قىزىلوردا وبلىسىندا سوتتالعان ازامات زاڭدى نەكەگە تۇردى
استانا. قازاقپارات - قىزىلوردا وبلىسى بويىنشا قىلمىستىق-اتقارۋ جۇيەسى دەپارتامەنتىنە قاراستى 37 مەكەمەسىندە جازاسىن وتەپ جاتقان سوتتالعان ازامات زاڭدى تۇردە نەكەسىن قيىپ، ماڭىزدى قادام جاسادى، - دەپ حابارلايدى Polisia.kz.

نەكەنى قيۋ ءراسىمى قازاقستان رەسپۋبليكاسىنىڭ زاڭناماسىنا سايكەس جۇرگىزىلدى. سوتتالعان ازامات مەكەمە زاڭگەرىنە نەكەگە تۇرۋ تۋرالى ءوتىنىش ءبىلدىرىپ، قاجەتتى قۇجاتتاردى رەسىمدەگەن. مەكەمە زاڭگەرى قالالىق ا ح ا ج قىزمەتى ارقىلى سوتتالعانعا نەكە قيۋ كۋالىگىن تابىستادى.
- وتباسى - ادام ومىرىندەگى نەگىزگى قۇندىلىقتاردىڭ ءبىرى. جازاسىن وتەپ جاتقان ازاماتتىڭ وتباسىن قۇرۋعا دەگەن تالپىنىسى ونىڭ ومىرىندە وڭ وزگەرىستەردىڭ باستالعانىن كورسەتەدى. مۇنداي وقيعالار سوتتالعانداردىڭ قوعامعا قايتا بەيىمدەلۋىنە، ومىرگە جاڭاشا كوزقاراسپەن قاراۋىنا ۇلكەن سەپتىگىن تيگىزەدى. ءبىز ءۇشىن باستى ماقسات - سوتتالعانداردى تاربيەلەۋ، ولاردىڭ قاتەلىكتەرىن ءتۇسىنىپ، جاڭا ومىرگە قادام باسۋىنا مۇمكىندىك بەرۋ. بۇل نەكە - سول ماقساتقا جەتۋدىڭ ءبىر ايعاعى دەپ بىلەمىز، - دەدى مەكەمە زاڭگەرى جالعاس ەسماحانوۆ.
- بۇگىن مەن ءۇشىن وتە قۋانىشتى كۇن. ەندى مەنىڭ وتباسىم بار. بۇل قادام ماعان بولاشاققا سەنىممەن قاراۋعا مۇمكىندىك بەرەدى. جاساعان قاتەلىكتەرىم ءۇشىن وكىنەمىن. ەندىگى ماقساتىم - تۇزەلىپ، جاقىندارىما لايىقتى تىرەك بولۋ. بۇل مۇمكىندىكتى سىيلاعانى ءۇشىن مەكەمە قىزمەتكەرلەرىنە جانە ماعان سەنىم ارتقان قالىڭدىعىما العىسىم شەكسىز، - دەدى سوتتالعان ازامات.