قىتايدىڭ مەملەكەت جانە قوعام قايراتكەرى ءجانابىل سىماعۇل ۇلى دۇنيە سالدى

استانا. KAZINFORM - قىتايداعى قانداستار اراسىنان شىققان كورنەكتى مەملەكەت جانە قوعام قايراتكەرى، قىتايدىڭ ش ۇ ا ءو حالىق ۇكىمەتى ءتوراعاسىنىڭ بۇرىنعى ورىنباسارى، شينجاڭ ۇيعىر اۆتونوميالىق ولكەسى ساياسي كەڭەسىنىڭ ءتوراعاسى بولعان ارداقتى ەل اعاسى ءجانابىل سىماعۇل ۇلى 22-قاراشا كۇنى 90 جاسىندا دۇنيەدەن ءوتتى.

ايتا كەتەيىك، قىتايدىڭ مەملەكەت جانە قوعام قايراتكەرى ءجانابىل سىماعۇل ۇلى 1934-جىلى ءساۋىر ايىندا التاي ايماعى قابا اۋدانىندا دۇنيەگە كەلگەن، ەڭبەك جولىن 1951-جىلى باستاعان. 1953-جىلى تامىز ايىندا ق ح ر كوممۋنيستىك پارتياسىنا مۇشە بولىپ قابىلدانعان. جوعارى ءبىلىم ماعۇلىماتىنا يە. شينجاڭ ۇيعىر اۆتونوميالى ولكەسىنىڭ ورىنباسار ءتوراعاسى، شينجاڭ ۇيعىر اۆتونوميالى ولكەلىك پارتيا كوميتەتىنىڭ تۇراقتى مۇشەسى، ورىنباسار حاتشىسى، شينجاڭ ۇيعىر اۆتونوميالى ولكەلىك ساياسي كەڭەستىڭ ءتوراعاسى سىندى مىندەتتەردى اتقارعان.