قىزىلوردا وبلىسىندا 25 پاتەرگە تۇسكەن ۇرى ۇستالدى
قىزىلوردا. KAZINFORM - قىزىلوردا وبلىسىندا پوليتسەيلەر 25 مارتە پاتەر ۇرلىعىن جاساعان ۇرىنى ۇستادى. ول جابىرلەنۋشىلەرگە 19 ميلليون تەڭگە ماتەريالدىق شىعىن كەلتىرگەن.
قىزىلوردا وبلىسى پوليتسيا دەپارتامەنتىنىڭ كريمينالدىق پوليتسيا باسقارماسى جەدەل-ىزدەستىرۋ ءىس-شارالارىن جۇرگىزدى. ناتيجەسىندە ۇرلىقتى كاسىپ ەتكەن جىگىت جاڭاقورعان اۋدانىندا قىلمىس ۇستىندە قولعا ءتۇستى.
«كۇدىكتى ءۇي يەلەرىنىڭ جوقتىعىن پايدالانىپ، پلاستيك تەرەزەلەردى كۇشتەپ اشۋ ارقىلى ءۇي ىشىنە زاڭسىز كىرگەن. اقشا مەن التىن بۇيىمداردى ۇرلاعان. كۇدىكتى تۇركىستان وبلىسى قازىعۇرت اۋدانىنىڭ 26 جاستاعى تۇرعىنى بولىپ شىقتى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.
ودان جابىرلەنۋشىلەرگە تيەسىلى التىن بۇيىمدار مەن وزگە ايعاق زاتتار دالەل رەتىندە الىنعان.
«تەرگەۋ بارىسىندا اتالعان كۇدىكتى وبلىس اۋماعىندا 25 پاتەرگە ۇرلىققا تۇسكەنى بەلگىلى بولدى. جابىرلەنۋشىلەرگە 19 ميلليون تەڭگە ماتەريالدىق شىعىن كەلتىرگەن. كۇدىكتىنىڭ وبلىس كولەمىندە جاسالعان باسقا دا قىلمىستارعا قاتىستىلىعى تەكسەرىلىپ جاتىر. تەرگەپ-تەكسەرۋ ارەكەتتەرى جالعاسۋدا. كۇدىكتى قاماۋعا الىندى»، - دەپ تولىقتىردى دەپارتامەنتتەن.
ەسكە سالساق، بۇدان بۇرىن قىزىلوردا وبلىسىنىڭ تۇرعىنىنان 7 ميلليون تەڭگە بوپسالاعان ۇيىمداسقان توپ مۇشەلەرى ۇستالدى.
