قىتايلىق باسىلىم: زايسان كولى شينجاڭعا بالىق ونىمدەرىن يمپورتتايتىن ماڭىزدى ورىنعا اينالدى

استانا. KAZINFORM - جەمەنەي كەدەن بەكەتىندەگى يمپورتتىق بالىق ونىمدەرى ەكى جىل قاتارىنان شينجاڭ ولكەسى بويىنشا ءبىرىنشى ورىندا تۇر، دەپ حابارلايدى KAZINFORM ءتىلشىسى قىتايلىق «التاي اقپاراتى» باسىلىمىنا سىلتەمە جاساپ.

جەمەنەي شەكارالىق ەكونوميكالىق ىنتىماقتاستىق ايماعىن باسقارۋ كوميتەتى 2024 -جىلدان باستاپ، جەمەنەي كەدەن بەكەتى ارقىلى بارلىعى 730 توننا سۋ ونىمدەرىن اكەلىپ، جىلدىڭ سايكەس مەزگىلمەن سالىستىرعاندا 47 پايىزعا ارتتىرعان. يمپورت كولەمى ەكى جىل قاتارىنان شينجاڭنىڭ يمپورتتىق سۋ ونىمدەرى بويىنشا الدىڭعى ورىنعا شىققان.

قىتايلىق ب ا ق-تىڭ كەلتىرگەن دەرەگىنە سۇيەنسەك، جەمەنەي وتكەلى قازاقستاننىڭ شىعىس قازاقستان وبلىسىنىڭ زايسان اۋدانىمەن ىرگەلەس. ونىڭ ۇستىنە، اتالعان كەدەن بەكەتى قاراقان، كوكسەركە، شورتان سەكىلدى بالىق تۇرلەرىنە باي زايسان كولىمەن ارا قاشىقتىعى 100 شاقىرىم عانا بولعاندىقتان، سۋ ونىمدەرىن يمپورت ەتەتىن ماڭىزدى ارناعا اينالدى. قىس تۇسۋىنە بايلانىستى، سۋ ونىمدەرىن يمپورت ەتۋ جۇمىسى كۇرت ارتقان. وسى جاعدايعا سايكەس جەمەنەي شەكارالىق ەكونوميكالىق ىنتىماقتاستىق ايماعىن باسقارۋ كوميتەتى جەمەنەي كەدەن بەكەتىمەن بىرلەسىپ، «ءبىردىڭ-بىرگە» دەپ اتالاتىن ساياساتتىق قىزمەت وتەۋ جۇمىسىن ورتاعا قويعان. مۇنداعى ماقسات - بالىق ونىمدەرىن يمپورت ەتۋدەگى قيىن تۇيىندەردى شەشىپ، كاسىپورىنداردىڭ قارجىنى جانداندىرۋىنا دەم بەرىپ، سىرتقى ساۋدانى دامىتۋ.

قىتايدىڭ جەمەنەي شەكارالىق ەكونوميكالىق ىنتىماقتاستىق ايماعىن باسقارۋ كوميتەتى ديرەكتورىنىڭ ورىنباسارى ەرلان مىرزاقالي ۇلى كەدەندىك رەسىمدەۋ تيىمدىلىگىن ارتتىرۋدى جالعاستىراتىنىن ايتادى.

«ءبىز قىزمەت كورسەتۋ ۇلگىسىن تەرەڭدەتۋدى، بيزنەس ورتانى ودان ءارى وڭتايلاندىرۋدى، كەدەندىك رەسىمدەۋ تيىمدىلىگىن ارتتىرۋدى جالعاستىرامىز جانە كاسىپورىن شىعىندارىن ازايتۋ كاسىپورىنداردىڭ كەدەندىك رەسىمدەۋ قىزمەتتەرىن ىڭعايلى جانە ءتيىمدى پايدالانۋىن قامتاماسىز ەتەمىز»، - دەيدى ەرلان مىرزاقالي ۇلى.

اۆتور
بەيسەن سۇلتان ۇلى