قىتايدان ساتىپ الىنعان تاۋارلار قازاقستاندىقتارعا قالاي جەتكىزىلەدى
الماتى. KAZINFORM - ينتەرنەت ساۋداسىنىڭ قارىشتاپ دامۋىنا بايلانىستى قازاقستاندىقتاردىڭ قىتايدان زات ساتىپ الۋ مۇمكىندىگى كەڭەيدى.
بۇگىن Kazinform ءتىلشىسى ورتالىق ازيا جانە قىتايلىق «جەنمين جيباو» گازەتى بىرلەسكەن باسپا ءسوز تۋرى اياسىندا الماتى قالاسىندا ورنالاسقان «Qazpost - YTO» ج ش س سۇرىپتاۋ ورتالىعىنىڭ جۇمىسىمەن تانىسىپ قايتتى.
2023 -جىلى قازان ايىندا، مەملەكەت باسشىسى قاسىم-جومارت توقايەۆتىڭ قىتايعا رەسمي ساپارى اياسىندا «قازپوشتا» ا ق مەن YTO Express Group اراسىنداعى ىنتىماقتاستىق تۋرالى كەلىسىمگە قول قويدى. سونىمەن قاتار، 2024 -جىلى 2 -شىلدە، ەلوردادا وتكنە قازاقستان-قىتاي ىسكەرلىك كەڭەسىنىڭ جەتىنشى وتىرىسىندا «قازپوشتا» اق جانە YTO Express بىرلەسكەن كاسىپورنىنىڭ قۇرىلتايشىلىق شارتىنا قول قويىپ، «Qazpost - YTO» ج ش س ءوز جۇمىسىن باستادى. ىنتىماقتاستىق اياسىندا، «قازپوشتا» ا ق- نىڭ الماتى قالاسىنداعى سۇرىپتاۋ ورتالىعى جاڭعىرتىلىپ، جاڭا تەحنيكالارمەن جابدىقتالعان.
ەڭ اۋەلى الماتىعا جەتكەن تاۋارلار قىزىمتكەرلەردىڭ كومەگىمەن كەدەندىك راسىمدەۋدەن وتەدى. وسىدان كەيىن، تاۋار سۇرىپتاۋ ماشيناسىنىڭ كومەگىمەن قازاقستاننىڭ بارلىق جەرلەرى بويىنشا سۇرىپتالىپ، ەل ىشىندەگى زاتتى تابىستاۋ پۋنكتتەرىنە جىبەرىلەدى.
سۇرىپتاۋ ورتالىعى مەنەدجەرى ەرسايىن ءشارىپوۆتىڭ ايتۋىنشا، ورتالىقتىڭ جالپى اۋدانى 5 مىڭ شارشى مەتردى قۇرايدى.
- سۇرىپتاۋ ورتالىعىنا قىتايدىڭ ەلەكتروندى ساۋدا پلاتفورماسىنان ساتىپ الىنعان تاۋارلار كەلەدى. ورتالىق 5 مىڭ شارشى مەتردى قۇرايدى. قازىرگى ۋاقىتتا 120 جۇمىسشى 4 اۋىسىممەن 24 ساعات جۇمىس ىستەيدى. باستى ماقسات - تۇتىنۋشىلارعا جىلدام ءارى ساپالى قىزىمەت كورسەتۋ، - دەدى ەرسايىن.
ونىڭ ايتۋىنا قاراعاندا، ورتالىقتىڭ جۇمىس ونىمدىلىگى 5 ەسەگە ارتقان.
- جاڭا تەحنولوگيالاردى پايدالانا وتىرىپ، جۇمىس ونىمدىلىگى ارتتىرىلدى. بۇرىن ادام كۇشىمەن كۇنىنە 5-6 مىڭ سالەمدەمە سۇرىپتالسا، قازىرگى ۋاقىتتا 25-30 مىڭ سالەمدەمە سۇرىپتاۋ مۇمكىندىگىمىز بار، - دەدى ول.
سونىمەن قاتار قازاقستاندىقتار ءوز تاپسىرىستارىن ۇيىنە جاقىن ورنالاسقان تابىستاۋ پۋنكتتەرىنەن الادى.
- الماتى قالاسىندا 40 شاقتى تابىستاۋ پۋنكتى بار. سونىمەن قاتار، ەلدىڭ بارلىق قالالارىندا جالپى 100 دەن اسا پۋنكت ورنالاستىرىلعان. تۇتىنۋشىلاردىڭ تاپسىرىستى الىپ كەتۋىنە بارىنشا قولايلىلىق جاساۋ باستى نازاردا، - دەپ اتاپ ءوتتى پۋنكت قىزىمەتكەرى گۇلينا تولەۋبەك قىزى.
وسىعان دەيىن حابارلاعانىمىزداي، پرەزيدەنت قاسىم-جومارت توقايەۆ YTO Express باسقارما ءتوراعاسى يۋي حۋەيتسزياونى قابىلداپ، قازاقستان مەن ورتالىق ازيا ەلدەرى اۋماعىندا زاماناۋي ءارى ءتيىمدى كۋرەرلىك جەلىنى دامىتۋ ماسەلەسىن تالقىلاعان ەدى.
مۇحتار قاليموللا ۇلى
