قىتايدىڭ شيان قالاسىندا «ورتالىق ازيا ساياباعى» اشىلدى
استانا. KAZINFORM - قىتايدىڭ شيان قالاسىندا 19-مامىردا «ورتالىق ازيا ساياباعى» رەسمي تۇردە اشىلدى.
«Chinanews» حابارلاۋىنشا، بۇل ساياباقتى سالۋداعى ماقسات - شيان قالاسىندا قىتاي مەن ورتالىق ازيا اراسىنداعى مادەني الماسۋلاردى، ءتۋريزمدى ىلگەرىلەتۋدى، ەكونوميكالىق جانە ساۋدا كەلىسسوزدەرىن بىرىكتىرەتىن جاڭا پلاتفورماداعى حاب قۇرۋ بولماق.
بۇكىل ساياباق شامامەن 54 گەكتار اۋماقتى الىپ جاتىر. ساياباقتىڭ تاقىرىپتىق ديزاينى «جاسىل، اشىق، ينكليۋزيۆتى، يننوۆاتسيالىق جانە تابيعاتتى ساقتاۋ» تۇجىرىمدامالارىنا نەگىزدەلگەن جانە ورتالىق ازيانىڭ كوپتەگەن مادەني ەلەمەنتتەرىن بىرىكتىرەدى.
ساياباق كوركەم كورىنىس ايماعى، ىسكەرلىك كونفەرەنتسيا الاڭى، ورتالىق ازيا ونىمدەرىنىڭ كورمە زالى جانە ورتالىق ازيا تاعامدار الاڭى سياقتى ءارتۇرلى ايماقتارمەن جابدىقتالعان.
ورتالىق ازيا ونىمدەرىنىڭ كورمە زالىندا ورتالىق ازيا ەلدەرىنىڭ 1000 نان استام ءونىمى قويىلىپ، ساتىلادى.
19-مامىر - «شيان ورتالىق ازيا ساياباعىنىڭ» اشىلۋىنىڭ ءبىرىنشى كۇنى. قىتايلىق باق كوزدەرى كوپتەگەن سيان تۇرعىندارىنىڭ ساياباققا بارىپ، تاۋار ساتىپ الىپ جاتقانىن حابارلادى.
ورتالىق ازيا تاۋارلارى، سونداي-اق وسى ەلدەردىڭ ەرەكشە مادەنيەتتەرى قىتاي حالقىنىڭ ۇلكەن قىزىعۋشىلىعىن تۋدىرۋدا. ساياباقتا قۇرىلعان ورتالىق ازيا تۋريستىك قىزمەت كورسەتۋ ورتالىعىندا كوپتەگەن ادامدار ورتالىق ازيا ەلدەرىنە ساياحاتتاۋ ءۇشىن قالاي بارۋعا بولاتىنى تۋرالى كەڭەس الىپ جاتىر.
Chinanew news حابارلاعانداي، شيان «ورتالىق ازيا ساياباعىن» ورتالىق ازيا ەلدەرىمەن مادەني الماسۋ ءۇشىن برەند الاڭىنا اينالدىرۋدى جانە قىتاي مەن ورتالىق ازيانىڭ بەس ەلىنىڭ مادەني بايلانىستارىن ىلگەرىلەتۋدى جوسپارلاپ وتىر.
اۆتور
مۇقتار مۇرات
