قىتايدىڭ التاي قالاسىندا قىسقى سپورت ويىندارى اشىلدى
استانا. KAZINFORM - التاي تاۋىنىڭ اينالاسىنداعى وڭىرلەردىڭ 2-قىسقى سپورت ويىندارى 12 قاڭتار كۇنى قىتايدىڭ التاي قالاسىندا سالاتاناتتى تۇردە اشىلدى. بۇل تۋرالى شينحۋا اگەنتتىگى حابارلادى.

ءتورت كۇنگە جالعاساتىن ءدۇبىرلى دودادا مانەرلەپ سىرعاناۋ، كونكيمەن جۇگىرۋ، سنوۋبوردينگ جانە شاڭعى كروسى سياقتى 7 سپورت ءتۇرى بويىنشا سايىستار وتەدى.
قىسقى التاي ويىندارىنا شىعىس قازاقستان وبلىسىنان، رەسەيدىڭ التاي ولكەسى مەن التاي، تىۆا رەسپۋبليكالارىنان، موڭعوليانىڭ حوۆدا، بايان-ولگەي جانە ۋۆس ايماقتارىنان، قىتايدىڭ تسزيلين پروۆينتسياسىنان، سانجى دۇنگەن اۆتونوميالىق وبلىسىنان، ءۇرىمجى، بەيتۋن، تۋرفان قالالارى مەن التاي ايماعىنان 13 قۇراما (جالپى 170 تەن استام سپورتشى مەن جاتتىقتىرۋشى) قاتىسىپ وتىر.
اشىلۋ سالتاناتىنان كەيىن وتكەن سۋپەرگيگانت (1200 م) جارىسىندا ءۇرىمجى قالاسىنىڭ وكىلى داي حاوبو ەرلەر اراسىندا چەمپيون اتانسا، ايەلدەر اراسىنان قازاقستان سپورتشىسى دميتريەۆنا كۆاچ باس جۇلدەنى جەڭىپ الدى.
- قىسقى التاي ويىندارىن وتكىزۋدەگى ماقساتىمىز - قىسقى سپورت ارقىلى التايدىڭ «قار جانە مۇز يندۋسترياسىنىڭ» ىقپالىن ارتتىرىپ، «التاي تاۋى» قىسقى تۋريزم برەندىنىڭ اتاعىن الەمدىك دەڭگەيگە كوتەرۋ. ءبىز وتاندىق جانە شەتەلدىك تۋريستەردى التايعا كوپتەپ تارتۋدى. سونداي-اق ۇلتتىق جانە پروۆينتسيالىق دەڭگەيدەگى شاڭعىشىلار قۇرامالارىن وسىندا وقۋ-جاتتىعۋ وتكىزۋگە شاقىرۋدى كوزدەپ وتىرمىز. وسى ارقىلى قىسقى سپورت، قىسقى تۋريزم، مۇز مادەنيەتى جانە قىسقى سپورت جابدىقتارى سەكىلدى سان سالالى وندىرىستىك قىزمەتتى العا دامىتۋعا جول اشىلماق، - دەيدى التاي ايماعىنىڭ (قىتاي) مادەنيەت، سپورت، تۋريزم جانە راديو-تەلەۆيزيا باسقارماسىنىڭ باسشىسى ءدىلدا ءنابي قىزى شينحۋا اگەنتتىگىنىڭ تىلشىسىنە بەرگەن جاۋابىندا.
التاي تاۋلارى قازاقستان، رەسەي، موڭعوليا جانە قىتاي اۋماعى ارقىلى باتىس ءسىبىر ويپاتىنان گوبي شولىنە دەيىن 2000 شاقىرىمعا سوزىلىپ جاتىر. قىتايدىڭ التاي ايماعى التاي تاۋىنىڭ كۇنگەي بەتىندە، ول الەم بويىنشا شاڭعى تەبۋگە ەڭ قولايلى وڭىرلەردىڭ ءبىرى سانالادى. التاي تاۋلارىنىڭ اينالاسىنداعى وڭىرلەردىڭ اتسالىسقان العاشقى قىسقى سپورت ويىندارى بىلتىر قاڭتار ايىندا التاي قالاسىندا (قىتاي) وتكەن بولاتىن.
IX قىسقى ازيا ويىندارىنىڭ بيلەتتەرى ساتىلىمعا شىققانىن جازعان بولاتىنبىز.
اۆتورەرلان مازان