قىتايدىڭ تاعى ەكى قالاسىنا قازاقستاننان تىكەلەي ۇشۋعا بولادى

تاشكەنت قالاسىندا ءوتىپ جاتقان «قىتاي - ورتالىق ازيا» (C5+1) ازاماتتىق اۆياتسيا سالاسىنداعى ىنتىماقتاستىق جونىندەگى جۇمىس توبى كونفەرەنسياسى اياسىندا بيىلعى جىلدىڭ 4-قاراشاسىندا قازاقستان رەسپۋبليكاسى مەن قىتاي حالىق رەسپۋبليكاسىنىڭ اۆياتسيالىق بيلىك ورگاندارى اراسىندا ەكىجاقتى كەلىسسوزدەر ءوتتى.

قازاقستان دەلەگاتسياسىن ق ر كولىك مينيسترلىگى ازاماتتىق اۆياتسيا كوميتەتىنىڭ ءتوراعاسى سالتانات تومپيەۆا باسقاردى. قىتاي تاراپىنان كەلىسسوزدەرگە قىتاي ازاماتتىق اۆياتسيا اكىمشىلىگى (CAAC) باس ديرەكتورىنىڭ ورىنباسارى باي ۆەنلي قاتىستى.

كەلىسسوزدەر بارىسىندا تاراپتار قازاقستان مەن قىتاي اراسىنداعى حالىقارالىق اۋە قاتىناسىن ودان ءارى كەڭەيتۋ پەرسپەكتيۆالارىن، ونىڭ ىشىندە تۇراقتى رەيستەر سانىن ارتتىرۋ جانە ۇشۋ باعىتتارىنىڭ گەوگرافياسىن كەڭەيتۋ ماسەلەلەرىن تالقىلادى.

- كەزدەسۋ قورىتىندىسى بويىنشا اپتاسىنا رۇقسات ەتىلگەن اۋە رەيستەرىنىڭ سانىن 150 دەن 180 گە دەيىن ارتتىرۋ، سونداي-اق مارشرۋتتىق جەلىگە قىتايدىڭ تاعى ەكى قالاسى - چىڭدۋ مەن قاشعاردى قوسۋ تۋرالى ۋاعدالاستىققا قول جەتكىزىلدى. قول جەتكىزىلگەن كەلىسىمدەردى ىسكە اسىرۋ ەكى ەلدىڭ اۋە كومپانيالارى ءۇشىن جاڭا مۇمكىندىكتەر اشۋعا، تىكەلەي اۋە رەيستەرىنىڭ قولجەتىمدىلىگىن ارتتىرۋعا، جولاۋشىلارعا قولايلى جاعداي جاساۋعا جانە ترانزيتتىك تاسىمال مۇمكىندىكتەرىن كەڭەيتۋگە مۇمكىندىك بەرەدى، - دەلىنگەن حابارلامادا.

تاراپتار ەكىجاقتى ىنتىماقتاستىقتى ودان ءارى نىعايتۋعا جانە ەكى ەل اراسىنداعى اۋە قاتىناسىن جۇيەلى تۇردە دامىتۋعا مۇددەلى ەكەندىكتەرىن راستادى.

قازاقستان مەن قىتاي ازاماتتىق اۆياتسيا سالاسىنداعى ىنتىماقتاستىقتى جۇيەلى تۇردە دامىتىپ كەلەدى. جولاۋشىلار اعىنىنىڭ ارتۋى، سونداي-اق ىسكەرلىك جانە تۋريستىك بايلانىستاردىڭ جاندانۋى ەكى ەل اراسىنداعى تىكەلەي اۋە قاتىناسىن ودان ءارى كەڭەيتۋگە جاڭا مۇمكىندىكتەر اشىپ وتىر.