قىزىلوردادا ءبىر جارىم عاسىرلىق قۇران كىتابى ساقتاۋلى تۇر
قىزىلوردا. KAZINFORM - ءابدىلدا تاجىبايەۆ اتىنداعى قىزىلوردا وبلىستىق امبەباپ عىلىمي كىتاپحاناسىنىڭ قورىندا 1 مىڭنان استام سيرەك كەزدەسەتىن كىتاپ جانە قولجازبا بار.
سونىڭ ىشىندەگى ەڭ كونە ءارى ەڭ قۇندى جادىگەر - 1293 ھيجرا جىلى اراب تىلىندە جازىلعان قۇران- كارىم كىتابى. بۇل - قازىرگى جىل ساناۋىمىز بويىنشا 1876 جىل.
كىتاپ مىسىر قالاسىنداعى «فارۋحي» باسپاسىندا ەلدى وسمان سۇلتان باسقارعان تۇستا باسىلعان.
- كىتاپتىڭ سىرتى تەرىمەن قاپتالىپ، اياتتارى ءشوپ بوياۋمەن بويالعان. قۇران- كارىم - يسلام ءدىنىنىڭ نەگىزگى كىتابى ەكەنى بەلگىلى. مۇسىلماندار ونىڭ مۇحاممەد پايعامبارعا يقاتتى بايان ەتۋ ءۇشىن تۇسىرىلگەنىنە، ادامزاتقا ودان ۇزىلمەستەن جەتكەن اللاھتىڭ ءسوزى ەكەنىنە سەنىپ، يمان كەلتىرەدى. ونى وقۋ ارقىلى اللاعا قۇلشىلىق قىلادى. قۇران - ءتاۋرات پەن ىنجىلدەن كەيىنگى اراب تىلىندەگى كىتاپتاردىڭ ىشىندەگى شەشەندىك تۇرعىسىنان ەڭ باي كىتاپ. قۇران 114 سۇرەدەن، 6236 اياتتان تۇرادى، - دەيدى كىتاپحانانىڭ نەگىزگى قورلاردى ساقتاۋ ءبولىمىنىڭ مەڭگەرۋشىسى گۇلدەرايىم قوسنازاروۆا.
كىتاپحاناشىنىڭ ايتۋىنشا، ەڭ ەجەلگى جادىگەرلەر قاتارىندا ودان بولەك قازى فاتكۋللماد، قازى ابدۋلكاريم، شارحۋاكيا ءحاليدىڭ 1303 ھيجرا جىلى شىققان «ءدىني فيلوسوفيالىق تۇسىندىرمە سوزدىگى» ، 1306 ھيجرا جىلى شىققان اراب تىلىندەگى «نامازدىڭ كەلۋ تاريحى: ناماز تارتىپتەرى» كىتابى جانە تاعى باسقا قۇندى ەڭبەكتەر بار.
ەندى «بۇلار قالاي، قاشان قولعا ءتيدى؟» دەگەن سۇراق تۋىندايدى.
2003 -جىلى تاريحي جازبا مۇرالاردى انىقتاۋ ماقساتىندا ۇلتتىق كىتاپحانا، قىزىلوردا وبلىستىق مادەنيەت باسقارماسى مەن كىتاپحاناسى بىرگە «ۇلى جىبەك جولىنىڭ كىتاپحانالارى» اتتى عىلىمي ەكسپەديتسيا ۇيىمداستىرعان بولاتىن.
ەكسپەديتسيا مۇشەلەرى وڭىردەگى 32 كىتاپحانادا بولىپ، 400 گە جۋىق كىتاپ جانە قولجازبانى تاۋىپ، زەرتتەگەن.
- تابىلعان كىتاپتاردىڭ كەيبىرى زيراتتاردان تابىلعاندىقتان كوگەرگەن، بەتتەرىن تۇز باسقان، كەمىرگىشتەر جەگەن، باس- اياعى جوق. سوندىقتان ولار كاسىبي تۇرعىدا قايتا قالپىنا كەلتىرىلدى. قورىمىز سىيلىققا بەرىلگەن، جەكە ادامداردان ساتىپ الىنعان، ايىرباستاۋ نەمەسە باسقا دا جولدارمەن تولىقتى. ونىڭ ىشىندە شىعىس قولجازبالارى، پارسى، اراب، ەسكى سلاۆيان تىلىندەگى العاشقى باسىلىمدار، ەۋروپالىق ادەبيەتتەر، اۆتوردىڭ قولتاڭباسى قويىلعان، وتە شاعىن كولەمدى كىتاپتار، قىزىلوردا قالاسى العاشقى استانا بولعان كەزدە شىققان ادەبيەتتەر بار، - دەيدى گۇلدەرايىم قوسنازاروۆا.
بۇعان دەيىن حابارلاعانىمىزداي، قىزىلوردا قازاق ا ك س ر- نىڭ استاناسى بولعان ۋاقىتتا سىر بويىنداعى باس شاھاردا كوپتەگەن اقپارات قۇرالى شوعىرلاندى.
اتاپ ايتقاندا، رەسپۋبليكالىق «ەڭبەكشى قازاق» (قازىرگى «ەگەمەن قازاقستان» )، «سوۆەتسكايا ستەپ» (قازىرگى «كازاحستانسكايا پراۆدا»)، «اۋىل» گازەتتەرى مەن «ايەل تەڭدىگى»، «دەنساۋلىق جولى»، «جاڭا ادەبيەت»، «جاڭا مەكتەپ» جۋرنالدارى جارىق كوردى.
