قىزىل كىتاپقا ەنگەن ۇكىنىڭ اڭ اۋلاعان ءساتى كامەراعا ءتۇسىپ قالدى
استانا. KAZINFORM - جابايى تابيعاتتا كۇن سايىن سان ءتۇرلى وقيعا بولادى. ءبىراق ولاردىڭ ءبارىن ءوز كوزىمىزبەن كورە بەرمەيمىز.
بۇل جولى «ەرتىس ورمانى» مەملەكەتتىك ورمان تابيعي رەزەرۆاتىنىڭ فوتوتۇزاعى ەرەكشە ءساتتى تىركەدى. قازاقستاننىڭ قىزىل كىتابىنا ەنگەن ۇكى قويان اۋلاپ جاتقان ساتىندە كامەراعا ءتۇسىپ قالدى.
ۇكى - تۇنگى تابيعاتتىڭ ەڭ شەبەر جىرتقىشتارىنىڭ ءبىرى. ونىڭ وتكىر كورۋ قابىلەتى، سەزىمتال ەستۋ مۇشەلەرى مەن قۋاتتى تىرناقتارى اڭ اۋلاۋعا جاقسى بەيىمدەلگەن.
ءبىز ءۇشىن بۇل - سيرەك كادر. ال تابيعات ءۇشىن - تىرشىلىكتىڭ قالىپتى زاڭدىلىعى. جىرتقىشتار قورەكتىك تىزبەكتىڭ ماڭىزدى بولىگى رەتىندە ەكوجۇيەدەگى تابيعي تەپە تەڭدىكتى ساقتاۋعا قاتىسادى.
وسىنداي بەينەجازبالار فوتوتۇزاقتاردىڭ ماڭىزىن كورسەتەدى. ولار ادام كوزىنە سيرەك تۇسەتىن جانۋارلاردىڭ تىرشىلىگىن مازالاماي باقىلاۋعا، مىنەز-قۇلقىن زەرتتەۋگە مۇمكىندىك بەرەدى.
تابيعاتتىڭ ءاربىر تۇرعىنى ماڭىزدى. ولاردىڭ تىرشىلىك ەتۋ ورتاسىن ساقتاۋ - ورتاق مىندەتىمىز.