قىزىلوردادا ەكى جاس ءوسپىرىمدى وتكىر زاتپەن جاراقاتتاعان كۇدىكتى قولعا ءتۇستى
قىزىلوردا قالاسىندا ەكى جاسوسپىرىمگە وتكىر زاتپەن دەنە جاراقاتىن سالىپ، وقيعا ورنىنان قاشىپ كەتكەن كۇدىكتى قولعا ءتۇستى، دەپ حابارلايدى Kazinform.
وبلىس ورتالىعىنداعى ى. جاقايەۆ كوشەسىندە بەيتانىس ازاماتتار كامەلەت جاسىنا تولماعان جاسوسپىرىمدەرگە كەلىپ، ءوزارا جانجالداسىپ قالعان.
ونىڭ ءبىرى ەكى جاسوسپىرىمگە وتكىر زاتپەن دەنە جاراقاتىن سالىپ، وقيعا ورنىنان قاشىپ كەتكەن.
جابىرلەنۋشىلەرگە مەديتسينالىق كومەك كورسەتىلدى. وقيعا ورنىنا كەلگەن جەدەل-تەرگەۋ توبى كۇدىكتىنىڭ جەكە باسىن انىقتادى.
«جەدەل ىزدەستىرۋ شارالارىنىڭ ناتيجەسىندە بۇرىن سوتتىلىعى بار 19 جاستاعى ازامات ۇستالدى. كۇدىكتى ۋاقىتشا ۇستاۋ يزولياتورىنا قامالدى. اتالعان دەرەك بويىنشا ق ر قىلمىستىق كودەكسىنىڭ 293-بابىنىڭ 3-بولىگىنە (بۇزاقىلىق) سوتقا دەيىنگى تەرگەپ-تەكسەرۋ جۇرگىزىلۋدە. ساراپتاما تاعايىندالدى. وقيعانىڭ ءمان-جايى انىقتالىپ جاتىر»، - دەپ ءمالىم ەتتى قىزىلوردا قالالىق پوليتسيا باسقارماسىنان.
اتالعان باپ بويىنشا كۇدىكتىگە قاتىستى ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋگە نەمەسە سول مەرزىمگە باس بوستاندىعىنان ايىرۋعا جازاسى كوزدەلگەن.
ەسكە سالساق، بۇدان بۇرىن قىزىلوردادا جوق كولىكتەردى ساتقان 27 جاستاعى ايەل ۇستالعان ەدى.
