قىزمەتكەر ۇستەمە جۇمىسقا شىقسا، قانشا اقى الۋى ءتيىس
استانا. KAZINFORM - قىزمەتكەردى ۇستەمە جۇمىسقا تارتۋدىڭ زاڭدا بەلگىلەنگەن ءتارتىبى بار. بۇل تۋرالى استانا قالاسى بويىنشا مەملەكەتتىك ەڭبەك ينسپەكتسياسى كوميتەتى دەپارتامەنتى باسشىسىنىڭ ورىنباسارى مۇرات شاكەنوۆ ايتتى.
باسپا ءسوز كونفەرەنتسياسىندا سپيكەر جۇمىس ۋاقىتىنان تىس ەڭبەككە تارتۋ جانە وعان اقى تولەۋ تارتىبىنە توقتالدى.
- جۇمىس بەرۋشى قىزمەتكەردى ۇستەمە جۇمىسقا ونىڭ جازباشا كەلىسىمى بولعان جاعدايدا تارتا الادى. بۇل قازاقستان رەسپۋبليكاسى ەڭبەك كودەكسىنىڭ 77-بابىندا كورسەتىلگەن. ەڭبەك نەمەسە ۇجىمدىق شارتتا وزگە تالاپ كوزدەلمەسە، ۇستەمە جۇمىسقا اقى كەمىندە ءبىر جارىم ەسە مولشەردە تولەنەدى،- دەدى مۇرات شاكەنوۆ.
ايتا كەتەيىك، بۇعان دەيىن جۇمىس بەرۋشى ەڭبەك شارتى جاسالعاننان كەيىن ونىڭ تالاپتارىن قىزمەتكەردىڭ كەلىسىمىنسىز وزگەرتە المايتىنى، ەڭبەك شارتىنا ەنگىزىلەتىن وزگەرىستەر تاراپتاردىڭ كەلىسىمىمەن راسىمدەلەتىنى جونىندە جازدىق.
