«قىتايلار قىزىعىپ وتىر»: قازاقستان ديماشتىڭ اتىن تۋريستىك جوباعا پايدالانباق

  ەلىمىزدە ديماش قۇدايبەرگەن اتىنداعى جاڭا تۋريستىك باعىت اشىلادى. وسى ارقىلى قازاقستانعا الەم ساياحاتشىلارىن تارتۋ كوزدەلىپ وتىر.

بۇل تۋرالى بەيجىڭدە ءوتىپ جاتقان اقتوبە وبلىسىنىڭ تۋريستىك الەۋەتىن تانىستىرۋ ءىس-شاراسى كەزىندە بەلگىلى بولدى. باستاما اسىرەسە قىتايلىقتاردىڭ ەرەكشە قىزىعۋشىلىعىن تۋدىردى، دەپ جازادى 24.kz.

ديماش قۇدايبەرگەننىڭ ونەرى مەن تانىمالدىعى قازاقستانعا ميلليونداعان تۋريست تارتۋعا باعىتتالادى. اقتوبەلىكتەر ونەرپازدىڭ تۋعان جەرىنە ءتۇرلى ساياحاتتار ۇيىمداستىرۋدى جوسپارلاپ وتىر. جاڭا تۋريستىك باعىت «Dimash Tour» دەپ اتالادى. ساياحات بارىسىندا شەتەلدىك قوناقتارعا ديماشتىڭ تۋعان ولكەسى، وقىعان مەكتەبى، وتىرعان پارتاسى، بالالىق شاعى وتكەن جەردى كورسەتىلەدى. سونىمەن قاتار ءانشىنىڭ ونەرىن شىڭداعان العاشقى ۇستازدارىمەن كەزدەسۋلەر وتكىزىلەدى.

ۇيىمداستىرۋشىلار بۇل ساياحاتشىلاردى قىزىقتىراتىنىنا سەنىمدى. قىتاي تۋريستىك يندۋسترياسىنىڭ تاجىريبەلى ماماندارى وسى باعىتتا بىرلەسىپ جۇمىس ىستەپ، كەلەشەكتە دامىتۋعا نيەت ءبىلدىرىپ وتىر. ولار بۇل باستامانىڭ پەرسپەكتيۆاسى جوعارى دەپ سانايدى. قىتاي ەلىندە الداعى بىرنەشە كۇن بويى اقتوبە وبلىسىنىڭ تۋريستىك الەۋەتى تانىستىرىلادى. جوبانىڭ باستاماسى رەتىندە بەيجىڭدە ديماش قۇدايبەرگەننىڭ ۆوكال بويىنشا العاشقى ۇستازى مارات ايتىموۆپەن كەزدەسۋ وتكىزىلىپ، ونەرپازدىڭ شىعارماشىلىعى كورسەتىلدى.

بۇدان بولەك، ۇلتتىق تاعامدار، ۇلتتىق مۋزىكا مەن مادەني كورىنىستەر قويىلىپ جاتىر. قولونەرشىلەر شەبەرلىك ساباقتارىن وتكىزىپ، بىرەگەي كادەسىي مەن بۇيىمدارىن كوپشىلىكتىڭ نازارىنا ۇسىندى. سونىمەن قاتار پانتوتەراپيا بويىنشا ەمدىك شارالارى تانىستىرىلدى.

«وسى مۇمكىندىكتى ءبىز ماكسيمالدى تۇردە پايدالانا ءبىلۋىمىز كەرەك. ول ءۇشىن كوپ جۇمىس ىستەلۋى كەرەك. ونى ءبارىمىز جاقسى تۇسىنەمىز. اقتوبە وڭىرىندەگى جالپى ءارتۇرلى شارۋامەن، بيزنەسپەن اينالىساتىن سونىڭ وكىلدەرى كەلىپ وتىر. قىتاي ەلى وسى باعىتتى دامىتۋعا شىن كوڭىلمەن كىرىسسە، ولاردىڭ قولىنان كوپ نارسە كەلەدى. ءبىز ونى بىلەمىز. وسى باعىتتا كەلىپ وتىرمىز»، دەيدى ديماشتىڭ ۇستازى مارات ءايتىموۆ.

ءىس- شارا «Road Show-visit Aktobe 2023» دەگەن اتاۋمەن ءوتىپ جاتىر. وعان قىتاي حالىق رەسپۋبليكاسى تۋريستىك يندۋسترياسىنىڭ وكىلدەرى، قاۋىمداستىقتار، تۋريستىك اگەنتتىكتەر قاتىسىپ جاتىر.

«ءبىزدىڭ جالپى 19 لوكاتسيامىز بار. ول ەكولوگيالىق تۋريزم. ءبىزدىڭ ەڭ تانىمال جەرىمىز - بايعانين اۋدانىنداعى ەكى جەر. كەلەسى جىلى تۋريستەرمەن جۇمىس ىستەيمىز دەگەن ماقساتىمىز بار. بىلتىر اقتوبە وبلىسىنا 5-6 مىڭ شەتەلدىك ازامات كەلدى. كەلۋشىلەر سانىن 8-9 مىڭعا دەيىن جەتكىزۋ جوسپارىمىزدا بار. شەتەلدىك تۋريستەردى تارتۋ كەرەك»، دەيدى «Vizit Aktobe» ورتالىعىنىڭ ديرەكتورى ەرسايىن ءسۇيىنوۆ.

باستى ماقسات وبلىستىڭ تۋريستىك ورىندارىن دامىتۋ. وڭىردە ونەركاسىپتىك، ەكولوگيالىق، مەديتسينالىق جانە مادەني- تانىمدىق باعىتتارعا باسىمدىق بەرىلىپ وتىر. اسىرەسە تابيعاتى تۇمسا ولكەلەرگە تۋر باعىتتار ۇيىمداستىرىلادى. ونىڭ ىشىندە اقتولاعاي جانە اقبوتا-ساڭكىباي بورلى تاۋلارى، اققۇم قۇمدى القابى، بارقىن قۇمدار، «قاسقىر» سارقىراماسى، اققايىڭ ورمانى بار. ايتا كەتۋ كەرەك، 2024 -جىل قازاقستاننىڭ قىتايداعى تۋريزم جىلى. بۇگىنگى شارا تىكەلەي وسىعان باعىتتالعان. اقتوبە ءوڭىرىنىڭ تۋريستىك الەۋەتىن تانىستىرۋ شارالارى 9-جەلتوقسان شانحاي قالاسىندا دا ۇيىمداستىرىلادى. ال 11-جەلتوقسان كورەيادا وتەدى.