قىزىلوردالىق قۇتقارۋشىلار سۋ باسقان ايماقتاردان وبلىسقا ورالدى
قىزىلوردا. KAZINFORM - قىزىلوردالىق قۇتقارۋشىلار ەلىمىزدىڭ سۋ تاسقىنى بولعان ايماقتارداعى جۇمىستارىن اياقتاپ، وبلىسقا ورالدى.
قۇتقارۋشىلار بيىل قوستاناي، باتىس قازاقستان، اقتوبە، اتىراۋ وبلىستارىندا سۋ تاسقىنىن جويۋعا اتسالىستى. قۇتقارۋشىلاردى سالتاناتتى تۇردە كۇتىپ الدى.
سىر قۇتقارۋشىلارى اپات ايماقتارىندا سۋ تاسقىنىنا قارسى قارقىندى جۇمىس جاسادى. جەرگىلىكتى تۇرعىنداردى وقشاۋلاندىرىپ، سۋ قويمالارىنىڭ كوتەرىلۋىن باسەڭدەتۋگە ات سالىستى. سۋ باسقان وڭىرلەردە قىزمەت ەتكەن 80 قىزمەتكەر مەن ارنايى 9 تەحنيكا، 5 قايىق قىزىلوردا وبلىسىنا ورالدى.
سولاردىڭ ءبىرى - قىزىلوردالىق قۇتقارۋشى قايرات قىدىرالي ۇلى كەنجەبايەۆ 22 جىلدان بەرى توتەنشە جاعدايلار سالاسىندا قىزمەت اتقارىپ كەلەدى.
ۇزاق جىلدار بويى ءوز سالاسىندا مول تاجىريبە جيناقتاعان قاراپايىم ەڭبەك ادامى اتىراۋ وبلىسىندا حالىقتى سۋ تاسقىنىنان قۇتقارۋ باعىتىندا ۋاقىتپەن ساناسپاي ەڭبەك ەتتى. تاجىريبەلى مامان توتەنشە جاعداي كەزىندە جۇمىستىڭ دۇرىس ۇيلەستىرىلۋى جانە ۇجىمنىڭ اۋىزبىرشىلىگى اسا ماڭىزدى ەكەنىن ايتادى.
«توپان سۋدىڭ الدىن الۋ جانە جويۋ كەزىندەگى قاجەتتى تەحنيكالارعا ۋاقىتىلى كۇتىم كورسەتىلىپ، ولاردىڭ ۇزدىكسىز جۇمىس جاساپ تۇرۋى ماڭىزدى. مەن بالا كەزدەن اكەم كولىك جوندەپ جاتقاندا قاسىندا ءجۇرىپ، قاتتى قىزىعاتىن ەدىم. ال قازىر ءوزىمنىڭ بالالارىم مەنىڭ جانىمدا ءدال سولاي قۇراق ۇشىپ تەحنيكا جوندەۋگە كومەك كورسەتەدى»، - دەدى ول.
ايتا كەتسەك، قىزىلوردالىق قۇتقارۋشىلار اتىراۋ وبلىسىندا جايىق وزەنىندەگى مول سۋدىڭ سالدارىنان ارالدا قالىپ قويعان 65 جىلقىنى قاۋىپسىز جەرگە شىعارعان ەدى.
اۆتور
ءادىلجان ۇمبەت
