قىتايدىڭ قازىرگى قاۋىپسىزدىگى قانداي دەڭگەيدە

بەيجىڭ. KAZINFORM - قىتاي ۇلتتىق قورعانىس مينيسترلىگى سايتىنىڭ حابارلاۋىنشا، قىتاي حالىق ازاتتىق ارمياسى مەن قارۋلى پوليتسيا كۇشتەرى دەلەگاتسياسىنىڭ باسپا ءسوز حاتشىسى ۋ چيان قىتايدىڭ 14-شى حالىق قۇرىلتايىنىڭ ەكىنشى وتىرىسىندا ب ا ق وكىلدەرىنە قىتايدىڭ قاۋىپسىزدىك جاعدايى بارعان سايىن تۇراقسىز بولىپ بارادى. ال اسكەري كۇرەس مىندەتتەرى اۋىر دەپ مالىمدەدى.

قىتاي ۇلتتىق قورعانىس مينيسترلىگىنىڭ وكىلى ۇلتتىق قورعانىس - ەل مەن ۇلتتىڭ امان قالۋى مەن دامۋىنىڭ قاۋىپسىزدىك كەپىلى ەكەنىن ايتتى.

«قازىر الەم ءجۇز جىلدا بولماعان وراسان زور وزگەرىستەرمەن بەتپە-بەت كەلىپ وتىر. ساياسي داۋلار مەن اسكەري قاقتىعىستار حالىقارالىق دەڭگەيدە كوپتەگەن جەردە بولدى، قىتايدىڭ ىشكى سەپاراتيستىك كۇرەسى دە وتە كۇردەلى»، - دەدى ول.

ۋ چيان قىتاي ۇكىمەتىنىڭ ۇلتتىق قورعانىس قۇرىلىسىنا ساليقالى كوزقاراس تانىتىپ، اسكەري شىعىندار مەن ۇلتتىق ەكونوميكا اراسىنداعى ۇيلەستىرۋدى قامتاماسىز ەتەتىنىن باسا ايتتى.

ول سونداي-اق ا ق ش سياقتى اسكەري دەرجاۆالارمەن سالىستىرعاندا قىتايدىڭ اسكەري شىعىندارى ءوزىنىڭ ىشكى جالپى ءونىمى مەن قارجىسىمەن سالىستىرعاندا وتە تومەن دەڭگەيدە، جان باسىنا شاققانداعى اسكەري شىعىندار ا ق ش سياقتى ءىرى ەلدەرگە قاراعاندا الدەقايدا تومەن ەكەنىن قوستى.

5-ناۋرىزدا جاريالانعان قىتاي ۇكىمەتىنىڭ جۇمىسى تۋرالى ەسەپ قىتايدىڭ 2024 -جىلى قورعانىس شىعىندارى بيۋدجەتىن 7,2 پايىزعا ارتتىرىپ، 1 تريلليون 665 ميلليارد يۋانعا جەتكىزەتىنىن كورسەتتى.

سونداي-اق باياندامادا قىتايدىڭ 2024 -جىلى اسكەري دايىندىقتى جان-جاقتى كۇشەيتىپ، ناقتى شايقاسقا دايىندالاتىنى باسا ايتىلدى.

اۆتور
مۇقتار مۇرات