قىتايدان ەرتىس ارقىلى قاتىنايتىن كەمەلەردىڭ پورتى سالىنادى
شىعىس قازاقستان وبلىسىنىڭ تارباعاتاي اۋدانىندا قىتايدان ەرتىس ارقىلى قاتىنايتىن كەمەلەردىڭ پورتى سالىنادى، دەپ حابارلايدى Kazinform.
بۇل تۋرالى كولىك ءمينيسترى مارات قارابايەۆ ۇكىمەت وتىرىسىندا ءمالىم ەتتى.
«ەرتىس ترانسشەكارالىق وزەنىنىڭ ترانزيتتىك پوتەنتسيالىن كەڭەيتۋ جوباسى بار. بۇل ەلىمىز ارقىلى رەسەي مەن قىتاي ەلدەرى اراسىندا جاڭا كولىك باعدارىن اشۋعا مۇمكىندىك بەرەدى. اتالعان باعىتتى دامىتۋ ماقساتىندا سەمەي قالاسىنىڭ ماڭايىندا جاڭا كەمە ءجۇرۋ شليۋزىنىڭ قۇرىلىسى قاراستىرىلاتىن بولادى»،-دەدى مارات قارابايەۆ.
سونداي- اق ول مايقاپشاعاي كەدەن بەكەتىنە تەمىرجول تارتىلاتىنىن ايتتى.
«تۇعىل اۋىلىنىڭ اۋماعىندا پورت جانە قىتاي شەكاراسىنا دەيىن تۇعىل-مايقاپشاعاي ۋچاسكەسىندە ۇزىندىعى 99 شاقىرىم تەمىر جول جەلىسى سالىنادى. تاسىمالدىڭ قوسىمشا بولجامدى كولەمى - 2 - 2,5 ميلليون توننا»، - دەدى مينيستر.
