قىتايلىق تانىمال رەجيسسەر جانار ساعات قىزى وتانداستار فورۋمىنا كەلدى
شەتەلدەگى قازاقتاردىڭ باسىن قوسقان وتانداستار فورۋمىنا قىتايدىڭ تانىمال رەجيسسەرى جانار ساعات قىزى كەلدى. ول كينو، تەلەۆيزيا سالاسىندا رەجيسسەر بولىپ جۇمىس ىستەيدى. قازىرگى ۋاقىتتا قىتاي استاناسى بەيجىڭ قالاسىندا تۇرادى.
جانار ساعات قىزى 1969-جىلى قىتايدىڭ ءۇرىمجى قالاسىندا تۋعان.
ج. ساعات قىزى كەڭەس وداعى كەزىندە ماسكەۋدىڭ كينو اكادەمياسىندا وقىعان. سول جەردە رەجيسسەرلىك ماماندىقتى ءبىتىرىپ، كەيىن بەيجىڭگە قايتىپ، سودان بەرى جۇمىس ىستەپ كەلە جاتىر. كەڭەس وداعى جاڭا ىدىراعان كەزدە ت م د ەلدەرىنىڭ «مير» تەلەارناسىندا 2 جىلداي تەلەجۇرگىزۋشى بولدى. ءبىراق كەيىن ءوزىنىڭ وقىعان ماماندىعى رەجيسسەرلىققا ورالدى. ول كوبىنە تاريح تاقىرىبىنداعى تەلەحيكايالار تۇسىرگەن. سولاردىڭ كوبى مەملەكەتتىك ماراپاتتارعا يە بولدى.
رەجيسسەر ءوز سوزىندە وسى جولعى وتانداستار فورۋمىنىڭ ۇيىمداستىرۋشىلارىنا العىس ءبىلدىردى.
«وتانداستار فورۋمىنا العاش رەت قاتىسىپ وتىرمىن. ماعان وتە ۇناپ جاتىر. كەشەدەن بەرى سونداي جىلى جۇزبەن، جىلى كوڭىلمەن ءبىزدى قارسى الىپ جاتىر. باعدارلاما دا جاقسى جاسالعان. دۇنيە ءجۇزىنىڭ ءار جەرىندەگى قازاقتاردىڭ باسىن قوسىپ، ءبىر-بىرىمىزبەن پىكىر الماسۋعا، ءبىر-ءبىرىمىزدى ءتۇسىنىپ، بىلۋگە وتە جاقسى مۇمكىندىك جاساعان «وتانداستار» قورىنا راقمەت دەيمىز»، - دەيدى جانار ساعات قىزى.
ايتا كەتەيىك، استانا قالاسىندا «وتانداستار فورۋمى - 2023» دەپ اتالاتىن فورۋمعا شەتەلدەگى 40 ەلدەن كەلگەن 200 گە جۋىق قازاق ۇيىمدارىنىڭ باسشىلارى، بەلسەندى جانە تانىمال تۇلعالارمەن قاتار، وتاندىق عىلىم، ءبىلىم، مادەنيەت، سپورت، بيزنەس، مەديا، ساياسات، قوعامدىق ۇيىمدار جانە باسقا دا سالالاردىڭ كورنەكتى وكىلدەرى مەن بەلگىلى قايراتكەرلەرى قاتىسۋدا.
قىتايدان جازۋشى، مەملەكەت جانە قوعام قايراتكەرى اكپار ءماجيت ۇلى، بەلگىلى رەجيسسەر جانار ساعات قىزى جانە ءانشى اراي ايدارحان كەلگەن بولاتىن.
اۆتور بەيسەن سۇلتان ۇلى
