قىتايدىڭ ءدىن ليدەرلەرى قازاقستاننىڭ كونفەسسياارالىق ديالوگتى نىعايتۋ جونىندەگى باستامالارىنا قولداۋ ءبىلدىردى
استانا. KAZINFORM - پارلامەنت سەناتىنىڭ ءتوراعاسى، الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ مەڭگەرۋشىسى ماۋلەن اشىمبايەۆ قىتايعا ساپارى اياسىندا ق ك پ و ك بىرىككەن مايدان ءبولىمىنىڭ مەڭگەرۋشىسى شي تايفەنمەن جانە قىتايدىڭ ءدىن ليدەرلەرىمەن كەزدەستى.

قىتايدىڭ ءدىن ليدەرلەرىمەن كەزدەسۋدە الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمبايەۆ جاھاندىق جانە وڭىرلىك كۇن تارتىبىندەگى كوپتەگەن ماسەلە بويىنشا قازاقستان مەن قىتايدىڭ ۇستانىمدارى سايكەس ەكەنىنە نازار اۋداردى. ەكى ەل دە الەمنىڭ ۇيلەسىمدى دامۋىن جانە تۇراقتىلىعى مەن قاۋىپسىزدىگىن قامتاماسىز ەتۋگە باسا ءمان بەرەدى. سوندىقتان قازاقستان قىتايدىڭ ادىلەتتى جانە كوپپوليارلى الەم قالىپتاستىرۋعا ارنالعان جاھاندىق باستامالارىن قولدايدى.
- سونداي-اق قازاقستان دا بەيبىتشىلىك پەن كەلىسىمدى نىعايتۋعا باعىتتالعان ءبىرقاتار حالىقارالىق باستاما كوتەردى. ولاردىڭ ءبىرى دە بىرەگەيى - الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋ. وسى ۋاقىتتىڭ ىشىندە سەزد ءدىنارالىق ديالوگتى دارىپتەۋ جانە الەمدەگى وزەكتى پروبلەمالاردى شەشۋ ءۇشىن رۋحاني كوشباسشىلاردىڭ كۇش- جىگەرىن جۇمىلدىرۋعا ارنالعان بەدەلدى ءارى ىرگەلى الاڭعا اينالدى. وسى رەتتە ءبىز قىتايدىڭ بۇل باعىتتا كورسەتىپ كەلە جاتقان قولداۋىن جانە سىزدەردىڭ وكىلدەرىڭىزدىڭ تۇراقتى قاتىسۋىن جوعارى باعالايمىز، - دەگەن ماۋلەن اشىمبايەۆ سەزدى دامىتۋدىڭ 2033-جىلعا دەيىنگى تۇجىرىمداماسىن ىسكە اسىرۋ اياسىنداعى بىرلەسكەن جۇمىستىڭ نەگىزگى مىندەتتەرىنە توقتالدى.
سونىمەن قاتار ول قازىرگى سىن- قاتەرلەر مەن گەوساياسي شيەلەنىستەر جاعدايىندا الەمدىك جانە ءداستۇرلى دىندەر كوشباسشىلارىنىڭ سەزى رۋحاني ديپلوماتيا ارقىلى ادامزاتتى الاڭداتقان الەمدىك، ەكولوگيالىق جانە رۋحاني ماسەلەلەردى شەشۋگە ىقپال ەتۋگە ءتيىس ەكەنىن تىلگە تيەك ەتتى.
وسى رەتتە سەزدىڭ ىزگى نيەت ەلشىلەرى جانە جاس ءدىن ليدەرلەرىنىڭ فورۋمى سياقتى باستامالار ماڭىزدى ءرول اتقاراتىنى اتاپ ءوتىلدى. ءارتۇرلى كونفەسسيالاردىڭ، حالىقارالىق جانە قوعامدىق ۇيىمداردىڭ وكىلدەرىن، بولاشاعىنان زور ءۇمىت كۇتتىرەتىن جاس عالىمدار مەن ساياساتكەرلەردى بىرىكتىرەتىن بۇل فورۋم العاش رەت بىلتىر قازان ايىندا ۇيىمداستىرىلدى.
ماۋلەن اشىمبايەۆ جاس كوشباسشىلاردى سەزگە جۇمىلدىرۋ وركەنيەتارالىق جانە كونفەسسياارالىق ديالوگتىڭ قالىپتاسقان ءداستۇرى مەن ساباقتاستىعىن ساقتاۋعا وڭ اسەرىن تيگىزەتىنىن ايتتى.
سەنات سپيكەرى ءوز سوزىندە قىتاي داوسيستەر قاۋىمداستىعى مەن قىتاي بۋدديستەر قاۋىمداستىعىنىڭ ءتوراعالارىنا سەزگە بەلسەندى قاتىسىپ، بەيبىتشىلىكتى ساقتاۋعا جانە كونفەسسياارالىق ديالوگتى دامىتۋعا ەلەۋلى ۇلەس قوسقانى ءۇشىن العىس ءبىلدىردى.
- قازىرگى تاڭدا الەمدە كۇردەلى گەوساياسي احۋال قالىپتاسقانى بەلگىلى. جاڭا سىن-قاتەرلەر پايدا بولىپ جاتىر. وسىعان بايلانىستى بەيبىتشىلىك پەن مادەنيەتكە تابان تىرەگەن ديالوگ ارقىلى ءدىني، ساياسي جانە قوعامدىق كوشباسشىلاردىڭ كۇش-جىگەرىن بىرىكتىرۋدىڭ ماڭىزى ارتىپ وتىر. الەمدىك جانە ءداستۇرلى دىندەر كوشباسشىلارىنىڭ VIII سەزى ءدال وسى ماقساتتى كوزدەيدى. سوندىقتان سىزدەردى VIII سەزگە شاقىرامىن. قىتاي ءدىن كوشباسشىلارىنىڭ قاتىسۋى فورۋمنىڭ ءساتتى وتۋىنە وڭ ىقپالىن تيگىزەدى دەپ سەنەمىن، - دەدى ماۋلەن اشىمبايەۆ.
ءوز كەزەگىندە شي تايفەن قازاقستاننىڭ ءتۇرلى دىندەر وكىلدەرى اراسىندا ديالوگ ورناتۋ جانە تولەرانتتىلىق پەن بەيبىت قاتار ءومىر ءسۇرۋ مادەنيەتىن ىلگەرىلەتۋ باعىتىندا جۇرگىزىپ كەلە جاتقان ساياساتىن جوعارى باعالادى. سونداي-اق ول سەزد جۇمىسى اياسىندا قازاقستانمەن ىنتىماقتاستىقتى نىعايتۋعا مۇددەلى جانە قىتاي ءدىن كوشباسشىلارى جاڭا بىرلەسكەن جوبالار ءۇشىن اشىق ەكەنىن اتاپ ءوتتى.
بۇدان بۇرىن حابارلاعانداي، الەمدىك جانە ءداستۇرلى دىندەر كوشباسشىلارىنىڭ VIII سەزى 2025-جىلى قازاقستان استاناسىندا وتەدى.
ەسكە سالايىق، بۇعان دەيىن بەيجىڭدە قازاقستان پارلامەنتى سەناتىنىڭ ءتوراعاسى، قىتاي حالىقتىق ساياسي كونسۋلتاتيۆتىك كەڭەسى ۇلتتىق كوميتەتىنىڭ ءتوراعاسى ۆان حۋنين مەن بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى چجاو لەدزيدىڭ كەزدەسۋلەرى وتكەن بولاتىن.