قىتايلىق ساراپشى: جولداۋ قازاقستاننىڭ ۇزاق مەرزىمدى دامۋىنىڭ ستراتەگيالىق مانيفەسىنە اينالىپ كەلەدى
استانا. KAZINFORM – ق ر پرەزيدەنتى قاسىم-جومارت توقايەۆتىڭ جولداۋى استانانىڭ جاھاندىق تۇراقسىزدىق جاعدايىنداعى ستراتەگيالىق تاڭداۋىن كورسەتەدى جانە «جاسامپازدىق ارقىلى - بىرلىككە، رەفورما ارقىلى - ادىلدىككە» قاعيداتىنا نەگىزدەلگەن ەگەمەندى جاڭعىرتۋ باعىتىن بەلگىلەيدى.
بەيجىڭدە قازاقستاندى زەرتتەۋ ورتالىعىنىڭ ديرەكتورى، پروفەسسور يۋي مۋحۋن Kazinform تىلشىسىنە وسىنداي پىكىر ايتتى.
قىتايلىق ساراپشى اتاپ وتكەندەي، قازاقستان تاۋەلسىزدىگىنىڭ 35 جىلدىعىمەن جانە جاڭا كونستيتۋتسيانىڭ كۇشىنە ەنۋىمەن تۇسپا-تۇس كەلگەن وسى تاريحي ساتتە «حالىقتىق قۇرىلىس» اۋقىمدى ينفراقۇرىلىمدىق باعدارلاماسى جولداۋدىڭ نەگىزگى تاقىرىبىنا اينالدى.
- جولداۋدىڭ ەڭ ايقىن پراكتيكالىق قۇرالى بۇكىل ەل بويىنشا الەۋمەتتىك، كولىك جانە كوممۋنالدىق ينفراقۇرىلىمدى دامىتۋعا باعىتتالعان «حالىقتىق قۇرىلىس» اۋقىمدى ينفراقۇرىلىمدىق باعدارلاماسى بولدى، - دەپ اتاپ ءوتتى ول.
يۋي مۋحۋن ىشكى جانە سىرتقى جاعدايلاردى كەشەندى باعالاۋ نەگىزىندە قازاقستان پرەزيدەنتى ساياسي-ينستيتۋتتىق تاقىرىپتان الەۋمەتتىك- ەكونوميكالىق باسقارۋعا اۋىسىپ، نەگىزگى ەكونوميكالىق كورسەتكىشتەردى جاقسارتۋعا جانە ۇزاق مەرزىمدى ماقساتتاردى انىقتاۋعا نازار اۋدارعانىن ايتتى.
- ىشكى ينستيتۋتسيونالدىق تۇرلەنۋ پروتسەستەرى مەن ماڭىزدى تاريحي داتالار اياسىندا جاريالانعان جولداۋ ادەتتەگى جىلدىق ەسەپ ەمەس، كەرىسىنشە ەلدىڭ ۇزاق مەرزىمدى دامۋىنىڭ ستراتەگيالىق مانيفەسىنە اينالىپ كەلەدى، - دەدى پروفەسسور.
ساراپشى سونىمەن قاتار بۋىنارالىق جاۋاپكەرشىلىك تۇجىرىمداماسىن جانە كوممەرتسيالىق سالاداعى قۇقىقتىق رەتتەۋدىڭ جەتىلدىرىلۋىن اتاپ ءوتتى، جاڭا الاتاۋ قالاسى ءۇشىن ارنايى قۇقىقتىق رەجيمنىڭ ەنگىزىلۋىنە، داۋلاردى دەربەس شەشۋ جانە شەتەلدىك ينۆەستورلار كۇتەتىن ناتيجەلەردى تۇراقتاندىرۋ ءۇشىن جالپى قۇقىققا نەگىزدەلگەن ينۆەستيتسيالىق سوتتىڭ قۇرىلۋىنا توقتالدى.
ونىڭ ايتۋىنشا، جولداۋ قۇبىلمالى حالىقارالىق ارحيتەكتۋرا جاعدايىندا رەسۋرستارعا باعىتتالعان الپاۋىت ەلدىڭ ەگەمەندى دامۋ ستراتەگياسىن ايقىن كورسەتەدى.
- جالعىز كۇش ورتالىعىنا تاۋەلدىلىكتەن اۋلاق بولا وتىرىپ، قازاقستان ءوزىنىڭ مينەرالدىق، اۋىلشارۋاشىلىق جانە ترانزيتتىك ارتىقشىلىقتارىنا سۇيەنەدى، ەۋرازياداعى وندىرىستىك جانە لوگيستيكالىق تىزبەكتەرگە بەلسەندى تۇردە ارالاسادى، - دەدى ول.
ساراپشىنىڭ ايتۋىنشا، قازاقستان ءتيىمدى باسقارۋعا، نارىقتىق ەكونوميكاعا جانە الەۋمەتتىك كەپىلدىكتەرگە نەگىزدەلگەن دامۋ مودەلىن ۇسىنادى. بۇل ءتاسىل باسقا ەلدەر ءۇشىن بىرەگەي جاڭعىرتۋ تاجىريبەسىنە اينالىپ كەلەدى.
بۇعان دەيىن رەسەيلىك ساراپشى قازاقستان پرەزيدەنتى جولداۋىنىڭ الەۋمەتتىك باسىمدىقتارىنا باعا بەرگەن ەدى.
