قىتايلىق وقۋشىلار شاتقالداعى مەكتەپكە «اسپانداعى اۆتوبۋسپەن» باراتىن بولدى
استانا. KAZINFORM - قىتايدىڭ يۋننان ولكەسى نيچجۋحە ەلدى مەكەنىندەگى وقۋشىلار مەكتەپكە «اسپانداعى اۆتوبۋسپەن» باراتىن بولدى. بۇل تۋرالى «حالىق گازەتى» باسىلىمى حابارلادى.
- نيچجۋحە ەلدى مەكەنى شاتقالدىڭ تۇبىندە ورنالاسقان. بۇرىن جەرگىلىكتى بالالار مەكتەپكە بارۋ ءۇشىن جارتاستارعا شىعىپ، تاۋ اسىپ، تاس باسۋعا ءماجبۇر بولاتىن ەدى. شاتقال بويىمەن ءۇش-ءتورت ساعات جول باسىپ، بيىكتىگى 550 مەتر بولاتىن تاۋ جولى ارقىلى جاياۋ ءجۇرىپ، تاۋدىڭ باسىنداعى گۋانچجاي باستاۋىش مەكتەبىنە باراتىن، - دەپ جازادى دەرەككوز.
2022 -جىلدان باستاپ، نيچجۋ وزەنىنىڭ ۇلكەن شاتقالى مادەني تۋريزم ايماعى جوباسىنا كىرىپ، 268 مەترلىك ليفت پەن 200 مەترگە جۋىق بيىكتىكتەگى اسپالى جول پايدالانۋعا بەرىلگەن.
جاقىن ماڭداعى اۋىلداردىڭ تۇرعىندارى بۇل ينفراقۇرىلىمدى تەگىن پايدالانا الادى. شاتقالداعى كوركەم ايماق سالىنىپ بولعاننان كەيىن بالالار مەكتەپكە ليفتپەن جانە اسپالى جولمەن جارتى ساعاتتان از ۋاقىت ىشىندە جەتىپ باراتىن بولدى.
ايتا كەتەيىك، قىتايداعى ەتنيكالىق موڭعولدار «مۇزداعى ارگا» جارىسىن وتكىزگەنىن جازعان بولاتىنبىز.
ريزابەك نۇسىپبەك ۇلى
