قىز الىپ قاشۋعا توقتاۋ سالىندى: نەكەگە ماجبۇرلەپ كوندىرۋ قىلمىس دەپ تانىلدى
استانا. قازاقپارات - 16-قىركۇيەكتەن باستاپ قازاقستاندا نەكەگە ماجبۇرلەگەنى ءۇشىن قىلمىستىق جاۋاپكەرشىلىك ەنگىزىلەدى، دەپ حابارلايدى ءى ءى م باسپا ءسوز قىزمەتى.
16-قىركۇيەكتەن باستاپ قىلمىستىق زاڭنامادا ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋگە باعىتتالعان وزگەرىستەر كۇشىنە ەنەدى.
«كەيبىر زاڭنامالىق اكتىلەرگە قازاقستان رەسپۋبليكاسىنىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا ادام ۇرلاۋ جانە نەكەگە ماجبۇرلەۋ سياقتى وزەكتى تاقىرىپتارعا قاتىستى وزگەرىستەر قاراستىرىلعان.
- باستى جاڭاشىلدىقتاردىڭ ءبىرى - قىلمىستىق كودەكستىڭ 125-بابىنداعى ەسكەرتپەنىڭ الىنىپ تاستالۋى. بۇعان دەيىن ۇرلانعان ادامدى ەرىكتى تۇردە جىبەرگەن ادام قىلمىستىق جاۋاپكەرشىلىكتەن بوساتىلۋى مۇمكىن ەدى. ەندى بۇل مۇمكىندىك الىنىپ تاستالدى: جابىرلەنۋشىنى ءوز ەركىمەن بوساتقان كۇننىڭ وزىندە كىنالى ادام زاڭعا سايكەس جاۋاپكەرشىلىككە تارتىلادى، - دەپ ءتۇسىندىردى مينيسترلىك.
سونىمەن قاتار قىلمىستىق كودەكسكە جاڭا 125-1-بابى «نەكەگە ماجبۇرلەۋ» ەنگىزىلدى. ەندى بۇل ارەكەت قىلمىستىق قۇقىقبۇزۋشىلىق رەتىندە تانىلادى.
- نەكەگە ماجبۇرلەگەنى ءۇشىن ايىپپۇل، تۇزەۋ نەمەسە قوعامدىق جۇمىستار، باس بوستاندىعىن شەكتەۋ نەمەسە باس بوستاندىعىنان ايىرۋ تۇرىندەگى جازا قاراستىرىلعان. قىلمىستىڭ ءمان-جايىنا بايلانىستى 2000 ايلىق ەسەپتىك كورسەتكىشكە دەيىنگى مولشەردە ايىپپۇلدان باستاپ ەكى جىلعا دەيىنگى مەرزىمگە باس بوستاندىعىنان ايىرۋعا دەيىن جازا قاراستىرىلادى. ەگەر مۇنداي ارەكەت ابايسىزدا اۋىر زارداپتارعا اكەلسە، بەس جىلدان ون جىلعا دەيىن باس بوستاندىعىنان ايىرۋ جازاسى كوزدەلەدى. ال ەگەر ماجبۇرلەۋ زورلىق-زومبىلىقپەن، كامەلەتكە تولماعاندارعا قاتىستى، تاۋەلدىلىگىن پايدالانۋ ارقىلى، ادامدار توبىمەن نەمەسە قىزمەت بابىن پايدالانا وتىرىپ جاسالسا، بۇدان دا قاتاڭ جازا قاراستىرىلعان، - دەلىنگەن ۆەدومستۆو تاراتقان اقپاراتتا.
بۇل وزگەرىستەر نەكەگە ماجبۇرلەۋدىڭ الدىن الۋعا جانە ەڭ الدىمەن ايەلدەر مەن جاسوسپىرىمدەر سياقتى وسال توپتاردى قورعاۋعا باعىتتالعان.
وسىعان دەيىن قازاقستاندا دروپپەرلىك ءۇشىن قىلمىستىق جاۋاپكەرشىلىك ەنگىزىلگەنىن جازعان بولاتىنبىز.
