قىتايدان تۋريست تارتۋ ءۇشىن نارىنقولدا جاياۋ وتكىزۋ پۋنكتى اشىلماق
قىتايدان تۋريستەردى كوپتەپ تارتۋ ءۇشىن نارىنقولدا جاياۋ وتكىزۋ پۋنكتىن اشۋ جوسپارلانىپ وتىر. بۇل تۋرالى الماتى وبلىسىنىڭ اكىمى مارات سۇلتانعازيەۆ بۇگىن ورتالىق كوممۋنيكاتسيالار قىزمەتىندە وتكەن بريفينگتە ايتتى، دەپ حابارلايدى Kazinform.
«الماتى وبلىسى قازاقستانداعى ماڭىزدى تۋريستىك ولكەلەردىڭ ءبىرى. رەسپۋبليكالىق تۋريستىك كارتاعا ەنگەن ءاربىر ونىنشى نىسان ءبىزدىڭ وڭىردە ورنالاسقان. وسى جىلى 15 تۋريستىك اۋماقتا 337 شاقىرىم تاۋلى سوقپاقتار مەن مارشرۋتتاردى اباتتاندىرۋ جۇرگىزىلۋدە. كولساي كولدەرىنىڭ ينفراقۇرىلىمىن دامىتۋ، كارىز جۇيەلەرى ماسەلەسىن شەشۋدى قولعا الدىق. بيىل دەمەۋشىلەردىڭ ەسەبىنەن تەگىن Wi-Fi نۇكتەسى قوسىلىپ، بەينەباقىلاۋ كامەرالارى ورناتىلدى. وسى جەردە كولسايدىڭ جانىنداعى ساتى اۋىلى جاقىندا وزبەكستاندا وتكەن دۇنيەجۇزىلىك تۋريستىك ۇيىمنىڭ كەڭەسىندە «ەڭ ۇزدىك تۋريستىك اۋىلداردىڭ» قاتارىنا ەنگىزىلگەنىن اتاپ وتكىم كەلەدى. بۇل تۋريزمدى دامىتۋ جۇمىستارىنا بەرىلگەن جوعارى باعا»، - دەدى ءوڭىر اكىمى.
وبلىس باسشىسىنىڭ اتاپ وتۋىنشە، 2023-2026 -جىلدارعا ارنالعان تۋريستىك ماستەر-جوسپار ازىرلەندى. 2023 -جىلدىڭ جارتى جىلدىعىندا ىشكى تۋريستەر سانى 13 پايىزعا ارتىپ، 1,1 ميلليون ادامعا جەتتى. شەتەلدىك تۋريستەر 12 ەسەگە كوبەيىپ، 74 مىڭ كەلۋشىنى قۇرادى.
«بۇل رەتتە قىتايمەن اراداعى ۆيزاسىز رەجيمدى ءتيىمدى پايدالانىپ، تۋريستەردى كوپتەپ تارتۋ ءۇشىن نارىنقولدا جاياۋ وتكىزۋ پۋنكتىن اشۋ جوسپارلانۋدا. اتالعان ءىس-شارالاردى ىسكە اسىرۋ تۋريستەر سانىن ارى قاراي دا ۇلعايتۋعا مۇمكىندىك بەرەدى»، - دەدى مارات سۇلتانعازيەۆ.
