قىزىلوردا تۇرعىنى جالعان سەنىمحات ارقىلى مەكەمە قاراجاتىن جىمقىرعان
استانا. KAZINFORM - قارجى مونيتورينگى اگەنتتىگىنىڭ قىزىلوردا وبلىسى بويىنشا دەپارتامەنتى ب. راسيلوۆ ەسىمدى ازاماتتىڭ جولىن كەستى.
ول 2018 -جىلى تاراتىلعان «سىرداريا اۋداندىق تۋبەركۋلەزگە قارسى ديسپانسەرى» م ك ك-نىڭ ەسەپ- شوتىنداعى 8200000 تەڭگە كولەمىندەگى قارجىنى الداۋ جولىمەن جىمقىرعان.
- سوتقا دەيىنگى تەرگەپ-تەكسەرۋ بارىسىندا ول 2023 -جىلدىڭ قىركۇيەك ايىندا «قازاقستان حالىق بانكى» ا ق استانا قالاسىنداعى فيليالىنىڭ اۆتوكاسسالارىنان اقشالاي قاراجاتتى الىپ العانى انىقتالدى. وندا م ك ك باسشىلارىنىڭ اتىنان جالعان سەنىمحات ارقىلى «ارەكەتسىزدىك مارتەبەسىن ەسەپتەن الۋ تۋرالى» جانە «پايدالانۋشىنى «Online bank» جۇيەسىنە قوسۋ تۋرالى» جالعان سەنىمحاتى ارقىلى بانكتىك قۇجاتتار ۇسىنىلعان. سالدارىنان مەملەكەتكە 8200000 تەڭگە كولەمىندە ءىرى زالال كەلتىرىلدى. كۇدىكتىگە قاتىستى سوت ۇكىمى شىقتى. سوتتالۋشى ق ر قىلمىستىق كودەكسىنىڭ 190-بابى 3-بولىگى 1) - تارماعىمەن كىنالى دەپ تانىلدى. وعان 4 جىل مەرزىمگە باس بوستاندىعىن شەكتەۋ جازاسى تاعايىندالدى. سونداي-اق ول مەملەكەتتىك قىزمەتتە، جەرگىلىكتى ءوزىن-ءوزى باسقارۋ ورگاندارىندا، قارجى ۇيىمدارىندا ماتەريالدى جاۋاپتى لاۋازىمداردى اتقارۋ قۇقىعىنان 4 جىل مەرزىمگە ايىرىلدى. تەرگەپ تەكسەرۋ بارىسىندا مەملەكەتكە كەلتىرىلگەن زالال تولىق ءوندىرىلدى، - دەپ ءمالىم ەتتى ق ر قارجى مونيتورينگى اگەنتتىگىنىڭ قىزىلوردا وبلىسى بويىنشا دەپارتامەنتى.
