قىزىلوردا وبلىسىندا 9 تۇيەنى اتىپ، سويىپ العان قىلمىسكەرلەر ۇستالدى

قىزىلوردا. KAZINFORM - قىزىلوردا وبلىسىندا مال ۇرلىعىمەن اينالىسقان 24، 30 جاستاعى قىلمىستىق توپ مۇشەلەرى دالادا جايىلىپ جۇرگەن جەرىنەن 9 تۇيەنى اتىپ، سويىپ الىپ كەتكەن.

قىزىلوردا وبلىسى پوليتسيا دەپارتامەنتى جانە قازالى اۋداندىق پوليتسيا ءبولىمىنىڭ جەدەل ۋاكىلدەرى تۇيە ۇرلاعان كۇدىكتىلەردى قولعا ءتۇسىردى. بيىل اقپان ايىندا ايتەكە ءبي كەنتىنىڭ تۇرعىندارىناڭ ارىز ءتۇستى. وندا تۇيە مالدارى قولدى بولعانى ايتىلعان.

پوليتسيا قىزمەتكەرلەرى جەدەل-ىزدەستىرۋ شارالارىن جۇرگىزدى. ناتيجەسىندە قانشاما مالدى قولدى ەتكەن ۇرىلاردى انىقتادى.

«تەكسەرۋ بارىسىندا ولاردىڭ 9 تۇيەنى دالادا جايىلىپ جۇرگەن جەرىنەن اتىپ، سويىپ الىپ كەتكەندىگى بەلگىلى بولدى. قىلمىسقا كۇدىكتى رەتىندە 24، 30 جاستاعى ازاماتتار ۇستالىپ، ءبولىمنىڭ ۋاقىتشا ۇستاۋ يزولياتورىنا قامالدى. ايعاق زات رەتىندە اڭشى مىلتىعى مەن ونىڭ پاترونى، پىشاقتار، مال تەرىسى الىندى. قازىرگى تاڭدا كۇدىكتىلەرگە قاتىستى ۇرلىق دەرەگى بويىنشا قىلمىستىق ءىس تىركەلىپ، سوتقا دەيىنگى تەرگەپ-تەكسەرۋ ارەكەتتەرى جۇرگىزىلۋدە»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.

پوليتسيا قىزمەتكەرلەرى كۇدىكتىلەردىڭ وبلىس اۋماعىنداعى باسقا دا قىلمىستارعا قاتىستىلىعىن تەكسەرىپ جاتىر.

ەسكە سالساق، بۇدان بۇرىن قىزىلوردادا 110 قاپ كۇرىش ۇرلاعان قىلمىستىق توپتىڭ ءتورت مۇشەسى ۇستالدى.

 

اۆتور
ءادىلجان ۇمبەت