قىتايدىڭ گيبريدتى جۇك تاسيتىن درون ۇشاعى العاش رەت اۋەگە كوتەرىلدى
استانا. KAZINFORM - قىتايدا YH-1000S اتتى ەرەكشە گيبريدتى جۇك درونى العاش رەت ۇشتى. بۇل وقيعا چۋڭشيڭ قالاسىندا (وڭتۇستىك- باتىس قىتاي) ءوتتى، دەپ حابارلادى شينحۋا درون جاساۋشى كومپانياسىعا سىلتەمە جاساپ.
قىتايدىڭ اۋە جانە عارىش عىلىمي- تەحنيكالىق كورپوراتسياسىنىڭ 11- عىلىمي-زەرتتەۋ ينستيتۋتىنىڭ مالىمەتى بويىنشا، دەبيۋتتىك ۇشۋ كەزىندە YH-1000S جوعارى قۋاتتى گيبريدتى قوزعالتقىشپەن جابدىقتالعان.
بۇل قوزعالتقىش جاڭا ەنەرگيا كوزدەرىن پايدالانىپ، كولىك قۇرالى وندىرۋشىمەن بىرلەسىپ جاسالعان.
جاڭا ۇلگى الدىڭعى YH-1000 ۇشاعىمەن سالىستىرعاندا قىسقا قونۋ- قابىلداۋ قاشىقتىعىنا، ارتتىرىلعان جۇك كوتەرگىشتىككە جانە ۇشۋ قاشىقتىعىنىڭ ۇلعايۋىنا يە. YH-1000 العاشقى ۇشۋىن وتكەن جىلدىڭ مامىر ايىندا جاساعان بولاتىن.
بۇل ءىرى جۇك تاسيتىن دروندى جوبالاۋ كەزىندە الەمدىك نارىقتاعى الەۋەتتى كليەنتتەردىڭ قاجەتتىلىكتەرى ەسكەرىلگەن.
ۇشاق حالىقارالىق لوگيستيكا مەن تاسىمالداۋ، اپاتتى-قۇتقارۋ جۇمىستارى، تابيعي اپات سالدارىن جويۋ، اۋا رايىن جاساندى رەتتەۋ، تەڭىز ورتاسىن باقىلاۋ جانە تەڭىز شارۋاشىلىعىن رەتتەۋ سياقتى ءارتۇرلى سالالاردا قولدانىلۋى مۇمكىن.
بۇدان بۇرىن قىتايلىق كومپانيا ەلىمىزدە كۇردەلى گاز وندىرۋگە 7,5 ميلليارد دوللار ينۆەستيتسيا سالاتىنى بەلگىلى بولدى.
