قىزعالداق دالاسى: تۇركىستان توپىراعى تۇكتى كىلەم سەكىلدى قۇلپىرىپ تۇر
تۇركىستان. KAZINFORM - ورداباسى اۋدانىنىڭ ورتالىعى تەمىرلان اۋىلىنىڭ جانىنداعى ءبيداي القابى قىزعالداق ايماعىنا اينالدى.
جەرگىلىكتى تۇرعىننىڭ مەنشىگىندەگى 100 گەكتار اۋماققا گرەيگ قىزعالداعى ءوسىپ شىقتى. جول جيەگىندە قۇلپىرىپ تۇرعان دالا گۇلىن كورگەن جولاۋشىلار ارنايى توقتاپ، سۋرەتكە ءتۇسىپ جاتىر. ءتىپتى تابيعاتتىڭ تاماشا ءساتىن كورۋگە قالادان ارنايى كەلۋشىلەر دە كوپ. ال الداعى بىرەر اپتادا تۇلكىباس اۋدانىنا قاراستى شۇباي قىزىل شوقىسىندا دا قىزعالداقتار گۇلدەپ، اۋماققا اسەم كورىنىس سىيلايدى.
«جالپى، وڭىردە قىزعالداق القابى جىلدان-جىلعا كوبەيىپ كەلەدى. بۇل دالا گۇلىنىڭ مەملەكەتتىك دەڭگەيدە قورعاۋعا الىنۋىنان جانە حالىقتىڭ ەكولوگيالىق ءبىلىمىنىڭ ارتۋىنان دەپ بىلەمىن. ءتارتىپ ساقشىلارى مەن ورمانشىلار تاۋلىك بويى بۇل باعىتتا جۇمىس ىستەپ جاتىر. قىزىل كىتاپقا ەنگەن قىزعالداقتى جۇلۋشىلارعا 3000 ا ە ك كولەمىندە ايىپپۇل سالىنادى نەمەسە 800 ساعاتقا قوعامدىق جۇمىسقا تارتۋ كوزدەلگەن نەمەسە 3 جىلعا باس بوستاندىعىنان ايىرىلادى. بۇنان بولەك، جاقىن ارادا جابايى قىزعالداقتار دا ءوسىپ شىعادى»، - دەدى سىرداريا-تۇركىستان م ءو ت پ عىلىمي قىزمەتكەرى عاني نازاربەك.
بۇگىندە ءتارتىپ ساقشىلارى مەن ورمان شارۋاشىلىعىنىڭ ماماندارى بىرلەسىپ القاپتاردا ءوسىپ تۇرعان قىزعالداقتاردى قورعاۋ جۇمىستارىن اتقارىپ جاتىر. اسىرەسە، قىزىقتاۋعا كەلگەن ازاماتتارعا قىزعالداقتى جۇلۋعا بولمايتىنىن ءتۇسىندىرىپ جاتىر.
