قىزىلوردا وبلىسىنىڭ تۇرعىنىنان 7 ميلليون تەڭگە بوپسالاعان ۇيىمداسقان توپ مۇشەلەرى ۇستالدى
پوليتسەيلەر قىزىلوردا وبلىسىنىڭ تۇرعىنىن الەۋمەتتىك جەلىلەردە جەكە سيپاتتاعى مالىمەتتەردى جاريالايمىن دەپ قورقىتقان بوپسالاۋشىلار توبىن ۇستادى.
كۇدىكتىلەر دەرەكتەردى جاريا ەتپەۋ ءۇشىن جابىرلەنۋشىدەن 7 ميلليون تەڭگە تالاپ ەتكەن، دەپ حابارلايدى Kazinform Polisia.kz سايتىنا سىلتەمە جاساپ.
وسى فاكتى بويىنشا قىزىلوردا وبلىسىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزىپ، ناتيجەسىندە كۇدىكتى رەتىندە 34، 32، 22 جاستاعى وبلىس تۇرعىندارىن ۇستادى. ايعاق زات رەتىندە ولاردان اقشا، بەلگى بەرەتىن تاپانشا جانە جالعان قىزمەتتىك كۋالىك الىندى.
قازىرگى تاڭدا جابىرلەنۋشىنىڭ نامىسىنا تيەتىن اقپاراتتى تاراتامىن دەپ قورقىتىپ، الدىن الا ءسوز بايلاسۋ ارقىلى ءبىر توپ ادام جاساعان بوپسالاۋ فاكتىسى بويىنشا سوتقا دەيىنگى تەرگەۋ امالدارى باستالدى.
كۇدىكتىلەر ۋاقىتشا ۇستاۋ يزولياتورىنا قامالدى.
