ەر ادام پاريجدەگى ايگىلى ەيفەل مۇناراسىن ساتىپ جىبەرگەن

استانا. KAZINFORM - ۆيكتور ليۋستيگ ەسىمدى ازامات الەمگە ايگىلى الاياقتىڭ ءبىرى. ليۋستيگتىڭ ەڭ تانىمال الاياقتىعى پاريجدە ەيفەل مۇناراسىن جوندەۋدى جوسپارلاعان كەزدە ورىن العان.

ەر ادام وسى جاعدايدى پايدالانىپ، مۇنارانى باسقاراتىن پوشتا جانە تەلەگراف مينيسترلىگىنىڭ جوعارى لاۋازىمدى قىزمەتكەرىنىڭ اتىنا جالعان قۇجاتتار دايىنداعان. ءوز جوسپارىن مۇقيات قۇرعان الاياق قۇزىرلى ورگانداردىڭ اتىنان جالعان حات جاساپ، بەس ءىرى تەمىرمەن اينالىساتىن بيزنەسمەندەرگە شاقىرۋ جىبەرگەن.

ليۋستيگ جەكە كەزدەسۋ بارىسىندا قىزىعۋشىلىق تانىتقان كاسىپكەرلەرگە ەيفەل مۇناراسىنىڭ توزىعى جەتكەنىن جانە پاريج تۇرعىندارى مەن ونىڭ قوناقتارىنا قاۋىپ توندىرەتىنىن، سوندىقتان قالا بيلىگى ونى كادەگە جاراتۋ تۋرالى شەشىم قابىلداعانىن ايتتى.

ال مۇنداي قادام جۇرتشىلىقتىڭ نارازىلىعىن تۋدىرۋى مۇمكىن بولعاندىقتان، ول مۇنارانى بۇزۋعا كەلىسىم-شارت بويىنشا جابىق اۋكسيون وتكىزۋگە قۇقىلى ەكەنىن ايتىپ، بارىنشا سەندىرۋگە تىرىسقان.

الەمگە «ماحاببات مۇناراسى» دەپ تانىلعان ەيفەلدى الۋ ءۇشىن ليۋستيگكە قوماقتى قاراجاتتى جەرگىلىكتى كاسىپكەر بەرگەن. ال الاياق اقشانى قولما-قول العان سوڭ ەلدەن قاشىپ كەتكەن.

دەگەنمەن قاناعاتسىزدىق تانىتقان الاياق ەكىنشى رەت ەلگە كەلىپ، وسى جوسپارمەن تاعى دا وڭاي اقشا تابۋدى كوزدەگەن. ءبىراق ول پوليتسەيلەرگە ۇستالىپ قالعان.