قىزىل كىتاپقا ەنگەن جانۋارلاردى اۋلاعاندارعا سالىناتىن ايىپپۇل 10 ەسە ءوستى

وزبەكستاندا قىزىل كىتاپقا ەنگەن جانۋارلار مەن وسىمدىكتەرگە زالال كەلتىرگەندەرگە سالىناتىن ايىپپۇلدار سوماسى ءوستى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وزبەكستاننىڭ مينيسترلەر كابينەتى «بيولوگيالىق رەسۋرستاردى قولدانۋدى رەتتەۋ جانە تابيعاتتى پايدالانۋ سالاسىنداعى رۇقسات بەرۋ راسىمدەرىنەن ءوتۋ ءتارتىبى تۋرالى» قاۋلىسىنا وزگەرىس ەنگىزدى.

تيىسىنشە ەندى وزبەكستاننىڭ قىزىل كىتابىنا ەنگەن وسىمدىكتەرگە زيان كەلتىرگەندەرگە سالىناتىن ايىپپۇل مولشەرى 5 ەسە وسەدى. ماسەلەن، جويىلىپ بارا جاتقان وسىمدىك بولسا، ءار داناسى ءۇشىن 10 بازالىق ەسەپتىك شاما (126571 تەڭگە) كولەمىندە، ال ەگەر سيرەك كەزدەسەتىن ءتۇرى بولسا - 4 بازالىق ەسەپتىك شاما (50628 تەڭگە) جانە ازايىپ بارا جاتقان فلوراعا 2,5 بازالىق ەسەپتىك شاما (31642 تەڭگە) كولەمىندە ايىپپۇل سالىنادى.

سونداي-اق جانۋارلارعا كەلتىرىلگەن زالال ءۇشىن قاراستىرىلعان ايىپپۇل 10 ەسە ۇلعايتىلدى. ياعني، ەندى وزبەكستان ازاماتى ءبىر قار بارىسىن اۋلايتىن بولسا، ول 3000 بازالىق ەسەپتىك شاما (37 ميلليون 971 مىڭ تەڭگە)، ال شەتەلدىك ازاماتتار مەن زاڭدى تۇلعالار 400 مىڭ دوللار (183 ميلليون 614 مىڭ تەڭگە) تولەۋى ءتيىس.

قۇجات 11- جەلتوقساننان باستاپ كۇشىنە ەندى.