەلەرىن بىرىكتىرىپ، شەكاراداعى كەپتەلىستى ازايتاتىن، قازاقستان مەن قىتاي اراسىنداعى ساۋدانى دامىتۋعا جانە اۆتوكولىك ساۋداسىن جەڭىلدەتۋگە مۇمكىندىك بەرەتىن يننوۆاتسيالىق شەشىم.
- جوبانىڭ نەگىزگى مىندەتتەرىنىڭ ءبىرى قازاقستان مەن قىتاي اراسىنداعى لوگيستيكانى جەدەلدەتۋ دەپ تۇسىنۋگە بولا ما؟
- ءدال سولاي. لوگيستيكا قالىپتى جۇمىس ىستەپ تۇر. الايدا كەدەندىك راسىمدەۋ ءبىرقاتار سەبەپكە بايلانىستى ۇزاققا سوزىلدى. ەكى تاراپتا ءارتۇرلى جۇيەلەر، دەرەكتەر بازاسى، ەسەپتەۋ ءتارتىبى مەن جۇمىس كەستەسى قولدانىلدى. ەندى وسى جۇيەلەردى تىكەلەي بايلانىستىرىپ، كەدەندىك راسىمدەۋدى بارىنشا جەڭىلدەتەمىز.
- جوبانى جۇزەگە اسىرۋعا قانشا قاراجات ينۆەستيتسيالاۋ جوسپارلانىپ وتىر؟
- جاڭا جۇيەنى ىسكە قوسۋعا باستاپقىدا 10 ميلليون ا ق ش دوللارى كولەمىندە ينۆەستيتسيا سالىنادى. الداعى ۋاقىتتا قويما كەشەندەرىن سالۋعا جانە جاڭا اۆتوجول تارتۋعا تاعى 200 ميلليون دوللار باعىتتاۋدى جوسپارلاپ وتىرمىز. العاشقى كەزەڭدە بيىل قازاقستان مەن قىتاي اراسىنداعى اۆتوكولىك ساۋداسىن 30 پايىزعا ارتتىرۋدى كوزدەيمىز. ال جاڭا قويمالار مەن جول ينفراقۇرىلىم ىسكە قوسىلعاننان كەيىن بۇل كورسەتكىشتى ەكى ەسە ۇلعايتۋدى جوسپارلاپ وتىرمىز.
- سىزدەر جەتىسۋ وبلىسىندا يندۋستريالىق پارك جوباسىن دا جۇزەگە اسىرىپ جاتىرسىزدار. بۇل جوباعا قانداي كاسىپورىندار تارتىلماق؟
- ءيا، ءبىز جەتىسۋ وبلىسىمەن بىرلەسىپ جۇمىس ىستەپ جاتىرمىز. جاڭا يندۋستريالىق پارككە جاڭارتىلعان لوگيستيكا مەن تسيفرلىق جۇيەمىزدىڭ نەگىزىندە جوعارى تەحنولوگيالىق كومپانيالاردى تارتامىز. ولاردىڭ قاتارىندا اۆتوكومپونەنت وندىرۋشىلەرى، قۇراستىرۋ كاسىپورىندارى، سونداي-اق دروندار مەن روبوت تەحنيكاسىن ازىرلەيتىن كومپانيالار بار. پارككە كەلەتىن كاسىپورىندارعا دامىعان لوگيستيكالىق ينفراقۇرىلىم، ساپالى قىزمەت كورسەتۋ جانە لوگيستيكالىق جەلىمىز ارقىلى قارجىلاي قولداۋ الۋ مۇمكىندىگى ۇسىنىلادى.
ەسكە سالا كەتەيىك، بۇگىن الماتىدا مەملەكەت باسشىسى قاسىم-جومارت توقايەۆتىڭ قاتىسۋىمەن «قازاقستان - قىتاي» ينۆەستيتسيالىق فورۋمى ءوتىپ جاتىر. فورۋم بارىسىندا پرەزيدەنت ەكى ەلدىڭ تاۋار اينالىمىن 100 ميلليارد دوللارعا دەيىن ارتتىرۋدى جوسپارلاپ وتىرعانىن مالىمدەدى.
