قىزىلوردادا تۇرعىن ۇيدە جارىلعان گاز سالدارىنان ءتورت جاس ءوسپىرىم اۋرۋحاناعا جەتكىزىلدى
قىزىلوردا. KAZINFORM - قىزىلوردا قالاسىندا جەكە تۇرعىن ۇيدە گاز جارىلىپ، ءتورت جاس ءوسپىرىم بالالار اۋرۋحاناسىنىڭ جان ساقتاۋ بولىمىنە جەتكىزىلدى.
وقيعا قىزىلوردا قالاسىنىڭ ءال-فارابي شاعىن اۋدانىندا جەكە تۇرعىن ۇيدە بولعان. گاز اۋا قوسپاسىنىڭ جىلىستاۋى سالدارىنان ءورت شىقپاي-اق ءۇي قيراپ قالدى.
«وقيعا بارىسىندا 4 جاس ءوسپىرىم زارداپ شەكتى. ولار بالالار اۋرۋحاناسىنىڭ جانساقتاۋ بولىمىندە. بالالار مەن جاسوسپىرىمدەردى ەرەسەكتەردىڭ باقىلاۋىنسىز قالدىرماۋدى سۇرايمىز. ولارعا وتباسىندا قاۋىپسىزدىك قاعيداسىن قاتاڭ ساقتاۋدى ناسيحاتتاعان ابزال. ەلەكتر، گاز قوندىرعىلارىن پايدالانۋدا قاۋىپسىزدىك ەرەجەسىن ساقتاۋ قاجەت»، - دەپ ءمالىم ەتتى قىزىلوردا وبلىستىق توتەنشە جاعدايلار دەپارتامەنتىنەن.
ەسكە سالساق، بۇدان بۇرىن قىزىلوردا وبلىسىندا جانارماي قۇيۋ بەكەتىنەن ءورت شىقتى.
اۆتور
ءادىلجان ۇمبەت
