قىتايدىڭ قازاقستانداعى جاڭا توتەنشە جانە وكىلەتتى ەلشىسى استاناعا كەلدى

استانا. قازاقپارات - 30-جەلتوقساندا استاناعا قىتاي حالىق رەسپۋبليكاسىنىڭ قازاقستان رەسپۋبليكاسىنداعى جاڭا توتەنشە جانە وكىلەتتى ەلشىسى حان چۋنلين كەلدى.

قىتايدىڭ قازاقستانداعى ەلشىلىگىنىڭ حابارلاۋىنشا، حان چۋنليندى اۋەجايدا قازاقستاننىڭ سىرتقى ىستەر مينيسترلىگىنىڭ قىزمەتكەرلەرى مەن قىتايدىڭ قازاقستانداعى ديپلوماتيالىق ميسسياسىنىڭ قىزمەتكەرلەرى قارسى الدى.

ەلشى ءوز كەزەگىندە قازاقستاندىقتارعا ريزاشىلىعىن ءبىلدىردى. ول سونىمەن قاتار ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 33 جىل تولۋىنا وراي ونى قىتاي باسشىسى شي جينپيڭ ق ح ر-دىڭ ق ر داعى 12-توتەنشە جانە وكىلەتتى ەلشىسى قىزمەتىنە تاعايىنداعانىن قۇرمەت تۇتاتىنىن اتاپ ءوتتى.

- وسىدان 33 جىل بۇرىن ەكى ەل باسشىلارىنىڭ ستراتەگيالىق باسشىلىعىمەن ديپلوماتيالىق قارىم-قاتىناس ورناتقاننان بەرى قىتاي مەن قازاقستان قارىم-قاتىناسى ۇزدىكسىز سەرپىندى دامۋعا قول جەتكىزدى. سونداي-اق تۇراقتى جان-جاقتى ستراتەگيالىق ارىپتەستىك تاريحىنداعى ەڭ جوعارى دەڭگەيگە كوتەرىلدى، - دەدى حان چۋنلين.

سونىمەن بىرگە ەلشى قىتايدىڭ قازىر شاڭحاي ىنتىماقتاستىق ۇيىمىنىڭ كەزەكتى ءتوراعاسى ەكەنىن، ال قازاقستان كەلەسى جىلى ەكىنشى «قىتاي- ورتالىق ازيا» سامميتىن وتكىزەتىنىن تىلگە تيەك ەتتى. چۋنلين وسىنداي ماڭىزدى ساتتە جاۋاپتى قىزمەتكە تاعايىندالۋ وعان ۇلكەن جاۋاپكەرشىلىك جۇكتەيتىنىن ايتتى.

ول ەكى مەملەكەت باسشىلارى جۇكتەگەن مىندەتتەردى ادال اتقاراتىنىن، قىتاي مەن قازاقستان قارىم-قاتىناسىنىڭ «جاڭا التىن وتىز جىلدىعىن» قۇرۋعا بەلسەندى تۇردە ۇمتىلاتىنىن باسا ايتتى.

ايتا كەتەيىك، حان چۋنلين 1970 -جىلى دۇنيەگە كەلگەن. ول بۇعان دەيىن قىتاي حالىق رەسپۋبليكاسىنىڭ رۋمىنياداعى ەلشىسى (2022 -جىلدىڭ مامىرىنان 2024 -جىلدىڭ جەلتوقسانىنا دەيىن) قىزمەتىن اتقارعان.

ەسكە سالساق، 2024 -جىلدىڭ 2-جەلتوقسانىندا مەملەكەت باسشىسى قىتايدىڭ قازاقستانداعى وكىلەتتى ەلشىسى جاڭ شياۋدى قابىلدادى. كەزدەسۋ بارىسىندا پرەزيدەنت جاڭ شياۋدىڭ قازاق- قىتاي دوستىعىن تابىستى دامىتۋعا، مەملەكەتارالىق بايلانىستاردى تەرەڭدەتۋگە قوسقان ۇلەسىن جوعارى باعالاپ، II دارەجەلى «دوستىق» وردەنىمەن ماراپاتتادى.

اۆتور

مۇقتار مۇرات