قىتايلىق 25 جاستاعى جازۋشى قانداسىمىز سانماو پروزا سىيلىعىن الدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى
تاشكەنتتە تۇركى الەمى ايەل سۋرەتشىلەرىنىڭ شىعارماشىلىعىنا ارنالعان كورمە اشىلدى - ءوزا
تاشكەنت قالاسىنداعى وزبەكستان بەينەلەۋ ونەرى گالەرەياسىندا حالىقارالىق تۇركى مادەنيەتى ۇيىمى (تۇركسوي) مەن وزبەكستان كوركەمسۋرەت اكادەمياسىنىڭ بىرلەسە ۇيىمداستىرۋىمەن «تۇركى الەمى ايەل قولونەرشىلەرى» اتتى حالىقارالىق كورمە ءوتىپ جاتىر.
بۇل تۋرالى وسى اپتادا «ءوز ا» اقپارات اگەنتتىگى حابارلادى.
وزبەكستاندىق ب ا ق-تىڭ دەرەگىنشە، اتالعان كورمەنىڭ يدەياسى 2023 -جىلدىڭ ءساۋىر ايىندا تاشكەنتتە وتكەن تۇركسوي- عا مۇشە مەملەكەتتەردىڭ سۋرەتشىلەرى كورمەسى بارىسىندا، بولاشاققا ارنالعان جوسپارلار مەن جوبالار تالقىلانعان ساتتە تۋىنداعان.
جوبا كوشپەلى كورمە تۇرىندە ۇيىمداستىرىلعان، ونىڭ العاشقى تۇساۋكەسەرى 2024 -جىلى بىشكەكتەگى گ. ايتيەۆ اتىنداعى ۇلتتىق ونەر مۋزەيىندە ءساتتى وتكەن.
بۇل حالىقارالىق ءىس-شارانىڭ نەگىزگى ماقساتى كورمە ارقىلى تۇركى الەمى ايەلدەرىنىڭ شىعارماشىلىعىنا ءتان زاماناۋي بەينەلەۋ ونەرىمەن تانىسۋعا عانا ەمەس، سونىمەن قاتار مادەنيەت پەن ونەردىڭ دامۋىنا قاجەت ءداستۇرلى جانە رۋحاني بىرلىكتى سەزىنۋگە دە مۇمكىندىك جاسالعان.
ايتا كەتەيىك، ەكسپوزيتسيالار قاتارىندا ازەربايجان، قازاقستان، قىرعىزستان، تۇركىمەنستان، تۇركيا جانە وزبەكستاننان كەلگەن سۋرەتشى ايەلدەردىڭ تۋىندىلارى بار.
سونداي-اق وسى اپتادا «ءوز ا»-دا «بوكس: رۋسلان ابدۋللايەۆ كاليفورنيادا جەكپە- جەك وتكىزەدى» دەگەن تاقىرىپتاعى اقپارات جاريالاندى.
حابارلامادا ايتىلۋىنشا، ا ق ش-تىڭ كاليفورنيا شتاتىنداعى وۋشەنسايد قالاسىندا 20-ءساۋىر كۇنى كاسىبي بوكس تۋرنيرى وتەدى. بۇل دودادا وزبەكستاندىق قانداسىمىز دارىندى بوكسشىلاردىڭ ءبىرى رۋسلان ابدۋللايەۆ رينگكە كوتەرىلەدى.
ايتا كەتەيىك، بۇل كەزدەسۋدە تورەشىلەردىڭ ءبىراۋىزدان شىعارعان شەشىمىمەن رۋسلان ابدۋللايەۆ جەڭىسكە جەتىپ، كاسىپقوي بوكستاعى ەكىنشى جەكپە-جەگىندە WBA Continental بەلدىگىن جەڭىپ العان بولاتىن.
«ءوز ا» اقپارات اگەنتتىگىنىڭ مالىمەتىنشە، «Frontwave Arena» سپورت كەشەنى يەلىك ەتەتىن بۇل بوكس كەشىن اتاقتى بۇرىنعى كاسىبي بوكسشى وسكار دە لا حوياعا تيەسىلى «Golden Boy Promotions» پروموۋتەرلىك كومپانياسى ۇيىمداستىرىپ وتىر. وسى كومپانيامەن كەلىسىمشارتقا وتىرعان رۋسلان ابدۋللايەۆ سۋپەرجەڭىل سالماق دارەجەسىندە كاسىبي رينگتەگى ەكىنشى جەكپە- جەگىن فيليپپيندىك جينو رودريگوعا قارسى وتكىزدى.
ايتا كەتۋ كەرەك، رۋسلاننىڭ الداعى قارسىلاسى سپورتتىق مانسابىندا 19 جەكپە-جەك وتكىزىپ، 13 جەڭىس، 4 جەڭىلىس جانە 2 تەڭ ناتيجەگە قول جەتكىزگەن. ال رۋسلان بيىل 7-ناۋرىز كۇنى ا ق ش-تىڭ ينديو قالاسىندا وتكەن تۋرنيردە مەكسيكالىق حوسە ۆالەنسۋەلا الۆارادونى ەكىنشى راۋندتا نوكاۋتپەن جەڭگەن بولاتىن.
سونىمەن قاتار «ءوز ا»-دا «نامانگاندا جىبەك قۇرتىن ءوسىرۋ باستالدى» دەگەن اقپارات جاريالاندى.
اتالعان باسىلىمنىڭ دەرەگىنشە، بيىلعى ماۋسىمدا اۋدان بويىنشا 3970 قوراپ جىبەك قۇرتى ءوسىرىلىپ وتىر. قازىرگى ۋاقىتتا ولاردى ازىقتاندىرۋ ىسىنە ەرەكشە كوڭىل بولىنۋدە. بۇل رەتتە سيرەتىپ باعۋ، ءۇي ىشىندەگى تەمپەراتۋرانى بەلگىلەنگەن نورمادا ۇستاۋ، قوسىمشا جاپىراق دايىنداپ وتىرۋ ماڭىزدى سانالادى.
ايتا كەتۋ كەرەك، اۋداندا 2025 -جىلعى جىبەك ءونىمىن ءوندىرۋ ءۇشىن 134 فەرمەرلىك شارۋاشىلىقپەن كەلىسىمشارت جاسالىپ، 3970 قوراپ جىبەك قۇرتى تۇقىمى ءوسىرىلىپ جاتىر.
التايلىق 25 جاستاعى جازۋشى سانماو پروزا سىيلىعىن الدى - التاي اقپارات ورتالىعى
25 جاستاعى جازۋشى بايان تاسقىن ۇلى 20 ءساۋىر كۇنى جىجياڭ ولكەسى جوۋشان قالاسىنا وتكەن V كەزەكتى سانماو(شالقىما) پروزا فەستيۆالىنىڭ جاستار نوميناتسياسى بويىنشا جۇلدەلى ورىنعا يە بولدى، دەپ حابارلايدى قىتايدىڭ التاي اقپارات ورتالىعى.
اتالعان ب ا ق-تىڭ دەرەگىنشە، بيىل 5-قاڭتار كۇنى 5-كەزەكتى سانماو پروزا سىيلىعىنا يە بولعان تۋىندىلاردىڭ ءتىزىمى جاريالاندى. بايان تاسقىن ۇلى «قىران جاعاسىندا» اتتى شالقىماسىمەن V كەزەكتى سانماو سىيلىعىنىڭ جەكە ءتۇرى بويىنشا ياعني جاستار سىيلىعىنا يە بولعان.
التاي جاس جازۋشى باياننىڭ شىعارماشىلىعىندا نەگىزگى تاقىرىپ بولىپ كەلەدى ەكەن. ويتكەنى بۇل جەر ونىڭ تۋعان جەرى عانا ەمەس، ونىڭ ادەبي جاسامپازدىعىنىڭ سارقىلماس قازىناسى. ونىڭ تۋىندىلارىنىڭ ءتىلى قاراپايىم، شىنايى، سۇيىسپەنشىلىككە تولى بولىپ، وزىندىك ەرەكشەلىككە يە ءستيىلىن قالىپتاستىرعان.
1999 -جىلى شينجاڭنىڭ التاي قالاسىندا دۇنيەگە كەلگەن بايان تاسقىن ۇلى گۋاڭجوۋ ۋنيۆەرسيتەتىنىڭ قىتاي ءتىل-ادەبيەتى ماماندىعىن وقىعان. لۋشۋن ادەبيەت ينيستيتۋتىنىڭ شينجاڭدى مادەنيەتپەن قامتۋ جازۋشىلارىن تاربيەلەۋ كۋرسىنىڭ كۋرسانتى. ول گۋانجوۋ قالالىق جاس جازۋشىلار قوعامىنىڭ جانە شينجاڭ جازۋشىلار قوعامىنىڭ مۇشەسى.
جاس جازۋشى 3 جىلدان بەرى التايدىڭ كوركەم كورىنىستەرىن، ادامداردى، جەرگىلىكتى سالت- ءداستۇردى، ءومىردىڭ وزگەرىسىن جازدى. ونىڭ التاي تاقىرىبىنداعى جەلىلەس شىعارمالارى «ۇلتتار ادەبيەتى جيناعى»، «باتىس بولىك» جانە «شالقىمالار جيناعىنىڭ شەتەلگە ارنالعان باسىلىمى» سياقتى ادەبي جۋرنالداردا ارت-ارتىنان تانىستىرىلعان.
بايان تاسقىن ۇلىنىڭ «ءومىر بازارىنان قيانعا كوز جىبەرۋ» اتتى جيناعى 2023 -جىلعى اۆتونوميالى ولكەلىك ادەبيەت جانە كوركەم تۋىندىلاردى دامىتۋ جوباسىنا ەنگىزىلگەن.
«قىران جاعاسىندا» 2023 -جىلعى قىتايدىڭ «ۇلتتار ادەبيەتى» جىلدىق ماراپاتىنا يە بولسا «تاۋ قالاسىنداعى ەستەلىكتەر» V گۋانجوۋ جاستار ادەبيەت بويىنشا سىيلىعىن العان.
وسى جولعى سانماو(شالقىما) پروزا سىيلىعىنا يە بولعان «قىران جاعاسىندا» بايان تاسقىن ۇلى ۋنيۆەرسيتەتتى ءبىتىرىپ اۋىلىنا قايتىپ كەلگەننەن كەيىن جازعان دەرەكتى شىعارماسى. التاي قالاسى لاستى اۋىلى نوعايتى قىستاعىن نەگىزگى تاقىرىپ ەتىپ، ءوزىنىڭ بالالىق شاعىنان ەرجەتكەنگە دەيىن قىران وزەنى جاعاسىندا اتا-اجەسىمەن بىرگە ءومىر كەشىرمەلەرى جازىلىپ، ەسەيىپ-ەرجەتۋ بارىسى ارقىلى وقىرماندارىنا ءوزىنىڭ تابيعات جونىندەگى تۇسىنىگىن بولىسكەن.
«قىران جاعاسىندا» اتتى شىعارمام مەنىڭ 2022-جىلى جاريالاعان «التاي جەلىلەس شالقىمالار» جيناعىمنان الىنعان. شىعارمامدا التايدىڭ بايتاق دالاسىن جازۋمەن بىرگە، ءوزىمنىڭ جان دۇنيەمدى دە بەينەلەۋگە تىرىستىم. وسى شىعارمام ارقىلى كوپتەگەن ادامنىڭ التايدى تانۋىنا، التايدى تۇسىنۋىنە، التايعا كەلۋىنە مۇمكىندىك جاساسام دەيمىن، - دەدى بايان تاسقىن ۇلى.
قازاقستاندىق ونىمدەر العاش رەت قىتايدىڭ حالىقارالىق تۇتىنۋ تاۋارلارى كورمەسىندە بوي كورسەتتى - «حالىق گازەتى»
قىتايدىڭ حاينان ولكەسىنىڭ حايكوۋ قالاسىندا ءوتىپ جاتقان قىتايدىڭ 5- حالىقارالىق تۇتىنۋ تاۋارلارى كورمەسىندە قازاقستاندا وندىرىلگەن جوعارى ساپالى تاۋارلاردىڭ الۋان ءتۇرى العاش رەت بوي كورسەتىپ، كوپتەگەن قىتايلىق جانە شەتەلدىك قوناقتىڭ نازارىن اۋداردى، دەپ جازادى «حالىق گازەتى».
قىتايلىق ب ا ق-تىڭ مالىمەتىنشە، بۇل ەكسپو - بيىل قىتايدا وتكەن تۇتىنۋ تاۋارلارىنىڭ العاشقى اۋقىمدى حالىقارالىق كورمەسى. كورمەنىڭ جالپى اۋدانى 160000 شارشى مەتردەن اسادى، كورمەگە قاتىسۋ ءۇشىن 71 ەل مەن ايماقتان 4000 نان استام برەند قاتىستى. قازاقستاندىق كورمە اۋماعىندا نەگىزىنەن وتاندىق وندىرىلگەن كامپيتتەر، گازدالعان سۋسىندار، وسىمدىك مايلارى، ءسۇت ونىمدەرى، ونىڭ ىشىندە تۇيە ءسۇتى مەن جىلقى ءسۇتىنىڭ ۇنتاعى جانە باسقا دا ارنايى ونىمدەر كورسەتىلدى.
سونداي-اق بۇل جولعى كورمەنىڭ تاعى ءبىر ەرەكشەلىگى - كورمەدەگى ماڭىزدى ەكسپوناتتارىنىڭ ءبىرى تۇتىنۋ تاۋارلارى سالاسىنداعى قازىرگى عىلىمي-تەحنيكالىق دامۋ تەندەنسياسىن كورسەتەتىن ۇشقىشسىز ۇشۋ اپپاراتتارى، روبوتتار، ەلەكتروموبيلدەر جانە باسقا دا كوپتەگەن يننوۆاتسيالىق جەتىستىكتەر سياقتى جوعارى تەحنولوگيالىق ونىمدەر بولدى.
سونىمەن قاتار وسى اپتادا «حالىق گازەتى» باسىلىمىندا «الماتىدا «قىتايدا وقۋ» كورمەسى اشىلدى» دەگەن اقپارات جارىق كوردى.
اتالعان ب ا ق-تىڭ دەرەگىنشە، 20-ساۋىردە الماتىدا قازاقستانداعى ەكىنشى HSK «قىتايدا وقۋ» كورمەسى ءوتتى. كورمەدە قىتايدىڭ 34 جوعارى وقۋ ورنى ستەندتەرىن قويىپ، قازاقستاندىق ستۋدەنتتەر مەن اتا-انالارعا قىتايدا وقۋ ماسەلەلەرى تۋرالى اقپارات بەردى.
بۇل جولعى ءىس-شارانى قىتاي ءبىلىم مينيسترلىگىنىڭ قىتاي جانە شەتەل ءتىلى الماسۋ جانە ىنتىماقتاستىق ورتالىعى حانكاۋ حالقارالىق ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ كونفۋتسيي ينستيتۋتى ۇيىمداستىردى. ستاتيستيكاعا سايكەس، سول كۇنى كورمەگە 3000 عا جۋىق وقۋشى مەن اتا-انا قاتىسقان.
ءبىر ميلليون ستۋدەنتكە جاساندى ينتەللەكت ۇيرەتۋ باستالادى - Parstoday
يران يسلام رەسپۋبليكاسى ۆيتسە-پرەزيدەنتىنىڭ عىلىم جونىندەگى كومەكشىسى ءبىر ميلليون يراندىق وقۋشىعا جاساندى ينتەللەكت ۇيرەتۋ جوباسىنىڭ رەسمي باستالعانىن حابارلادى، دەپ جازدى Parstoday اقپارات اگەنتتىگى.
اتالعان اقپارات اگەنتتىگىنىڭ مالىمەتىنشە، يران يسلام رەسپۋبليكاسى ۆيتسە-پرەزيدەنتىنىڭ عىلىم، تەحنولوگيا جانە بىلىمگە نەگىزدەلگەن ەكونوميكا بويىنشا كومەكشىسى مودجتابا اليزادە تەحنولوگيانىڭ وسى سالاسىنا قىزىعۋشىلىق تانىتقانداردىڭ بارلىعىنا جاساندى ينتەللەكتتى ۇيرەتۋ ۇدەرىسىنىڭ باستالۋىنا توقتالعان.
ونىڭ ايتۋىنشا، قوعامنىڭ بارلىق توپتارى، اسىرەسە ستۋدەنتتەر مەن باسقا دا مۇددەلى تۇلعالار وسى ءبىلىم بەرۋ پلاتفورماسىنىڭ مۇمكىندىكتەرىن تەگىن پايدالانىپ، جاساندى ينتەللەكت تەحنولوگياسىنا قاتىستى ماڭىزدى تاقىرىپتاردى مەڭگەرە الادى.
ParsToday اقپارات اگەنتتىگىنىڭ حابارلاۋى بويىنشا، اليزادە جاساندى ينتەللەكت سالاسىنداعى قوعامنىڭ حاباردارلىعى مەن قوعام مۇمكىندىكتەرىنىڭ دەڭگەيىن ارتتىرۋ وسى باعدارلامانى جۇزەگە اسىرۋدىڭ ەڭ ماڭىزدى ماقساتى ەكەنىن ايتقان. سونداي-اق، بۇل باعدارلامانىڭ ءبىرىنشى قادامىن قازىر يران پرەزيدەنتتىگىنىڭ عىلىم، تەحنولوگيا جانە بىلىمگە نەگىزدەلگەن ەكونوميكا ۆيتسە-پرەزيدەنتى يراننىڭ ءبىلىم مينيسترلىگىمەن ىنتىماقتاستىعى اياسىندا باستالعانىن تالگە تيەك ەتكەن.
اليزادەنىڭ ايتۋىنشا، بۇل باعدارلاماعا 7 مەن 15 جاس ارالىعىنداعى ءبىر ميلليون وقۋشىنىڭ تەوريالىق جانە پراكتيكالىق ءبىلىم الۋى ءۇشىن ينتەللەكتۋالدى جانە تارتىمدى تۇردە ازىرلەنگەن جانە جوسپارلانعان.
حالىقارالىق كوشى-قون ۇيىمى: «قورشاۋداعى گازادا ۇيلەردىڭ %90 قيراعان نەمەسە بۇلىنگەن» - TRT
حالىقارالىق كوشى-قون ۇيىمى قونىس اۋدارعان پالەستينالىقتارعا باسپانا كومەگىنىڭ دايىن ەكەنىن مالىمدەپ، يزرايلدەن شەكارا وتكەلدەرىن اشۋدى تالاپ ەتتى. بىرىككەن ۇلتتار ۇيىمىنىڭ گۋمانيتارلىق ىستەردى ۇيلەستىرۋ كەڭسەسىنىڭ دەرەكتەرىنە سىلتەمە جاساعان حالىقارالىق كوشى-قون ۇيىمى گازاداعى ۇيلەردىڭ 90 پايىزدان استامىنىڭ قيراعانىن نەمەسە زاقىمدانعانىن حابارلادى. يزرايل شابۋىلدارى پالەستينالىقتاردى گۋمانيتارلىق اپاتقا ۇشىراتۋدا، دەپ جازادى تۇركيا راديو تەلەۆيزيا پورتالى.
اتالعان ب ا ق-تىڭ كەلتىرگەن مالىمەتتەرىنە سۇيەنسەك، «قاۋىپسىز جەر بولماعاندىقتان، وتباسىلار قاۋىپتى ۇيىندىلەردى پانالاۋعا ءماجبۇر»، - دەپ جازعان ۇيىم «X» پلاتفورماسىنداعى جازباسىندا. «حالىقارالىق كوشى-قون ۇيىمى باسپاناعا كومەك كورسەتۋگە دايىن، شەكارا وتكەلدەرى قازىر اشىلۋى كەرەك»، - دەپ ۇندەۋ جاساعان.
تۇركيالىق ب ا ق-تىڭ دەرەگىنشە، يزرايل وسى ۋاقىتقا دەيىن 51300-دەن استام پالەستينالىقتى ءولتىردى. ولاردىڭ كوپشىلىگى ايەلدەر مەن بالالار. كەيىن بۇل كورسەتكىش 62 مىڭعا شىقتى. سونىمەن قاتار تەل-اۆيۆ بلوكاداداعى ايماقتىڭ بۇكىل حالقىن ىعىستىرىپ، ايماقتىڭ كوپ بولىگىن قيراندىعا اينالدىردى.
اۆتور
بەيسەن سۇلتان ۇلى
