قىتايمەن شەكارادا تۋريستەر ءۇشىن جاياۋ جۇرگىنشىلەر باعىتى اشىلماق
استانا. KAZINFORM - قىتايمەن شەكارادا تۋريستەر ءۇشىن جاياۋ جۇرگىنشىلەر باعىتى اشىلماق. بۇل تۋرالى ۇكىمەت وتىرىسىندا الماتى وبلىسىنىڭ اكىمى مارات سۇلتانعازيەۆ ايتتى.
«مەملەكەت باسشىسىنىڭ 2023 -جىلدىڭ 5-قىركۇيەكتەگى الماتى وبلىسىنا جۇمىس ساپارى بارىسىندا بەرگەن تاپسىرماسىنا سايكەس، نارىنقول اۋدانىندا تۋريستەر ءۇشىن جاياۋ جۇرگىنشىلەر باعىتىن اشۋ ءۇشىن ءوڭىر اكىمدىگى ءوز قۇزىرەتى شەگىندە بارلىق شارانى قابىلدادى. قىتايمەن شەكارادا 135 گەكتار جەر ۋچاسكەسى انىقتالدى. بۇگىندە قىتاي تاراپىنىڭ ۇستانىمىن كۇتىپ وتىرمىز. وتكىزۋ پۋنكتىن اشۋ شەكارالاس اۋىلداردىڭ دامۋىنا سەرپىن بەرەدى»، - دەدى ءوڭىر باسشىسى.
ونىڭ اتاپ وتۋىنشە، ويقاراعاي، شىمبۇلاق جانە تاۋ شاڭعىسى كۋرورتتارى اراسىندا اسپالى جولدار جۇرگىزۋ تاۋ كلاستەرىن دامىتۋعا وڭ اسەرىن بەرەدى. وسى ورايدا قاجەتتى جابدىقتاردىڭ قىمبات بولۋىنا جانە الەمدىك تاجىريبەنى ەسكەرە وتىرىپ، ينۆەستورلاردىڭ ءىرى جوبالارعا كەتكەن شىعىندارىن وتەۋدى 25-تەن 70 پايىزعا دەيىن ارتتىرۋ قاجەت.
«ويىن بيزنەسىندەگى ماسەلەنىڭ ءبىرى - ول ليتسەنزيانى ۇزارتۋدى جەڭىلدەتىپ، مەرزىمىن قىسقارتۋ. ماسەلەن، بىزدەگى «ماكاو» ويىنحاناسى ەكى ايداي جۇمىس ىستەگەن جوق. سونىڭ سالدارىنان 500 ادامنىڭ ۋاقىتشا جۇمىسسىز قالۋ قاۋپى بولدى. كىرىسى 330 ميلليون تەڭگەگە كەمىدى»، - دەدى مارات سۇلتانعازيەۆ.
اۆتور
مارلان جيەمباي
