قىز جىبەك بەينەسىن سومداعان مەرۋەرت وتەكەشوۆا ب ق و-نىڭ قۇرمەتتى ازاماتى اتاندى
ورال. KAZINFORM - بەلگىلى تەاتر جانە كينو اكتريساسى، قازاقستاننىڭ ەڭبەك سىڭىرگەن ءارتىسى، «قۇرمەت» جانە «پاراسات» وردەندەرىنىڭ يەگەرى مەرۋەرت وتەكەشوۆاعا باتىس قازاقستان وبلىسىنىڭ قۇرمەتتى ازاماتى اتاعى بەرىلدى.
وسىعان وراي تۋعان جەرىنە كەلگەن ونەر قايراتكەرىنە ماراپات تابىس ەتىلدى.
مەرۋەرت قاراتاي قىزى ءوزىن سىيلاپ، قۇرمەتتەگەنى ءۇشىن باتىس قازاقستان وبلىسى جۇرتشىلىعىنا شىنايى ريزاشىلىعىن ءبىلدىردى.
مەرۋەرت وتەكەشوۆا 1951-جىلدىڭ 25-اقپانىندا ورال قالاسىندا دۇنيەگە كەلگەن.
1969-1973-جىلدارى قازاق مەملەكەتتىك قۇرمانعازى اتىنداعى ونەر ينستيتۋتىنىڭ تەاتر فاكۋلتەتىندە وقىدى.
1973-جىلى م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرلىك قۇرامىنا قابىلداندى.
مەرۋەرت وتەكەشوۆا تەاتر مەن كينودا كوپتەگەن رولدەردى سومدادى. سونىڭ ىشىندە «قىز جىبەك» كينوفيلمىندەگى قىز جىبەك بەينەسىمەن كەڭىنەن تانىلدى.
ب ق و ءماسليحاتىنىڭ شەشىمىمەن سونداي-اق مەملەكەتتىك قىزمەت سالاسىندا ۇزاق جىل قىزمەت اتقارعان ميربولات جاقىپوۆ پەن تابىلعالي ساپاروۆقا دا «باتىس قازاقستان وبلىسىنىڭ قۇرمەتتى ازاماتى» اتاعى بەرىلدى.
